శ్రీశైలం ఆలయ ప్రతిష్ట దిగజార్చితే కఠిన చర్యలు..

సోషల్ మీడియాలో కేటుగాళ్లు రెచ్చిపోతున్నారు.. ఏదిపడితే అది పెడుతూ ఆందోళనకు గురిచేసేవాళ్లు కొందరైతే.. మతవిశ్వాసాలను దెబ్బకొట్టే విధంగా.. రెచ్చగొట్టే విధంగా.. దేవుళ్లు, ఆలయాలు, ప్రార్థనా మందిరాలు.. ఇలా అన్నింటిపై పోస్టులు పెట్టేవారు ఉన్నారు. అయితే, ఈ మధ్య కొందరు ప్రముఖ శైవక్షేత్రం శ్రీశైలంపై కూడా పోస్టులు పెడుతున్నారు.. వారికి సీరియస్‌ వార్నింగ్‌ ఇచ్చారు ఎమ్మెల్యే శిల్పా చక్రపాణిరెడ్డి.. శ్రీశైలం ఆలయ ప్రతిష్ట దిగజార్చే పోస్టులు పెట్టేవారిపై చర్యలు తీసుకుంటాం అన్నారు శిల్పా చక్రపాణిరెడ్డి.. దేవస్థానంపై అసత్య ప్రచారం చేసేవారు ఏ పార్టీ వారైనా వదిలిపెట్టేది లేదని హెచ్చరించిన ఆయన.. శ్రీశైలం-దోర్నాల-ఆత్మకూరు నాలుగు లైన్ల రోడ్డుకు ప్రణాళిక సిద్ధం చేస్తున్నట్టు వెల్లడించారు.. త్వరలోనే కేంద్ర హోంమంత్రి అమిత్ షాను కలిసి శ్రీశైల దేవస్థానం అభివృద్ధిపై చర్చిస్తాం అన్నారు ఎమ్మెల్యే శిల్పా చక్రపాణి రెడ్డి. కాగా, ఈ మధ్యే కుటుంబసభ్యులతో కలిసి.. శ్రీశైలం మల్లికార్జున స్వామిని దర్శించుకున్న అమిత్‌షా.. ప్రత్యేక ప్రార్థనలు చేసిన సంగతి తెలిసిందే.