Jio Voice Only Plans: జియో యూజర్లకు గుడ్ న్యూస్.. రూ.147 నుంచే వాయిస్ ఓన్లీ ప్లాన్స్! వ్యాలిడిటీ వివరాలివే!

Jio Voice Only Plans: దేశీయ టెలికాం రంగంలో ప్రముఖ సంస్థ రిలయన్స్ జియో వినియోగదారుల కోసం కొత్త వాయిస్ ఓన్లీ (Voice Only) ప్రీపెయిడ్ రీఛార్జ్ ప్లాన్లను అందుబాటులోకి తీసుకొచ్చింది. ఇంటర్నెట్ డేటా అవసరం లేకుండా కేవలం కాలింగ్, ఎస్ఎంఎస్ సేవలు మాత్రమే ఉపయోగించుకునే వారికి ఈ ప్లాన్లు ఉపయోగపడనున్నాయి. ఈ కొత్త ప్లాన్ల ధరలు రూ.147 నుంచి ప్రారంభమవుతున్నాయి.

టెలికాం రంగ నియంత్రణ సంస్థ ట్రాయ్ (TRAI) సూచనల నేపథ్యంలో జియో ఈ ప్రత్యేక రీఛార్జ్ ప్లాన్లను ప్రవేశపెట్టింది. ఇప్పటికే ఎయిర్‌టెల్ కూడా వాయిస్ ఓన్లీ ప్లాన్లను అందుబాటులోకి తీసుకొచ్చింది. ఇప్పుడు జియో కూడా ఇదే తరహాలో ప్రత్యేక ప్లాన్లను తీసుకురావడంతో డేటా అవసరం లేని వినియోగదారులకు మరిన్ని ఆప్షన్స్ లభించనున్నాయి.

జియో వాయిస్ ఓన్లీ రీఛార్జ్ ప్లాన్ల ధరలు

జియో తన వాయిస్ ఓన్లీ ప్లాన్లను వేర్వేరు వ్యాలిడిటీ ఆప్షన్లతో అందిస్తోంది. తక్కువ రోజుల నుంచి దాదాపు ఏడాది వరకు వ్యాలిడిటీ ఉండే ప్లాన్లు ఉన్నాయి.

రూ.147 – 22 Days వ్యాలిడిటీ 300 SMS
రూ.177 – 28 Days వ్యాలిడిటీ 300 SMS
రూ.196 – 30 Days వ్యాలిడిటీ 300 SMS
రూ.197 – 1 Calendar Month వ్యాలిడిటీ 300 SMS
రూ.448 – 84 Days వ్యాలిడిటీ 1,000 SMS
రూ.1,748 – 336 Days వ్యాలిడిటీ 3,600 SMS

ఈ ప్లాన్లలో దేశవ్యాప్తంగా అన్‌లిమిటెడ్ వాయిస్ కాలింగ్ సదుపాయం ఉంటుంది. అయితే వీటిలో మొబైల్ ఇంటర్నెట్ డేటా అందుబాటులో ఉండదు. కొన్ని ఎంపిక చేసిన ప్లాన్లతో జియో టీవీ, జియో ఏఐ క్లౌడ్ వంటి అదనపు సేవలు కూడా లభించనున్నాయి.

ఎవరికి ఈ ప్లాన్లు ఉపయోగపడతాయి?

ప్రధానంగా ఇంటర్నెట్ డేటా అవసరం లేని వినియోగదారులను దృష్టిలో పెట్టుకుని జియో ఈ ప్లాన్లను రూపొందించింది.

ఫీచర్ ఫోన్లు ఉపయోగించే వారికి.
ప్రధానంగా ఫోన్ కాల్స్ కోసం సిమ్ వినియోగించే వారికి.
రెండో సిమ్ కార్డును యాక్టివ్‌గా ఉంచుకోవాలనుకునే వారికి.
ఇంటర్నెట్ కోసం ఎక్కువగా వైఫైపై ఆధారపడే వారికి.
మొబైల్ డేటా అవసరం లేకుండా కాలింగ్, SMS మాత్రమే ఉపయోగించేవారికి.

సాధారణ ప్రీపెయిడ్ ప్లాన్లలో కాలింగ్‌తో పాటు రోజువారీ లేదా నిర్దిష్ట పరిమాణంలో డేటా కూడా ఉంటుంది. అయితే డేటా ఉపయోగించని వినియోగదారులు కూడా ఆ డేటా కోసం డబ్బు చెల్లించాల్సి వచ్చేది. కొత్త వాయిస్ ఓన్లీ ప్లాన్లతో అలాంటి అదనపు ఖర్చును తగ్గించుకునే అవకాశం ఉంటుంది.