Stock Market Crash: స్టాక్ మార్కెట్‌లో భారీ పతనం.. నేడు ఒక్కరోజే రూ.4 లక్షల కోట్లకు పైగా ఆవిరి..

Stock Market Crash: ఈరోజు స్టాక్ మార్కెట్‌లో ఇన్వెస్టర్లకు తీవ్ర నష్టాలు ఎదురయ్యాయి. వారం ఆరంభం నుంచి ఊగిసలాడుతున్న మార్కెట్, గురువారం నాటి ట్రేడింగ్‌లో ఒక్కసారిగా కుప్పకూలింది. ఉదయం భారీ నష్టాలతో మొదలైన సెన్సెక్స్, నిఫ్టీలు.. సమయం గడిచే కొద్దీ మరీ దారుణంగా పడిపోయాయి. మార్కెట్ ముగిసే సమయానికి బొంబాయి స్టాక్ ఎక్స్ఛేంజ్ సూచీ సెన్సెక్స్ ఏకంగా 1,247 పాయింట్లు పతనమై 73,580 స్థాయి వద్ద స్థిరపడింది. ఇక నేషనల్ స్టాక్ ఎక్స్ఛేంజ్ సూచీ నిఫ్టీ కూడా ఏమాత్రం కోలుకోలేక 383 పాయింట్లు నష్టపోయి 23,063 వద్ద ముగిసింది. ఈ భారీ పతనం వల్ల ఒక్క రోజే ఇన్వెస్టర్ల సంపద రూ.4 లక్షల కోట్లకు పైగా ఆవిరైపోయింది. ఉదయం నుంచే మార్కెట్లో అమ్మకాల ఒత్తిడి స్పష్టంగా కనిపించింది. క్రితం రోజు 74,828 వద్ద ముగిసిన సెన్సెక్స్, ఆరంభంలోనే భారీ పతనంతో 74,272 వద్ద మొదలైంది. ఆ తర్వాత కొనుగోళ్ల మద్దతు లేకపోవడంతో మరింత దిగజారి, చివరికి 1.67 శాతం అనగా 1,247 పాయింట్ల నష్టంతో 73,580.54 వద్ద క్లోజ్ అయింది. నిఫ్టీ పరిస్థితి కూడా ఇలాగే సాగింది. బుధవారం 23,446 వద్ద ముగిసిన నిఫ్టీ, గురువారం 23,221 వద్ద ప్రారంభమై.. చివరికి 1.64 శాతం అనగా 283.70 పాయింట్లు క్షీణించి 23,063.10 వద్ద ఆగిపోయింది.

ఈ పతనం ఇన్వెస్టర్ల జేబులకు పెద్ద కన్నమే వేసింది. బీఎస్ఈలో లిస్ట్ అయిన కంపెనీల మొత్తం మార్కెట్ క్యాపిటలైజేషన్ (BSE MCap) ఆధారంగా ఈ నష్టాన్ని అంచనా వేయవచ్చు. అంతకంటే ముందు రోజు బీఎస్ఈ మార్కెట్ క్యాప్ రూ. 4,85,01,353.85 కోట్లుగా ఉంటే, గురువారం నాటి పతనం తర్వాత అది రూ. 4,80,99,180.54 కోట్లకు పడిపోయింది. ఒక్క రోజులోనే ఇన్వెస్టర్లకు సంబంధించిన దాదాపు రూ. 4,02,173 కోట్లు బూడిదలో పోసిన పన్నీరయ్యాయి. సూచీలు మాత్రమే కాకుండా ప్రధాన కంపెనీల షేర్లు కూడా భారీగా నష్టపోయాయి. ముఖ్యంగా బీఎస్ఈ మిడ్‌క్యాప్‌లో ఉన్న ‘పాలసీ బజార్’ షేరు ఏకంగా 35.98 శాతం కుప్పకూలి ఇన్వెస్టర్లకు చుక్కలు చూపించింది. వీటితో పాటు MFSL షేరు 9.81 శాతం, ఏయూ బ్యాంక్ 4.95 శాతం, ఐడీఎఫ్‌సీ ఫస్ట్ బ్యాంక్ 4.70 శాతం చొప్పున పతనమై తీవ్ర నష్టాలతో ముగిశాయి.