Asia Cup 2023 IND vs PAK Super-4 Match on September 10: ఆసియా కప్ 2023లో పసికూన నేపాల్‌పై విజయం సాధించిన భారత్ సూపర్-4కు అర్హత సాధించింది. డక్‌వర్త్ లూయిస్ పద్దతి ప్రకారం లక్ష్యాన్ని 23 ఓవర్లలో 145గా నిర్ణయించగా.. 20.1 ఓవర్లలో వికెట్‌ నష్టపోకుండా ఛేదించింది. ఈ విజయంతో ఆసియా కప్ సూపర్-4కు క్వాలిఫై అయిన భారత్.. మరోసారి దాయాది పాకిస్థాన్‌తో తలపడనుంది. ఆసియా కప్ 2023లో భాగంగా సెప్టెంబర్ 10న భారత్, పాకిస్తాన్ మ్యాచ్ జరగనుంది.
గత శనివారం (సెప్టెంబర్ 2) జరిగిన ఇండో-పాక్ మ్యాచ్ వర్షం కారణంగా రద్దయిన విషయం తెలిసిందే. భారత్ బ్యాటింగ్ అనంతరం వరుణుడు రావడంతో పాక్ ఇన్నింగ్స్‌లో ఒక్క బంతి కూడా పడలేదు. దాంతో భారత్, పాకిస్తాన్ మ్యాచ్ అసలైన మజాను ఫాన్స్ మిస్ అయ్యారు. సూపర్-4లో భాగంగా దాయాదీ దేశాలు వచ్చే ఆదివారం 10న తలపడనున్నాయి. ఈ మ్యాచ్ కోసం అభిమానులు ఎదురుచూస్తున్నారు.
Also Read: World Cup 2023: నేడు భారత్ ప్రపంచకప్‌ జట్టు ప్రకటన.. తెలుగోడికి షాక్! ఊహించని ప్లేయర్ ఎంట్రీ
షెడ్యూల్ ప్రకారం.. భారత్, పాకిస్తాన్ మ్యాచ్ కొలంబో వేదికగా సెప్టెంబర్ 10న జరగాల్సి ఉంది. అయితే అక్కడ భారీ వర్షాలు కురిసే అవకాశం ఉందని వాతవారణ శాఖ పేర్కొంది. ఈ నేపథ్యంలో ఈ మ్యాచ్ తరలించే అంశంపై ఏసీసీ ఆలోచనలు చేస్తోంది. పల్లెకెలె లేదా దంబుల్లాకు ఇండో-పాక్ మ్యాచ్ తరలించే అవకాశం ఉంది. ఈ మ్యాచ్ మాత్రమే కాదు సూపర్-4, ఫైనల్ మ్యాచ్ కూడా తరలిపోనున్నాయి. రెండు రోజుల్లో వేదికల తరలింపుపై ఏసీసీ తుది నిర్ణయం వెల్లడించనుంది.
