Payyavula Keshav: అనంతపురం జిల్లా ప్రజల రుణం తీర్చుకునేలా నిర్ణయాలు తీసుకున్నాం!

అనంతపురం జిల్లాలో రైతులు ఎదుర్కొంటున్న సమస్యలపై రాష్ట్ర ప్రభుత్వం దృష్టికి తీసుకెళ్లాల్సిన వాటిపై చర్చించామని ఆర్థిక శాఖ మంత్రి పయ్యావుల కేశవ్ తెలిపారు. అనంతపురంలో 14 టీడీపీ ఎమ్మెల్యేలను గెలిపించిన జిల్లా ప్రజల రుణం తీర్చుకునేలా నిర్ణయాలు తీసుకున్నామన్నారు. జిల్లాలో సాగు నీటి ప్రాజెక్టులను పూర్తి చేసేలా నిర్ణయం తీసుకున్నాం అని మంత్రి పయ్యావుల చెప్పారు. నేడు జరిగిన టీడీపీ జిల్లా సమన్వయ కమిటీ సమావేశానికి మంత్రి పయ్యావుల కేశవ్, మంత్రి టీజీ భరత్, ఎమ్మెల్యేలు హాజరయ్యారు.

సమన్వయ కమిటీ సమావేశం అనంతరం మంత్రి పయ్యావుల కేశవ్ మాట్లాడుతూ… ‘జిల్లాలో రైతులు ఎదుర్కొంటున్న సమస్యలపై రాష్ట్ర ప్రభుత్వం దృష్టికి తీసుకెళ్లాల్సిన వాటిపై ఈ సమావేశంలో చర్చించాం. 14 టీడీపీ ఎమ్మెల్యేలను గెలిపించిన జిల్లా ప్రజల రుణం తీర్చుకునేలా నిర్ణయాలు తీసుకున్నాం. జిల్లాలో సాగునీటి ప్రాజెక్టులను పూర్తి చేసేలా నిర్ణయం తీసుకున్నాం. జిల్లా పార్టీ కార్యాలయం కోసం స్థల సేకరణ చేయాలని నిర్ణయం తీసుకున్నాం. సాగు నీటి సంఘాల ఎన్నికలపై చర్చించాం. పదవులు ఇచ్చే విధానంలో పార్టీ కోసం పోరాడిన వారికే దక్కేలా చూస్తాం. పదవులు ఎమ్మెల్యేల సిఫార్సు, లేఖల వల్ల కాకుండా.. పార్టీ కోసం కష్టపడిన వారికే దక్కాలని నిర్ణయం తీసుకున్నాం. ప్రజలకు మరింత చేరువ కావడానికి ఎలాంటి నిర్ణయాలు తీసుకోవాలని చర్చించాం’ అని చెప్పారు.