Coconut Water: కొబ్బరి నీళ్లు తాగడం వల్ల సైడ్ ఎఫెక్ట్స్ ఉన్నాయని మీకు తెలుసా..?

కొబ్బరి నీరు తాగితే ఆరోగ్యానికి చాలా మంచిదని అందరికీ తెలుసు.. కొబ్బరి నీళ్లు తాగడం వల్ల అలసట, నీరసాన్ని పోగొట్టడానికి రిఫ్రెష్ డ్రింక్ గా పని చేస్తుంది. ఇది.. సహజంగా తీపి, తాజా పోషకాలతో సమృద్ధిగా ఉంటుంది. కొబ్బరి నీటిలో విటమిన్లు, మినరల్స్, ఎలక్ట్రోలైట్స్, యాంటీఆక్సిడెంట్లు పుష్కలంగా ఉంటాయి. ఇది శరీరాన్ని హైడ్రేట్‌గా ఉంచి.. శరీరానికి బలాన్ని ఇస్తుంది. అంతేకాకుండా.. శరీరంలో నీటి లోపాన్ని తొలగించడానికి కొబ్బరి నీళ్లు అద్భుతంగా పనిచేస్తుంది. అయితే కొబ్బరి నీళ్లు తాగడం వల్ల సైడ్ ఎఫెక్ట్స్ ఉన్నాయని మీరు ఎప్పుడైనా అనుకున్నారా.. అవును, కొబ్బరి నీళ్ళు కొందరికీ మంచిది కావు. కొన్ని ఆరోగ్య సమస్యలు ఎదురవుతాయి. కొబ్బరి నీరు తాగితే ఎవరికి హాని కలిగిస్తుందో తెలుసుకుందాం.

Read Also: Janavani: జనసేన కార్యాలయంలో జనవాణి.. భూకబ్జాలపై ఫిర్యాదుల వెల్లువ

కిడ్నీ సంబంధిత సమస్యలు:
కొబ్బరి నీళ్లలో పొటాషియం చాలా ఎక్కువ. ఒక కొబ్బరికాయలో దాదాపు 600 మి.గ్రా పొటాషియం ఉంటుంది. ఇది శరీరానికి అవసరం, కానీ మూత్రపిండాల సంబంధిత వ్యాధులు ఉన్నవారికి ఇది హానికరం.
కిడ్నీ సమస్యలతో బాధపడేవారి శరీరం అదనపు పొటాషియంను సరిగ్గా ఫిల్టర్ చేయలేకపోవటం వల్ల హైపర్‌కలేమియా (రక్తంలో పొటాషియం అధికంగా ఉండటం) సమస్య వస్తుంది. ఈ క్రమంలో కండరాల బలహీనత, క్రమరహిత హృదయ స్పందన, తీవ్రమైన సందర్భాల్లో గుండెపోటు వచ్చే ప్రమాదం కూడా పెరుగుతుంది.

తక్కువ రక్తపోటు సమస్య:
కొబ్బరి నీళ్ల వినియోగం రక్తపోటును తగ్గించడంలో సహాయపడుతుంది. అధిక రక్తపోటు సమస్యతో బాధపడే వారికి ఇది మేలు చేస్తుంది. అయితే.. రక్తపోటు తక్కువగా ఉన్న వాళ్లు కొబ్బరి నీటిని ఎక్కువగా తాగకూడదు. ఎందుకంటే వారి రక్తపోటును మరింత తగ్గిస్తుంది. దీంతో తల తిరగడం, అలసట, మూర్ఛ వంటి సమస్యలు వస్తాయి.

మధుమేహంలో హానికరం:
కొబ్బరి నీళ్లలో సహజ చక్కెర ఉంటుంది. ఇది రుచికి తీపిగా ఉంటుంది. అయితే.. ఈ చక్కెర మధుమేహ వ్యాధిగ్రస్తులకు సమస్యలను కలిగిస్తుంది. మధుమేహ వ్యాధిగ్రస్తులు కొబ్బరి నీళ్లను అధిక మొత్తంలో తీసుకుంటే, వారి రక్తంలో చక్కెర స్థాయి పెరుగుతుంది.

శస్త్రచికిత్సకు ముందు త్రాగవద్దు:
మీరు ఏదైనా శస్త్రచికిత్స చేయించుకునే కొన్ని రోజుల ముందు కొబ్బరి నీళ్ళు తాగకూడదు. కొబ్బరి నీళ్లలో ఉండే ఎలక్ట్రోలైట్స్, మినరల్స్ శరీరం యొక్క రక్తపోటు.. ఎలక్ట్రోలైట్ బ్యాలెన్స్‌ను ప్రభావితం చేస్తాయి. ఇది శస్త్రచికిత్స సమయంలో కానీ.. ఆ తర్వాత సమస్యలకు దారితీస్తుంది. కాబట్టి శస్త్రచికిత్సకు ముందు కొబ్బరినీళ్లు తాగకుండా ఉండటం మంచిది.

కడుపు సంబంధిత సమస్యలు:
కొబ్బరినీళ్లు ఎక్కువగా తాగడం వల్ల ప్రకోప ప్రేగు సిండ్రోమ్ (IBS) లేదా అల్సరేటివ్ కొలిటిస్ వంటి కడుపు సమస్యలు వస్తాయి. ఈ సమస్యలు ఉన్న వాళ్లు కొబ్బరి నీటిని తక్కువగా తీసుకోవాలి. కొబ్బరి నీటిలో ఉండే ఫైబర్.. కొంతమందికి జీర్ణ సమస్యలను కలిగిస్తుంది.

అలెర్జీ సమస్య:
కొంతమందికి కొబ్బరి లేదా కొబ్బరి ఉత్పత్తులు వాడటం వల్ల అలెర్జీ వస్తుంది. అలాంటి వారికి కొబ్బరినీళ్లు తాగడం హానికరం. కొబ్బరికి అలెర్జీ చర్మం దద్దుర్లు, దురద, వాపు, శ్వాస తీసుకోవడంలో ఇబ్బంది.. తీవ్రమైన సందర్భాల్లో అనాఫిలాక్సిస్ వంటి సమస్యలను కలిగిస్తుంది.