Virat Kohli Anushka: లండన్‌లో ఉన్నా భారత్‌లో పెట్టుబడులు.. మరో లగ్జరీ ఇల్లు సొంతం చేసుకున్న విరాట్, అనుష్క

Virat Kohli Anushka: క్రికెట్ స్టార్ విరాట్ కోహ్లీ, బాలీవుడ్ నటి అనుష్క శర్మ మరోసారి తమ రియల్ ఎస్టేట్ పెట్టుబడులతో వార్తల్లో నిలిచారు. దేశంలోని ప్రీమియం ప్రాపర్టీలపై ఎప్పటి నుంచో ఆసక్తి చూపుతున్న ఈ సెలబ్రిటీ జంట తాజాగా ముంబైలో మరో ఖరీదైన లగ్జరీ అపార్ట్‌మెంట్‌ను కొనుగోలు చేసింది. గత కొంతకాలంగా లండన్‌లో ఎక్కువ సమయం గడుపుతున్నప్పటికీ, భారతదేశంలో పెట్టుబడుల విషయంలో మాత్రం ఎలాంటి వెనుకడుగు వేయడం లేదని ఈ తాజా డీల్ మరోసారి స్పష్టం చేసింది. ముంబైలోని ప్రముఖ ప్రాంతమైన వెర్సోవాలో 18.29 కోట్ల విలువైన విలాసవంతమైన అపార్ట్‌మెంట్‌ను విరాట్, అనుష్క కొనుగోలు చేశారు. సుమారు 2,644 చదరపు అడుగుల విస్తీర్ణంలో ఉన్న ఈ అపార్ట్‌మెంట్ ఒక ప్రీమియం రెసిడెన్షియల్ ప్రాజెక్ట్‌లో ఉంది. ఈ డీల్‌లో రెండు కార్ పార్కింగ్ స్లాట్‌లు కూడా ఉన్నాయి. ముంబైలో అత్యంత డిమాండ్ ఉన్న ప్రాంతాల్లో వెర్సోవా ఒకటిగా ఉండటంతో ఈ పెట్టుబడి ప్రాధాన్యం సంతరించుకుంది.

ఇది ఈ జంట చేసిన తొలి రియల్ ఎస్టేట్ పెట్టుబడి కాదు. ఇప్పటికే వర్లీలో సముద్రానికి దగ్గరగా ఉన్న అత్యంత విలాసవంతమైన నివాసాన్ని వీరు కలిగి ఉన్నారు. అలాగే అలీబాగ్‌లో లగ్జరీ విల్లాను కూడా కొనుగోలు చేశారు. ఈ రెండింటితో పాటు ఇతర ఆస్తులను కూడా కలుపుకుంటే, విరాట్, అనుష్కల రియల్ ఎస్టేట్ పోర్ట్‌ఫోలియో విలువ భారీ స్థాయిలో ఉన్నట్లు తెలుస్తోంది. ఇటీవల కాలంలో ఈ జంట తమ పిల్లలతో కలిసి లండన్‌లో ఎక్కువ సమయం గడుపుతున్నట్లు వార్తలు వస్తున్నాయి. అయినప్పటికీ, భారతదేశంలోని ప్రీమియం రియల్ ఎస్టేట్ మార్కెట్‌పై వారి నమ్మకం ఏమాత్రం తగ్గలేదని తాజా కొనుగోలు సూచిస్తోంది. దీర్ఘకాలిక పెట్టుబడుల విషయంలో విరాట్ కోహ్లీ ఎప్పటినుంచో ఆసక్తి చూపుతుండగా, అనుష్క శర్మ కూడా సినిమా ప్రాజెక్టులను తగ్గించిన తర్వాత ఆర్థిక నిర్ణయాలను ఎంతో జాగ్రత్తగా తీసుకుంటున్నట్లు పరిశ్రమ వర్గాలు పేర్కొంటున్నాయి.

ఇక వృత్తిపరంగా చూస్తే, విరాట్ కోహ్లీ ఇటీవల టెస్ట్ క్రికెట్‌కు వీడ్కోలు పలికినా, వన్డేలు, టీ20లు, ఇండియన్ ప్రీమియర్ లీగ్‌లో తన ప్రయాణాన్ని కొనసాగిస్తున్నారు. మరోవైపు, అనుష్క శర్మ ప్రస్తుతం సినిమాలకు దూరంగా ఉంటూ ఫ్యామిలీ లైఫ్ కే ఎక్కువ ఇంపార్టెన్స్ ఇస్తున్నారు. అయినప్పటికీ, పెట్టుబడుల విషయంలో మాత్రం ఈ జంట చురుకుగా వ్యవహరిస్తూ తమ ఆస్తులను మాత్రం మరింత పోగేసుకుంటోంది.