Pakistan: పాకిస్థాన్‌లో బాంబు పేలుడు.. ఇమ్రాన్‌ ఖాన్ పార్టీకి చెందిన ముగ్గురు మృతి

Pakistan: పాకిస్థాన్‌లోని బలూచిస్థాన్ ప్రాంతంలో మంగళవారం జరిగిన బాంబు పేలుడులో పాకిస్థాన్ మాజీ ప్రధాని ఇమ్రాన్ ఖాన్ పార్టీ పాకిస్థాన్ తెహ్రీక్-ఇ-ఇన్సాఫ్ (పీటీఐ)కి చెందిన ముగ్గురు సభ్యులతో సహా నలుగురు వ్యక్తులు మంగళవారం మరణించారు. ఇమ్రాన్ ఖాన్‌కు పదేళ్ల జైలు శిక్ష విధించిన కొన్ని గంటల తర్వాత పార్టీ నిర్వహించిన ర్యాలీలో పేలుడు సంభవించింది. పీటీఐకి చెందిన ముగ్గురు ప్రాణాలు కోల్పోయారని, ఏడుగురు గాయపడ్డారని ఆ పార్టీ ప్రొవిన్షియల్‌ జనరల్ సెక్రటరీ సలార్ ఖాన్ కాకర్ ట్విట్టర్‌ వేదికగా వీడియో సందేశంలో తెలిపారు.

Read Also: Jaswant Singh: కేంద్ర మాజీ మంత్రి జస్వంత్ సింగ్‌ ఇంట్లో విషాదం

అయితే, పేలుడులో ఐదుగురు గాయపడ్డారని సిబిలోని జిల్లా హెడ్‌క్వార్టర్స్ హాస్పిటల్ మెడికల్ సూపరింటెండెంట్ డాక్టర్ బాబర్ పాకిస్తాన్ డాన్ వార్తాపత్రికతో చెప్పారు. గాయపడిన వ్యక్తులను ఆసుపత్రికి తీసుకెళ్లారు. వారిలో చాలా మంది పరిస్థితి విషమంగా ఉందని, మృతుల సంఖ్య పెరిగే అవకాశం ఉందని అధికారులు తెలిపారు. బలూచిస్తాన్‌లోని సిబి ప్రాంతంలో బాంబు పేలుడు సంభవించిన వీడియో లభించింది. పెద్ద శబ్దం వినిపించడంతో పీటీఐ సభ్యులు పెనుగులాడుతున్నట్లు కనిపించింది. పార్టీ బలపరిచిన అభ్యర్థి సద్దాం తరీన్ నిర్వహించిన ఎన్నికల ర్యాలీలో పేలుడు సంభవించిందని పీటీఐ నేత సలార్ ఖాన్ కాకర్ తెలిపారు. ‘ఈ హృదయ విదారక సంఘటనను మేము తీవ్రంగా ఖండిస్తున్నాము. పీటీఐ కార్యకర్తలకు బదులుగా ఉగ్రవాదులను అణచివేయడంపై దృష్టి పెట్టాలని డిమాండ్ చేస్తున్నాము” అని ఆయన చెప్పారు.

ఫిబ్రవరి 8న సాధారణ ఎన్నికలకు కేవలం తొమ్మిది రోజుల ముందు పేలుడు సంభవించింది. ఈ ఘటనపై నోటీసులు తీసుకున్నామని, బలూచిస్థాన్ చీఫ్ సెక్రటరీ, పోలీస్ చీఫ్‌ల నుంచి “తక్షణ నివేదిక” కోరామని పాకిస్తాన్ ఎన్నికల సంఘం తెలిపింది.