TV Channel Editor Arrested: టీవీ ఛానెల్ ఎడిటర్ అరెస్ట్.. నుహ్ మత హింసపై తప్పుడు వార్త కథనాలు

TV Channel Editor Arrested: సోషల్‌ మీడియా ద్వారా ప్రచారం త్వరగా చేయాలని భావిస్తున్న వారు ఎక్కువ మంది ఉన్నారు. అలాగే టీవీ ఛానల్స్ కూడా తమ ఛానల్‌లోనే మొదటిసారి రావాలనే ఆతృతతో పూర్తిస్థాయిలో సమాచారం తెలుసుకోకుండానే వార్త కథనాలను కొన్ని సందర్భాల్లో ప్రసారం చేస్తుంటారు. అలా ప్రసారమైన వార్త కథనాలతో ఒక్కోసారి ఇబ్బందుల్లో పడే ప్రమాదం ఉంది. అటువంటి ఘటన ఒకటే హర్యానాలో జరిగింది. టీవీ ఛానెల్‌లో తప్పుడు వార్త కథనాలు, రెచ్చగొట్టే పోస్టులను ప్రచారం చేసినందుకు ఛానల్‌ ఎడిటర్‌ను అరెస్టు చేశారు. హర్యానాలోని నుహ్ మరియు ఇతర జిల్లాల్లో జరిగిన మత హింసకు సంబంధించి సోషల్ మీడియాలో రెచ్చగొట్టే పోస్ట్‌లను షేర్ చేసినందుకు హిందీ న్యూస్ ఛానెల్ ఎడిటర్‌ను గురుగ్రామ్ పోలీసులు శుక్రవారం అరెస్టు చేశారు.
సుదర్శన్ న్యూస్ రెసిడెంట్ ఎడిటర్ ముఖేష్ శ్రీకుమార్‌ను గురుగ్రామ్ సెక్టార్ 17 నుండి అరెస్టు చేసినట్లు పోలీసులు తెలిపారు. కుమార్‌ను కొందరు గూండాలు కిడ్నాప్ చేశారని ఛానెల్ మొదట పేర్కొంది. అయితే సైబర్ క్రైమ్ విభాగం అతడిని అరెస్టు చేసినట్లు గురుగ్రామ్ పోలీసులు స్పష్టం చేశారు.

Read also: TSRTC: ప్రయాణికులకు టీఎస్ ఆర్టీసీ శుభవార్త.. సుదూర ప్రాంతాలకు స్పెషల్ ట్రిప్పులు

జూలై 31న ముస్లింలు మెజారిటీగా ఉన్న నుహ్‌లో విశ్వహిందూ పరిషత్ (VHP) ఊరేగింపుపై గుంపులు దాడి చేయడంతో జరిగిన ఘర్షణల్లో ఆరుగురు చనిపోయారు. మృతుల్లో ఇద్దరు హోంగార్డులు, ఒక మతాధికారి కూడా ఉన్నారు. అయితే ఖతార్‌కు చెందిన అల్ జజీరా న్యూస్ ఛానెల్ ఒత్తిడి కారణంగా గురుగ్రామ్ పోలీసులు హిందూ కార్యకర్తలపై అలా ప్రవర్తించారని శ్రీకుమార్ ట్వీట్ చేశారు. మతపరమైన అల్లర్లకు సంబంధించి హిందువులపై చర్యలు తీసుకోవాలని విదేశీ మీడియా సంస్థ గురుగ్రామ్ పోలీస్ కమిషనర్ కళా రామచంద్రన్‌కు ఫోన్‌ కాల్స్ చేస్తోందని ఆయన ఆరోపించారు.

“@AJENews (అల్ జజీరా న్యూస్ ఛానల్) గుర్గావ్ పోలీస్ కమీషనర్‌కి కాల్స్ చేస్తూ హిందువులపై చర్య తీసుకోవాలని ఆమెపై ఒత్తిడి చేస్తోంది. కాల్ అందుకున్న తర్వాత, @DC_Gurugram చాలా ఒత్తిడికి గురైంది, ఆమె ఎక్కడి నుండైనా హిందూ కార్యకర్తలను అరెస్టు చేస్తుంది,” అంటూ ఆగస్టు 8న శ్రీకుమార్ పోస్ట్‌ చేశాడు. అయితే గురుగ్రామ్ పోలీసులు మిస్టర్ కుమార్ పోస్ట్‌ను “నిరాధారం, తప్పుడు మరియు తప్పుదోవ పట్టించేది” అని పేర్కొన్నారు, అతనిపై ఐటీ చట్టంలోని సంబంధిత సెక్షన్ల కింద కేసు నమోదు చేయడానికి ముందుకొచ్చారు. ఎఫ్‌ఐఆర్‌పై స్పందించిన సుదర్శన్ న్యూస్, మిస్టర్ కుమార్ హిందూ కార్యకర్తలకు సహాయం చేయడానికి మేవాట్‌కు వెళ్లినట్లు నివేదించింది. గురుగ్రామ్‌లోని సెక్టార్ 17లో కుమార్‌ను అతని కారు నుండి గూండాలు కిడ్నాప్ చేశారని ఛానెల్ పేర్కొంది. అరెస్టుపై స్పందిస్తూ “ఈ అరెస్టు పూర్తిగా చట్టవిరుద్ధం మరియు తప్పు. సుదర్శన్ న్యూస్ ముఖేష్ కుమార్ జీకి అండగా నిలుస్తుంది మరియు అరెస్టును మీడియా స్వేచ్ఛపై దాడిగా పరిగణిస్తుంది” అని ఛానెల్ ట్వీట్ చేసింది. సుదర్శన్ న్యూస్ ఎడిటర్-ఇన్-చీఫ్ సురేష్ చవాన్కే, సోషల్ మీడియాలో సుదీర్ఘ పోస్ట్‌లో, కుమార్ అరెస్ట్ గురించి ఎన్నో ప్రశ్నలు లేవనెత్తారు. “యూనిఫాంలో ఉన్న ముఖేష్ కుమార్‌ను పోలీసులు ఎందుకు అరెస్టు చేయలేదు? హర్యానా ప్రభుత్వం ఒక అధికారి అహంకారానికి తలొగ్గిందా? జర్నలిస్టులు మరియు మానవ హక్కుల సంస్థలు ఎక్కడ ఉన్నాయి?” అని చవాన్కే ట్విట్టర్‌లో రాశారు. మిస్టర్ కుమార్‌ను విడుదల చేయకుంటే శనివారం “పెద్ద ప్రకటన” చేస్తామని గురుగ్రామ్ పోలీసులను హెచ్చరించాడు. మనతో పాటు ఏ హిందూ పురుషులు ఉన్నారో చూద్దాం’ అని ట్విట్టర్‌లో రాశారు. ఇదంతా జరిగిన గంట తర్వాత, శ్రీకుమార్‌ను విడుదల చేసినట్లు అతను పేర్కొన్నాడు. కానీ శ్రీకుమార్‌ను విడుదల చేసినట్టు గురుగ్రామ్ పోలీసుల నుండి ఎలాంటి అధికారిక ప్రకటన వెలువడ లేదు.
నుహ్‌ జిల్లాలో ఇంకా ఉద్రిక్త పరిస్థితులు నెలకొనడంతో జిల్లాలో మొబైల్ ఇంటర్నెట్, ఎస్ఎంఎస్ సేవల నిలిపివేతను ఆదివారం వరకు పొడిగించారు.