Janasena Leaders Meet Chandrababu: జనసేనలో అంతర్మథనం.. సీట్ల సంఖ్యపై కేడర్ అసంతృప్తి.. మరోసారి చంద్రబాబుతో కీలక భేటీ

Janasena Leaders Meet Chandrababu: ఆంధ్రప్రదేశ్‌లో స్థానిక ఎన్నికల నేపథ్యంలో కూటమిలో సీట్ల సర్దుబాటు అంశం మరోసారి చర్చకు వచ్చింది. ముఖ్యమంత్రి, టీడీపీ అధినేత నారా చంద్రబాబు నాయుడుతో జనసేన నేతలు సమావేశమై కార్పొరేషన్లు, మున్సిపాలిటీల్లో సీట్ల కేటాయింపుపై చర్చించినట్లు సమాచారం. ఉండవల్లిలోని సీఎం నివాసానికి జనసేన నేతలు నాదెండ్ల మనోహర్, లింగమనేని రమేష్ వచ్చారు.

మరోవైపు, స్థానిక ఎన్నికల్లో సీట్ల కేటాయింపు సరిగా జరగలేదంటూ జనసేన కేడర్ నుంచి అసంతృప్తి వ్యక్తమవుతున్న నేపథ్యంలో పార్టీలో అంతర్మథనం కొనసాగుతోంది. ఈ అంశంపై జనసేన అధ్యక్షుడు పవన్ కల్యాణ్.. పార్టీ కో-ఆర్డినేషన్ కమిటీతో సమావేశమయ్యారు. దాదాపు రెండు గంటలకు పైగా జరిగిన ఈ సమావేశంలో స్థానిక ఎన్నికల్లో పోటీ, సీట్ల సంఖ్య, కేటాయింపులపై సుదీర్ఘంగా చర్చించినట్లు తెలుస్తోంది. స్థానిక ఎన్నికల్లో జనసేనకు దక్కే సీట్ల సంఖ్యపై పార్టీలో అసంతృప్తి కొనసాగుతున్నట్లు సమాచారం. పోటీ చేయబోయే అభ్యర్థుల వివరాలు ఇంకా పూర్తిస్థాయిలో కొలిక్కి రాకపోవడంతో తదుపరి కార్యాచరణపై చర్చలు జరుగుతున్నాయి. ఈ నేపథ్యంలో సీఎం చంద్రబాబుతో జనసేన నేతల భేటీ ప్రాధాన్యం సంతరించుకుంది. కార్పొరేషన్లు, మున్సిపాలిటీల్లో సీట్ల సర్దుబాటుపై చర్చలు ఏ మేరకు ఫలిస్తాయన్నది ఆసక్తికరంగా మారింది.