Punjab: ఎన్నికల వేళ హస్తం పార్టీకి షాక్.. కాంగ్రెస్ అధ్యక్షుడు అమరీందర్ వారింగ్ రాజీనామా

పంజాబ్ కాంగ్రెస్‌లో కీలక పరిణామం చోటుచేసుకుంది. పంజాబ్ ప్రదేశ్ కాంగ్రెస్ కమిటీ అధ్యక్షుడు అమరీందర్ సింగ్ రాజా వరంగ్ తన పదవికి రాజీనామా చేశారు. శుక్రవారం ఢిల్లీలో కాంగ్రెస్ నేత రాహుల్ గాంధీని కలిసిన అనంతరం తన రాజీనామా లేఖను ఆయనకు సమర్పించారు. పంజాబ్ కాంగ్రెస్‌లో కొంతకాలంగా కొనసాగుతున్న అంతర్గత విభేదాల నేపథ్యంలో ఈ పరిణామం చోటుచేసుకుంది.

రాజీనామా అనంతరం రాజా వరంగ్ రాహుల్ గాంధీతో సమావేశమైన విషయాన్ని వెల్లడించారు. పంజాబ్‌లో కాంగ్రెస్ ఎదుర్కొంటున్న సవాళ్లు, పార్టీ బలాలు, రాష్ట్రంలోని రాజకీయ పరిస్థితులపై ఆయనతో చర్చించినట్లు తెలిపారు. రాహుల్ గాంధీ తనకు ఎంతో ఆప్యాయత చూపించారని, పంజాబ్‌లో ప్రభుత్వం, రాజకీయ పరిస్థితులు, కాంగ్రెస్ అనుసరించాల్సిన వ్యూహాలపై వివరాలు అడిగారని చెప్పారు. క్లిష్ట పరిస్థితుల్లో పంజాబ్ కాంగ్రెస్‌ను నడిపించే అవకాశం ఇచ్చినందుకు రాహుల్‌కు కృతజ్ఞతలు తెలిపినట్లు పేర్కొన్నారు. పార్టీకి ఎప్పుడు తన సేవలు అవసరమైనా అందుబాటులో ఉంటానని స్పష్టం చేశారు.

సచిన్ పైలట్‌పై ఆరోపణలు

తన రాజీనామాకు కాంగ్రెస్ పంజాబ్ ఇన్‌చార్జ్, ఏఐసీసీ జనరల్ సెక్రటరీ సచిన్ పైలట్ కారణమై ఉండొచ్చని రాజా వరంగ్ అభిప్రాయపడ్డారు. అయితే దీనికి తన దగ్గర ఎలాంటి స్పష్టమైన ఆధారాలు లేవని కూడా స్వయంగా చెప్పారు. సచిన్ పైలట్‌ను పంజాబ్ ఇన్‌చార్జ్‌గా నియమించినప్పుడు ఆయనను అధికారికంగా కలిసి అభినందించానని, సుమారు 15 నిమిషాలు మాట్లాడానని వరంగ్ తెలిపారు. ఆ తర్వాత మాత్రం పైలట్‌ను కలవలేదని చెప్పారు.

రాజా వరంగ్ సుమారు నాలుగున్నరేళ్ల పాటు పంజాబ్ కాంగ్రెస్ అధ్యక్షుడిగా కొనసాగారు. 2022లో ఆయనను రాష్ట్ర కాంగ్రెస్ అధ్యక్షుడిగా నియమించారు. ఆయన పదవీకాలంలో రాష్ట్ర కాంగ్రెస్‌లో పలు వర్గాల మధ్య విభేదాలు కొనసాగినట్లు నివేదికలు పేర్కొన్నాయి. ముఖ్యంగా మాజీ ముఖ్యమంత్రి చరణ్‌జిత్ సింగ్ చన్నీ వర్గానికి, వరంగ్‌కు మధ్య విభేదాలపై చర్చ జరిగింది. ఇటీవల భూపేశ్ బఘేల్ స్థానంలో సచిన్ పైలట్‌ను పంజాబ్ కాంగ్రెస్ ఇన్‌చార్జ్‌గా నియమించిన తర్వాత రాష్ట్ర పార్టీ పరిస్థితిపై ఆయన నేతలు, కార్యకర్తల నుంచి అభిప్రాయాలు సేకరించినట్లు పలు నివేదికలు పేర్కొన్నాయి.

వరంగ్ రాజీనామాతో పంజాబ్ కాంగ్రెస్‌కు కొత్త అధ్యక్షుడిని నియమించే ప్రక్రియపై చర్చ మొదలైంది. మాజీ మంత్రి, మాజీ ఎంపీ విజయ్ ఇందర్ సింగ్లా పేరు పరిశీలనలో ఉన్నట్లు పలు నివేదికలు పేర్కొన్నాయి. జలంధర్ కాంట్ ఎమ్మెల్యే పర్గత్ సింగ్, మాజీ సీఎం చరణ్‌జిత్ సింగ్ చన్నీ, గురుదాస్‌పూర్ ఎంపీ సుఖ్‌జిందర్ సింగ్ రంధావా తదితరుల పేర్లు కూడా చర్చలో ఉన్నట్లు వార్తలు వచ్చాయి. అయితే కొత్త అధ్యక్షుడిపై తుది నిర్ణయం కాంగ్రెస్ అధిష్ఠానానిదే. వచ్చే పంజాబ్ అసెంబ్లీ ఎన్నికలకు ముందు రాష్ట్ర కాంగ్రెస్‌లో చోటుచేసుకున్న ఈ నాయకత్వ మార్పు.. పార్టీ అంతర్గత సమీకరణాలపై చర్చకు దారితీసింది.