NSE Listing: బీఎస్ఈలో ఎన్ఎస్ఈ గ్రాండ్ ఎంట్రీ.. లిస్టింగ్ అయిన గంటలోనే కోటి షేర్లు ట్రేడ్!

NSE Listing: స్టాక్ మార్కెట్లో రక్తపాతం నడుస్తున్న వేళ.. ఒకే ఒక్క స్టాక్ మాత్రం దలాల్ స్ట్రీట్‌ మొత్తాన్ని తనవైపు తిప్పుకుంది. దేశీయ మార్కెట్లు నష్టాల్లో కూరుకుపోతున్న తరుణంలో, భారత అతిపెద్ద స్టాక్ ఎక్స్ఛేంజ్ ‘నేషనల్ స్టాక్ ఎక్స్ఛేంజ్’ (NSE) సరికొత్త చరిత్ర లిఖించింది. బీఎస్ఈ వేదికగా లిస్టయిన క్షణాల్లోనే అద్భుత రికార్డులను తిరగరాసి ఔరా అనిపించింది. కేవలం ఒకే ఒక్క అడుగుతో దేశంలోనే అత్యంత విలువైన టాప్-10 కంపెనీల ఎలైట్ క్లబ్‌లోకి దూసుకెళ్లి దిగ్గజ కార్పొరేట్ సంస్థలనే విస్మయానికి గురిచేసింది.

రూ. 4.56 లక్షల కోట్ల మార్కెట్ క్యాప్..

బీఎస్ఈలో అడుగుపెట్టిన వెంటనే ఎన్ఎస్ఈ మార్కెట్ విలువ ఏకంగా రూ. 4.56 లక్షల కోట్లకు చేరింది. ఈ దూకుడుతో హిందుస్థాన్ యూనిలీవర్ (HUL), ఇన్ఫోసిస్, కోటక్ మహీంద్రా బ్యాంక్, సన్ ఫార్మా, టైటాన్ వంటి దశాబ్దాల చరిత్ర కలిగిన బడా కంపెనీల మార్కెట్ క్యాప్‌ను వెనక్కి నెట్టి, భారత్‌లోనే 10వ అత్యంత విలువైన కంపెనీగా NSE అవతరించడం విశేషం. మార్కెట్లు తీవ్ర ఒడిదుడుకుల్లో ఉన్న సమయంలోనూ ఈ ఘనత సాధించడం ట్రేడ్ వర్గాల్లో హాట్ టాపిక్‌గా మారింది. ఎన్ఎస్ఈ ఐపీవో ఇష్యూ ధర రూ.1,785 కాగా, బీఎస్ఈలో రూ.1,800 వద్ద నామమాత్రపు ప్రీమియంతో (1% కంటే తక్కువ) లిస్టయింది. అయితే ఆ తర్వాత కొనుగోళ్ల జోరు అనూహ్యంగా పుంజుకుంది. నిమిషాల వ్యవధిలోనే స్టాక్ దాదాపు 5 శాతం ఎగబాకి గరిష్టంగా రూ.1,878 స్థాయిని తాకింది. ఆ తర్వాత కాస్త స్థిరపడి 3.36 శాతం లాభంతో రూ. 1,845 వద్ద ట్రేడింగ్ కొనసాగించింది. అన్నింటి కంటే పెద్ద సెన్సేషన్ ఏమిటంటే.. లిస్టింగ్ అయిన ఫస్ట్ గంటలోనే దాదాపు కోటి (9.8 మిలియన్లు) ఎన్ఎస్ఈ షేర్లు చేతులు మారాయి. ఒక్క గంట వ్యవధిలోనే దాదాపు రూ.1,800 కోట్ల విలువైన ట్రేడింగ్ వాల్యూమ్ నమోదు కావడం మార్కెట్ చరిత్రలోనే అరుదైన రికార్డుగా నిలిచిందని చెబుతున్నారు.

ఐపీవో విశేషాలు
సెప్టెంబర్ 17 నుంచి 21 వరకు సాగిన రూ.22,569 కోట్ల విలువైన ఈ మెగా ఐపీవో 5.71 రెట్లు సబ్‌స్క్రైబ్ అయింది. ఇందులో క్యూఐబీ విభాగం 12.68 రెట్లు, ఎన్ఐఐ విభాగం 6.55 రెట్లు రెస్పా్న్స్ దక్కించుకోగా, రిటైల్ కేటగిరీ 1.39 రెట్లు స్పందించింది. ఆఫర్ ఫర్ సేల్ విధానంలో భాగంగా దాదాపు 12.64 కోట్ల షేర్లను విక్రయించడం ద్వారా ఎన్ఎస్ఈ పబ్లిక్ లిమిటెడ్ కంపెనీగా సరికొత్త శకానికి నాంది పలికింది. మార్కెట్ నష్టాల సుడిగుండంలో ఉన్నప్పటికీ, ఎన్ఎస్ఈ నమోదు చేసిన ఈ రికార్డు ఎంట్రీ ఇన్వెస్టర్లలో కొత్త ఉత్సాహాన్ని నింపింది.