BSF Jobs: బీఎస్ఎఫ్ ఉద్యోగాల్లో మాజీ అగ్నివీరులకు 10 శాతం రిజర్వేషన్.. కేంద్రం నిర్ణయం
BSF Jobs: ప్రతిష్టాత్మకమైన అగ్నిపథ్ పథకానికి అనుగుణంగా సరిహద్దు భద్రతా దళంలో ఖాళీగా ఉన్న మాజీ అగ్నివీరులకు గరిష్ట వయోపరిమితిలో సడలింపులతో 10 శాతం రిజర్వేషన్లను కేంద్ర హోం మంత్రిత్వ శాఖ ప్రకటించింది. సరిహద్దు భద్రతా దళం(బీఎస్ఎఫ్), జనరల్ డ్యూటీ కేడర్ (నాన్ గెజిటెడ్) రిక్రూట్మెంట్ రూల్స్, 2015ను సవరించిన తర్వాత నోటిఫికేషన్ ద్వారా ఈ ప్రకటన చేయబడింది. ఇది మార్చి 9 నుండి అమలులోకి వస్తుంది. “ఖాళీలలో పది శాతం మాజీ అగ్నివీరుల కోసం రిజర్వ్ చేయబడుతుంది” అని నోటిఫికేషన్ పేర్కొంది.
మాజీ అగ్నివీరుల మొదటి బ్యాచ్ అభ్యర్థులకు గరిష్ట వయో పరిమితి ఐదేళ్ల వరకు సడలింపు ఉంటుందని, ఇతర బ్యాచ్ల అభ్యర్థులకు మూడేళ్ల వరకు పరిమితి సడలింపు ఉంటుందని మంత్రిత్వ శాఖ తెలిపింది. మాజీ అగ్నివీరులకు కూడా ఫిజికల్ ఎఫిషియెన్సీ టెస్ట్ నుంచి మినహాయింపు ఉంటుందని నోటిఫికేషన్ పేర్కొంది.
ఆర్మీ, నేవీ, వైమానిక దళంలో 17న్నర నుంచి 21 ఏళ్ల మధ్య వయసున్న యువకుల నియామకం కోసం కేంద్రం గతేడాది జూన్ 14న అగ్నిపథ్ పథకాన్ని ఆవిష్కరించింది. ఈ పథకం కింద రిక్రూట్ అయిన వారిని ‘అగ్నివీర్లు’ అంటారు. నాలుగు సంవత్సరాల పదవీకాలం పూర్తయిన తర్వాత, ప్రతి బ్యాచ్ నుండి రిక్రూట్ అయిన వారిలో 25 శాతం మందికి రెగ్యులర్ సర్వీస్ అందించబడుతుంది. ఆ సమయంలో కేంద్ర పారామిలటరీ బలగాలు, అస్సాం రైఫిల్స్లో 10 శాతం ఖాళీలను 75 శాతం అగ్నివీరుల కోసం రిజర్వ్ చేస్తున్నట్లు హోం మంత్రిత్వ శాఖ ప్రకటించింది. మాజీ అగ్నివీరుల మొదటి బ్యాచ్కు గరిష్ట వయోపరిమితిని ఐదేళ్ల వరకు, తదుపరి బ్యాచ్లకు మూడేళ్ల వరకు సడలించినట్లు ప్రకటించింది. అదనంగా, మాజీ అగ్నివీర్లకు ఫిజికల్ ప్రొఫిషియన్సీ టెస్ట్ నుండి మినహాయింపు ఉంటుందని మంత్రిత్వ శాఖ తెలిపింది. పారామిలటరీ బలగాలకు రిక్రూట్మెంట్ కోసం నిర్దేశిత వయోపరిమితి 18-23 సంవత్సరాలు.
Read Also: Dog Meat Eating Remark: కుక్క మాంసంపై మహారాష్ట్ర ఎమ్మెల్యే వ్యాఖ్యలు.. అస్సాం అసెంబ్లీలో దుమారం
అగ్నిపథ్ పథకం కింద 21 సంవత్సరాల గరిష్ట వయోపరిమితిలో కూడా సాయుధ దళాలలో చేరిన వారికి, సైన్యం లేదా వైమానిక దళం లేదా నౌకాదళంలో నాలుగు సంవత్సరాల సేవ తర్వాత 30 సంవత్సరాల వయస్సు వరకు బీఎస్ఎఫ్లో రిక్రూట్ చేసుకోవచ్చు. అగ్నివీర్లను పారామిలటరీ బలగాల్లోకి చేర్చుకోవడంపై హోం మంత్రిత్వ శాఖ నిర్ణయం ముఖ్యమైనది. ఎందుకంటే ఇది మాజీ అగ్నివీర్లకు పదవీ విరమణ వయస్సు వరకు ఉద్యోగావకాశాలను పొందడంలో సహాయపడుతుంది. 70,000 ఖాళీలను భర్తీ చేయడానికి శిక్షణ పొందిన సిబ్బందిని పొందడం వల్ల పారామిలటరీ బలగాలు కూడా ప్రయోజనం పొందుతాయి.