Rajasthani Dal Baati: నోట్లో వేస్తే కరిగిపోయే నెయ్యి బాటీలు, ఘాటైన దాల్ కాంబినేషన్ ఇలా చేయండి..!

Rajasthani Dal Baati Recipe: ఉత్తర భారతీయ వంటకాల్లో ముఖ్యంగా రాజస్థాన్‌కు ఎంతో గుర్తింపు తెచ్చిన సాంప్రదాయ వంటకం ‘దాల్ బాటీ’. కమ్మనైన నెయ్యి పరిమళంతో కాల్చిన బాటీలు, రుచికరమైన తాలింపుతో చేసిన మసాలా దాల్ కాంబినేషన్ లంచ్ లేదా డిన్నర్‌కు అద్భుతమైన ఎంపికగా నిలుస్తుంది. దీనిని బయటి రెస్టారెంట్లలో మాత్రమే కాకుండా, సాధారణ వంట పాత్రలతో మన ఇంట్లోనే చాలా సులువుగా ఎలా తయారుచేసుకోవచ్చో ఇక్కడ చూద్దాం.

దాల్ (పప్పు) తయారీ..

కావలసిన పదార్థాలు:

* శనగపప్పు (లేదా మిశ్రమ పప్పులు) – 1/4 కప్పు
* పసుపు – 1/4 టీస్పూన్
* నూనె లేదా నెయ్యి – 3-4 టేబుల్ స్పూన్లు
* ఆవాలు – 1/2 టీస్పూన్
* జీలకర్ర – 1/2 టీస్పూన్
* ఇంగువ – చిటికెడు
* పచ్చిమిర్చి – 2-3 (సన్నని తరుగు)
* ఉల్లిపాయ – 1 పెద్దది (సన్నగా తరిగినది)
* అల్లం-వెల్లుల్లి పేస్ట్ (లేదా కచ్చాపచ్చాగా దంచిన ముక్కలు) – 1 టీస్పూన్
* టమోటాలు – 2-3 (సన్నగా తరిగినవి)
* కారం – 1 టీస్పూన్
* ధనియాల పొడి – 1/2 టీస్పూన్
* గరం మసాలా – 1/2 టీస్పూన్
* కరివేపాకు, తాజా కొత్తిమీర – సరిపడా
* ఉప్పు – రుచికి తగినంత
* నిమ్మరసం – కొద్దిగా

తయారీ విధానం:

ముందుగా పప్పును శుభ్రంగా కడిగి కుక్కర్‌లో తగినన్ని నీళ్లు, కొద్దిగా నూనె, చిటికెడు పసుపు వేసి మెత్తగా ఉడికించుకోవాలి. కుక్కర్ ఆవిరి పోయిన తర్వాత పప్పును పప్పుగుత్తితో మెత్తగా ఎనుపుకోవాలి. ఇప్పుడు ఒక బాండీలో మూడు నుండి నాలుగు స్పూన్ల నెయ్యి (లేదా నూనె) వేడి చేసి, అందులో ఆవాలు, జీలకర్ర, ఇంగువ, కరివేపాకు వేసి చిటపటలాడించాలి. ఆపై ఉల్లిపాయ తరుగు, పచ్చిమిర్చి, అల్లం-వెల్లుల్లి వేసి ఎర్రగా వేయించాలి.

అందులోనే టమోటా ముక్కలు వేసి మూతపెట్టి, నూనె పైకి తేలే వరకు మెత్తగా మగ్గనివ్వాలి. టమోటాలు బాగా మగ్గిన తర్వాత కారం, ధనియాల పొడి, ఉప్పు వేసి కలిపి, ముందుగా ఉడికించి పెట్టుకున్న పప్పును అందులో వేసుకోవాలి. గ్రేవీకి సరిపడా నీళ్లు పోసి మంటను మీడియం ఫ్లేమ్‌లో ఉంచి 10 నుండి 15 నిమిషాల పాటు పప్పును బాగా మరగనివ్వాలి. దాల్ చక్కటి చిక్కటి కన్సిస్టెన్సీకి వచ్చాక గరం మసాలా, సన్నగా తరిగిన కొత్తిమీర తరుగు, చివరగా కొద్దిగా నిమ్మరసం పిండుకుని దించుకోవాలి.

బాటీ (గోధుమ పిండి ఉండలు) తయారీ..

కావలసిన పదార్థాలు:

* గోధుమ పిండి – 2 కప్పులు
* బొంబాయి రవ్వ (సూజీ) – 2-3 టేబుల్ స్పూన్లు (క్రిస్పీగా రావడం కోసం)
* నెయ్యి (మోయన్ కోసం) – 2-3 టేబుల్ స్పూన్లు
* వాము (అజ్వైన్) – 1/2 టీస్పూన్
* బేకింగ్ సోడా – చిటికెడు (ఐచ్ఛికం)
* ఉప్పు – సరిపడా
* నానబెట్టడానికి నీళ్లు – తగినంత
* బాటీలను ముంచడానికి నెయ్యి – తగినంత

తయారీ విధానం:

ఒక వెడల్పాటి పాత్రలో గోధుమ పిండి, రవ్వ, ఉప్పు, చేతితో నలిపిన వాము మరియు రెండు మూడు స్పూన్ల కరిగించిన నెయ్యి వేయాలి. నెయ్యి పిండి అంతటికీ బాగా పట్టేలా చేత్తో పిండిని కలపాలి. ఆ తర్వాత కొద్దికొద్దిగా నీళ్లు పోస్తూ చపాతీ పిండి కంటే కాస్త గట్టిగా ఉండేలా పిండిని కలుపుకోవాలి. పిండిని ఎక్కువ సేపు మెదపకుండా ముద్దలా చేసి 10-15 నిమిషాలు పక్కన పెట్టాలి. నానిన తర్వాత పిండిని నిమ్మకాయ కంటే కాస్త పెద్ద సైజు ఉండలుగా చేసుకుని, మరీ నునుపుగా కాకుండా కాస్త పగుళ్లు ఉండేలా గుండ్రటి లేదా కొద్దిగా అణచిన ఆకారంలో బాటీలను సిద్ధం చేసుకోవాలి.

బేకింగ్ & సర్వింగ్ విధానం

బాటీలను బేక్ చేయడానికి అడుగు మందంగా ఉన్న ఇడ్లీ పాత్ర, కుక్కర్ లేదా నాన్‌స్టిక్ పాన్ వాడుకోవచ్చు. పాత్రకు అడుగున కొద్దిగా నెయ్యి రాసి, తయారుచేసిన బాటీలను ఒకదానికొకటి తాకకుండా కొద్దిగా దూరం దూరంగా అమర్చాలి. మూతపెట్టి చాలా తక్కువ మంట (లో ఫ్లేమ్) మీద 15 నుండి 20 నిమిషాల పాటు కాల్చాలి. మధ్యమధ్యలో బాటీలను అటూఇటూ తిప్పుతూ అన్ని వైపులా సమానంగా, గోల్డెన్ బ్రౌన్ రంగు వచ్చేలా మరియు లోపల వరకు ఉడికేలా కాల్చుకోవాలి. (ఓవెన్ ఉన్నవారు 180°C వద్ద 20-25 నిమిషాలు బేక్ చేయవచ్చు).

బాటీలు వేడిగా ఉన్నప్పుడే వాటిని చేత్తో లేదా క్లాత్ సాయంతో కాస్త నొక్కి పగులగొట్టాలి. అలా పగిలిన బాటీలను కరిగించిన వేడి నెయ్యి గిన్నెలో ముంచి తీయాలి. నెయ్యిని లోపలి వరకు పీల్చుకున్న బాటీలను వేడివేడి మసాలా దాల్, నిమ్మకాయ ముక్కలు, ఉల్లిపాయ ముక్కలతో కలిపి వడ్డిస్తే నోరూరించే అసలైన రాజస్థానీ రుచి ఇంట్లోనే సిద్ధమవుతుంది.