Wedding bells: సీఎంకు నయన్, విఘ్నేష్ వివాహ ఆహ్వానం!
గత కొన్నేళ్ళుగా సహజీవనం చేస్తున్న కోలీవుడ్ జంట నయనతార, విఘ్నేష్ శివన్ ఎట్టకేలకు పెళ్ళి పీటలు ఎక్కబోతున్నారు. విచిత్రం ఏమంటే… ఇప్పటికే వారికి వివాహం జరిగినట్టుగా కొన్ని వందలసార్లు వార్తలు వచ్చాయి. కలిసి జీవితాన్ని గడుపుతున్న వీరు మాత్రం ఈ విషయమై పెదవి విప్పలేదు. ఇదిలా ఉంటే… తాజాగా తమిళనాడు ముఖ్యమంత్రి ఎం.కె. స్టాలిన్ ను శనివారం కలిసి తమ వివాహ శుభలేఖను వారు అందించారు. ఈ సందర్భంగానూ వారు ఎలాంటి ప్రకటన చేయలేదు. అయితే తెలిసిన సమాచారం మేరకు వీరి వివాహం చెన్నయ్ లో ఈ నెల 9న జరుగబోతోంది.
కుటుంబ సభ్యులు, అత్యంత సన్నిహితుల సమక్షంలో నయన్, విఘ్నేష్ శివన్ వివాహం చేసుకోబోతున్నారు. సినిమారంగానికి చెందిన అతి కొద్దిమంది మాత్రమే ఈ వేడుకకు హాజరవుతారని తెలుస్తోంది. అందులో ఇటీవల విఘ్నేష్ శివన్ మూవీ ‘కె.ఆర్.కె.’లో నటించిన విజయ్ సేతుపతి, సమంత ఉంటారని అంటున్నారు. ఏదేమైనా… ఇప్పటికే వీరి వివాహం జరిగిందనే వార్తలకు ఫుల్ స్టాప్ పెడుతూ, ఈ జంట ఈ సమయంలో పెళ్ళిపీటలు ఎక్కడానికి కారణం ఏమై ఉంటుందా అనే ఊహాగానాలు కోలవుడ్ లో మొదలయ్యాయి.