Gold Rate Today: బంగారం, వెండి ధరలకు రెక్కలు.. ఏకంగా రూ.10 వేలు!

Silver Price Surged in India on 2026 August 11: దేశీయ బులియన్ మార్కెట్‌లో బంగారం, వెండి ధరలు భారీగా పెరిగాయి. మంగళవారం (2026 ఆగస్టు 11) అంతర్జాతీయ మార్కెట్‌లో లోహాల ధరలు బలపడటంతో పాటు దేశీయ మార్కెట్‌లోనూ గోల్డ్, సిల్వర్ రేట్లు గణనీయంగా పెరిగాయి. గత మూడు రోజుల్లోనే బంగారం ధర రూ.6,600 మేర పెరగగా.. వెండి ధర కిలోకు రూ.16,200 వరకు పెరిగింది. పెరిగిన ధరలతో కొనుగోలు దారులు ఒక్కసారిగా షాక్ అవుతున్నారు.

24 క్యారెట్ల బంగారం రూ.1.55 లక్షలు:

తాజా పెరుగుదలతో 10 గ్రాముల 24 క్యారెట్ల బంగారం ధర రూ.1,55,130కు చేరింది. 24 క్యారెట్ల పసిడి ఈ ఒక్క రోజులోనే రూ.3,160 పెరిగింది. అదే సమయంలో 10 గ్రాముల 22 క్యారెట్ల బంగారం ధర రూ.2,900 పెరిగింది. దాంతో 22 క్యారెట్ల 10 గ్రాముల పసిడి ధర రూ.1,42,200కు చేరింది. పెళ్లిళ్లు, శుభకార్యాల కోసం బంగారం కొనుగోలు చేయాలనుకునే వారిపై ధరల ప్రభావం మరింత పెరగనుంది.

వెండి ధర కూడా భారీగా పెరుగుదల:

బంగారంతో పాటు వెండి ధరలు కూడా భారీగా దూసుకెళ్లాయి. కిలో వెండిపై ఏకంగా రూ.10,000 పెరిగి.. రూ.2.60 లక్షలకు చేరింది. అంతర్జాతీయంగా వెండి ధరల్లో వచ్చిన మార్పు, భౌగోళిక అంశాలు దేశీయ మార్కెట్‌పై ప్రభావం చూపుతున్నాయి. తాజా మార్కెట్ పరిణామాల్లో అమెరికా ద్రవ్యోల్బణ గణాంకాలపై పెట్టుబడిదారుల దృష్టి ఉండటంతో.. లోహాల్లో పెరుగుదల ఎక్కువగా ఉంది. మంగళవారం అంతర్జాతీయ మార్కెట్‌లో బంగారం రెండు నెలలకు పైగా గరిష్ఠ స్థాయిని తాకిన తర్వాత స్వల్పంగా వెనక్కి తగ్గింది.

ఎందుకు పెరుగుతున్నాయి?:

అమెరికా వడ్డీ రేట్లపై అంచనాలు, డాలర్ కదలికలు, అంతర్జాతీయ ఆర్థిక అనిశ్చితి, భౌగోళిక ఉద్రిక్తతలు వంటి అంశాలు బంగారం ధరలపై ప్రభావం చూపుతున్నాయి. ముఖ్యంగా పెట్టుబడిదారులు అనిశ్చిత పరిస్థితుల్లో బంగారాన్ని సురక్షిత పెట్టుబడి సాధనంగా పరిగణించడం కూడా ధరలకు మద్దతుగా నిలుస్తోంది. నగల దుకాణాల్లో వినియోగదారులు చెల్లించే తుది ధరలో బంగారం ప్రాథమిక రేటుతో పాటు జీఎస్టీ, మేకింగ్ ఛార్జీలు, ఇతర స్థానిక ఛార్జీలు కూడా ఉండవచ్చని గుర్తుంచుకోవాలి. అందువల్ల ఆభరణాల కొనుగోలు సమయంలో స్థానిక జువెల్లర్ వద్ద తాజా రేటును తప్పనిసరిగా నిర్ధారించుకోవాలి.