CM Revanth Reddy: తెలంగాణ నుంచి పోటీ చేయండి.. సోనియా గాంధీని కోరిన రేవంత్‌రెడ్డి..

CM Revanth Reddy: హస్తినకు వెళ్లిన తెలంగాణ ముఖ్యమంత్రి రేవంత్‌ రెడ్డి, డిప్యూటీ సీఎం మల్లు భట్టి విక్రమార్క, మంత్రి పొంగులేటి శ్రీనివాస్‌ రెడ్డి.. సీపీపీ ఛైర్మన్ సోనియా గాంధీని కలిసిశారు.. తెలంగాణలో కాంగ్రెస్‌ ప్రభుత్వం ఏర్పడిన తర్వాత.. రేవంత్‌, భట్టి.. సోనియాను కలవడం ఇదే తొలిసారి.. ఇక, రాష్ట్రంలో కాంగ్రెస్‌ ప్రభుత్వ పాలన, అమలు చేస్తోన్న పథకాల గురించి ఆమెకు వివరించారు.. అంతేకాదు.. రానున్న లోక్‌స‌భ ఎన్నిక‌ల్లో తెలంగాణ నుంచి పోటీ చేయాల‌ని కాంగ్రెస్ పార్లమెంట‌రీ పార్టీ ఛైర్‌ప‌ర్సన్ సోనియా గాంధీకి విజ్ఞప్తి చేశారు.. తెలంగాణ నుంచి పోటీ చేయాల‌ని కోరుతూ ఇప్పటికే పీసీసీ తీర్మానించిన విష‌యాన్ని సోనియా గాంధీ దృష్టికి తీసుకెళ్లారు సీఎం రేవంత్‌రెడ్డి.. తెలంగాణ ఇచ్చిన త‌ల్లిగా రాష్ట్ర ప్రజ‌లు గుర్తిస్తున్నందున రాష్ట్రం నుంచి పోటీ చేయాల‌ని కోరుతున్నట్లు చెప్పారు. ఇక, దీనిపై స్పందించిన సోనియా గాంధీ స‌రైన స‌మ‌యంలో నిర్ణయం తీసుకుంటాన‌ని తెలిపారు.

Read Also: Teja Sajja : ‘హనుమాన్’ మూవీ కోసం ఏకంగా 75 సినిమాలు వదులుకున్నా..

ఈ రోజు ఢిల్లీ వెళ్లిన సీఎం రేవంత్‌రెడ్డి.. న్యూఢిల్లీలోని సోనియా గాంధీ అధికారిక నివాసం 10 జ‌న్‌ప‌థ్‌లో క‌లిశారు. ముఖ్యమంత్రి వెంట ఉప ముఖ్యమంత్రి భ‌ట్టి విక్రమార్క, రాష్ట్ర రెవెన్యూ, స‌మాచార‌, ప్రసార శాఖ‌ల మంత్రి పొంగులేటి శ్రీ‌నివాస్ రెడ్డి ఉన్నారు. ఈ సంద‌ర్భంగా రాష్ట్ర ప్రభుత్వం అమ‌లు చేస్తున్న హామీల‌ను సోనియాగాంధీకి వివరించారు సీఎం రేవంత్‌.. ఎన్నిక‌లకు ముందు ఇచ్చిన ఆరు హామీల్లో మ‌హిళ‌ల‌కు ఉచిత బ‌స్సు ప్రయాణం, రాజీవ్ ఆరోగ్యశ్రీ ప‌రిమితిని రూ.5 ల‌క్షల నుంచి రూ.15 ల‌క్షలకు పెంచ‌డాన్ని అమ‌లు చేస్తున్నామ‌ని వివ‌రించారు. ఇప్పటికే ఆర్టీసీ బస్సుల్లో 14 కోట్ల మంది మ‌హిళ‌లు ఉచిత ప్రయాణం చేశార‌ని తెలిపారు. ఇక, రూ.500కే గ్యాస్ సిలెండ‌ర్ అంద‌జేత‌, 200 యూనిట్ల వ‌ర‌కు విద్యుత్ ఉచిత స‌ర‌ఫ‌రా అమ‌లుకు నిర్ణయం తీసుకున్నామ‌ని సోనియాకి తెలియ‌జేశారు. మరోవైపు, బీసీ కుల గ‌ణ‌న చేప‌ట్టాల‌ని నిర్ణయించామ‌ని, ఇందుకు సంబంధించి స‌న్నాహాలు చేస్తున్నామ‌ని సోనియా గాంధీకి సీఎం రేవంత్ రెడ్డి తెలిపారు. రానున్న లోక్‌స‌భ ఎన్నిక‌ల్లో రాష్ట్రంలో అత్యధిక స్థానాలు సాధించేందుకు వీలుగా ప్రయ‌త్నిస్తున్నామ‌ని, ఇందుకు సంబంధించి ఇప్పటికే అన్ని ర‌కాలుగా స‌న్నాహాలు పూర్తి చేసిన‌ట్లు సోనియాకి వివరించారు.. ఈ క్రమంలోనే ప్రతి లోక్‌స‌భ నియోజ‌క‌వ‌ర్గం నుంచి ఆశావాహుల నుంచి ద‌ర‌ఖాస్తులు స్వీక‌రించామ‌ని, వాటిపై పూర్తిస్థాయిలో క‌స‌ర‌త్తు చేసి బ‌ల‌మైన అభ్యర్థుల‌ను ఎంపిక చేస్తామ‌ని పార్టీ అధినేత్రికి వివరించారు సీఎం రేవంత్‌రెడ్డి.