Sandeep Patil: రోహిత్, కోహ్లీ లేకపోయినా టీమిండియాకు నష్టమేమీ లేదు.. మాజీ సెలెక్టర్ ఆసక్తికర వ్యాఖ్యలు..

Sandeep Patil: భారత క్రికెట్‌లో రోహిత్ శర్మ, విరాట్ కోహ్లీల స్థానాన్ని ఎవరైనా భర్తీ చేయగలరా? ఈ ఇద్దరూ పక్కకు తప్పుకుంటే టీమిండియా పరిస్థితి ఏంటి? అనే ప్రశ్నలు అభిమానుల్లో తరచూ మెదులుతూనే ఉంటాయి. అయితే, వారు లేకపోయినా భారత జట్టుకు ఎలాంటి డోకా లేదని, రాబోయే తరంతో టీమిండియా భవిష్యత్తు చాలా సురక్షితంగా ఉందని మాజీ సెలెక్టర్ సందీప్ పాటిల్ ధీమా వ్యక్తం చేశారు. ఇటీవల ‘స్పోర్ట్స్ నెక్స్ట్’కు ఇచ్చిన ఇంటర్వ్యూలో ఆయన ఈ ఆసక్తికర వ్యాఖ్యలు చేశారు. ప్రస్తుతం రోహిత్, విరాట్ కేవలం వన్డే ఫార్మాట్‌కే పరిమితమయ్యారు. టీ20, టెస్ట్ క్రికెట్‌లకు ఇప్పటికే వీడ్కోలు పలికిన ఈ దిగ్గజాలు, 2027లో దక్షిణాఫ్రికా, జింబాబ్వే, నమీబియా వేదికలుగా జరిగే వన్డే ప్రపంచకప్ వరకు ఆడతారనే ప్రచారం ఉంది. అయితే, వీరు ఎంతకాలం కొనసాగుతారనేది ప్రధానంగా వారి ఫిట్‌నెస్, ప్రస్తుత ఫామ్, జట్టులో కొనసాగాలనే వారి ఆసక్తిపై ఆధారపడి ఉంటుంది. వీటితో పాటు భవిష్యత్తు కోసం సెలెక్టర్ల వద్ద ఉన్న ప్రణాళికలు కూడా ఇక్కడ అత్యంత కీలకం.

ఈ సందర్భంగా పాటిల్ మాట్లాడుతూ.. అసలు ఆ ఇద్దరు ఆటగాళ్లకు ముందుకు సాగాలనే కోరిక ఉందో లేదో చూడాలని, వారు తమ ఫిట్‌నెస్‌ను కాపాడుకోగలరా లేదా అనేది ప్రశ్న అని పేర్కొన్నారు. మరోవైపు సెలెక్టర్ల ఆలోచనా విధానం ఏంటి? వారు రాబోయే కాలం కోసం ఎలా ప్లాన్ చేస్తున్నారనేది కూడా ముఖ్యమేనని అన్నారు. జట్టులోని సీనియర్ ఆటగాళ్లు ఒకవేళ దూరమైతే, వారి స్థానాన్ని నిలబెట్టగల సమర్థులైన ఆటగాళ్లు మనకు అందుబాటులో ఉన్నారా లేదా అని సెలెక్టర్లు ఎప్పుడూ ఆలోచిస్తూనే ఉండాలని ఆయన గుర్తుచేశారు. అయితే, భారత క్రికెట్‌లో ఉన్న అద్భుతమైన ‘బెంచ్ స్ట్రెంత్’ (రిజర్వ్ ఆటగాళ్ల బలం) చూస్తుంటే రోహిత్, కోహ్లీలు జట్టులో ఉన్నా లేకపోయినా టీమిండియాకు వచ్చే నష్టమేమీ ఉండదని, పెద్దగా ఇబ్బందులు ఎదురుకావని పాటిల్ వ్యాఖ్యానించారు. భారత యువ ఆటగాళ్లలో ఆ స్థాయిలో సత్తా ఉందని ఆయన నమ్ముతున్నారు.

ఇక, గత దశాబ్దానికి పైగా భారత క్రికెట్‌కు రోహిత్, విరాట్ వెన్నుముకగా నిలిచారు. ఎన్నో రికార్డులను తిరగరాస్తూ, అనేక ఐసీసీ టోర్నీల్లో భారత్‌ను ముందుండి నడిపించారు. రాబోయే 2027 వన్డే వరల్డ్ కప్ నాటికి యువ ఆటగాళ్లను జట్టులోకి తీసుకొస్తూ, వారికి మార్గనిర్దేశం చేసేందుకు ఈ సీనియర్ల అనుభవం ఎంతో ఉపయోగపడుతుంది. అదే సమయంలో, హఠాత్తుగా మార్పులు చేయకుండా ముందుగానే వారి స్థానాలను భర్తీ చేసే సరైన వారసులను గుర్తించి తీర్చిదిద్దడం సెలెక్టర్లకు ఉన్న అతిపెద్ద బాధ్యత. చివరకు పాటిల్ చెప్పొచ్చేదేంటంటే.. ఇది కేవలం ఇద్దరు దిగ్గజ ఆటగాళ్లను తప్పించి వేరొకరిని తీసుకోవడం మాత్రమే కాదు, టీమిండియా తర్వాతి తరాన్ని పూర్తిస్థాయిలో సిద్ధం చేయడం. ఏది ఏమైనా ఆఖరి నిర్ణయం రోహిత్, కోహ్లీల ఫిట్‌నెస్, ఫామ్, సెలెక్టర్ల దీర్ఘకాలిక వ్యూహాలపైనే ఆధారపడి ఉంటుంది. కానీ, దేశంలో ఉన్న అపారమైన ప్రతిభను చూస్తే, ఈ మార్పు ఎప్పుడు జరిగినా భారత క్రికెట్ ఏమాత్రం తడబడకుండా ముందుకు సాగుతుందనడంలో సందేహం లేదు.