Duvvada Madhuri : త్రిష కోరికతో పాటు నా కోరిక కూడా నెరవేరింది

ఏపీ రాజకీయాలు ఫాలో అయ్యే అందరికీ, బిగ్ బాస్ ఫాలో అయ్యే అందరికీ సుపరిచితమైన పేరు దువ్వాడ మాధురి. ఆమె తన ఇన్‌స్టాగ్రామ్ వేదికగా చేసిన ఒక పోస్ట్ ఇప్పుడు రాజకీయ, సినీ వర్గాల్లో హాట్ టాపిక్‌గా మారింది. తమిళ నటుడు, తమిళగ వెట్రి కజగం (TVK) అధినేత విజయ్ రాజకీయ విజయాన్ని ఉద్దేశించి ఆమె చేసిన వ్యాఖ్యలు చర్చకు దారితీస్తున్నాయి. దువ్వాడ మాధురి తన స్టోరీలో నటి త్రిషను ప్రస్తావిస్తూ ఆసక్తికర వ్యాఖ్యలు చేశారు. “త్రిష కోరికతో పాటు, టీవీకే విజయ్ గెలవాలన్న నా కోరిక కూడా నెరవేరింది” అంటూ ఆమె రాసుకొచ్చారు. విజయ్ రాజకీయాల్లోకి రావడం, తన పార్టీని విజయపథంలో నడిపించడం పట్ల ఆమె తన సంతోషాన్ని వ్యక్తం చేశారు. విజయ్ ‘గారు’ అని సంబోధిస్తూ ఆయనకు అభినందనలు తెలియజేశారు. ప్రస్తుత సమాజంలో రాజకీయ నాయకులపై వస్తున్న వ్యక్తిగత విమర్శలపై ఆమె పరోక్షంగా సెటైర్లు వేశారు. రాజకీయం వేరు, వ్యక్తిగత జీవితం వేరు అని ఆమె బలంగా నొక్కి చెప్పారు. “వ్యక్తిగత జీవితానికీ (Personal life), రాజకీయాలకీ సంబంధం లేదు. వ్యక్తిగత జీవితంతో రాజకీయాలు ముడిపడి ఉంటే, ఈ ప్రపంచంలో ఎవరూ రాజకీయాలు చేయలేరు.”

ఈ మాటల వెనుక తమ వ్యక్తిగత అనుభవం కూడా ఉందని విశ్లేషకులు భావిస్తున్నారు. రాజకీయాల్లో ఉన్న వారిని వ్యక్తిగత విషయాల్లో టార్గెట్ చేయడం సరికాదని, ఒక వ్యక్తి రాజకీయ సామర్థ్యాన్ని వారి వ్యక్తిగత జీవితంతో ముడిపెట్టి చూడకూడదని ఆమె అభిప్రాయపడ్డారు. రాజకీయ నేతలు కూడా మనుషులేనని, వారి వ్యక్తిగత విషయాలను రాజకీయం కోసం వాడుకోవడం ప్రజాస్వామ్యానికి మంచిది కాదని ఆమె ఆవేదన ఈ పోస్ట్‌లో కనిపిస్తోంది. దువ్వాడ మాధురి పెట్టిన ఈ పోస్ట్ ఇప్పుడు నెట్టింట చక్కర్లు కొడుతోంది. కొందరు ఆమె మాటలతో ఏకీభవిస్తుంటే, మరికొందరు ఆమె త్రిష పేరును ఎందుకు ప్రస్తావించాల్సి వచ్చిందనే కోణంలో చర్చించుకుంటున్నారు.