Danam Nagender : దానం నాగేందర్ ఉదంతంపై హరీష్ రావు కీలక వ్యాఖ్యలు..

ఎమ్మెల్యే దానం నాగేందర్ అనర్హత కేసులో తెలంగాణ హైకోర్టు ఇచ్చిన తీర్పు కాంగ్రెస్ ప్రభుత్వ ద్వంద్వ వైఖరిని ఎండగట్టిందని బీఆర్ఎస్ సీనియర్ నేత, మాజీ మంత్రి తన్నీరు హరీష్ రావు విమర్శించారు. కాంగ్రెస్ పార్టీ , ఆ పార్టీ అగ్రనేత రాహుల్ గాంధీ రాజ్యాంగ పరిరక్షణపై అవలంబిస్తున్న తీరును ఎక్స్ (X) వేదికగా ఆయన తీవ్రంగా తప్పుపట్టారు.

ప్రజల తీర్పుకు విరుద్ధంగా వ్యవహరించారు

దానం నాగేందర్ బీఆర్ఎస్ అభ్యర్థిగా గెలిచి కాంగ్రెస్‌లో చేరారని, ఆ తర్వాత కాంగ్రెస్ తరఫున లోక్‌సభ ఎన్నికల్లో పోటీ చేస్తూనే ఎమ్మెల్యేగా కొనసాగారని హరీష్ రావు గుర్తుచేశారు. ప్రజలిచ్చిన తీర్పు పవిత్రతను కాపాడాల్సిన బాధ్యతను విస్మరించి, స్పీకర్ నిర్ణయం ద్వారా ఆయనకు రక్షణ కల్పించే ప్రయత్నం చేశారని ఆరోపించారు. ఈ వ్యవహారంలో స్పీకర్ వ్యవహరించిన తీరుపై హైకోర్టు జోక్యం చేసుకోవడం కాంగ్రెస్ ప్రభుత్వానికి తీరని మచ్చగా మిగిలిందని అన్నారు.

రాహుల్ గాంధీ హామీలు ఏమైనట్లు?

దేశవ్యాప్తంగా తిరుగుతూ రాజ్యాంగ పరిరక్షకుడిగా చెప్పుకునే రాహుల్ గాంధీ, తమ 2024 ఎన్నికల మేనిఫెస్టోలో పదవ షెడ్యూల్‌ను సవరించి పార్టీ ఫిరాయింపులకు పాల్పడితే స్వయంచాలకంగా అనర్హత వేటు వేస్తామని హామీ ఇచ్చిన విషయాన్ని హరీష్ రావు ప్రస్తావించారు. అయితే తమ పార్టీ ప్రయోజనాలకు అనుగుణంగా ఫిరాయింపులు జరిగినప్పుడు ఆ రాజ్యాంగ నిబద్ధత ఎక్కడికి పోతుందని ఆయన నిలదీశారు. కాంగ్రెస్ పార్టీకి, రాహుల్ గాంధీకి రాజ్యాంగం పట్ల ఉన్న నిబద్ధత నిజమైనదా లేక రాజకీయ అవసరాలకు తగినట్లు మారే అవకాశవాదమా అని ప్రశ్నించారు.

ఫిరాయించిన ఎమ్మెల్యేలతో రాజీనామా చేయించాలి

హైకోర్టు వెలువరించిన తీర్పును దృష్టిలో ఉంచుకుని, స్పీకర్ కనీసం ఇప్పటికైనా ఫిరాయించిన ఇతర ఎమ్మెల్యేలపై ఉన్న అనర్హత పిటిషన్ల విషయంలో చట్ట ప్రకారం స్పందించాలని హరీష్ రావు కోరారు. రాహుల్ గాంధీకి రాజ్యాంగ పరిరక్షణపై నిజమైన నిబద్ధత ఉంటే, కాంగ్రెస్‌లో చేరిన ఎమ్మెల్యేలందరిచేత వెంటనే రాజీనామా చేయించి, కొత్తగా ప్రజా తీర్పు కోరేలా ముఖ్యమంత్రి రేవంత్ రెడ్డిని ఆదేశించాలని ఆయన డిమాండ్ చేశారు.