Heavy Rain Alert: ఆగస్టు 24 వరకు భారీ వర్షాలు.. హిమాలయాల నుంచి మధ్య భారతం వరకు హై అలర్ట్!

Heavy Rain Alert: దేశంలోని పలు ప్రాంతాల్లో మాన్‌సూన్‌ మరోసారి చురుగ్గా మారింది. గురువారం (ఆగస్టు 20) ఉత్తర, మధ్య భారతంలోని అనేక రాష్ట్రాల్లో భారీ నుంచి అతి భారీ వర్షాలు కురిసే అవకాశం ఉందని భారత వాతావరణ శాఖ (IMD) వెల్లడించింది. ముఖ్యంగా ఛత్తీస్‌గఢ్‌, తూర్పు మధ్యప్రదేశ్‌, పశ్చిమ ఉత్తరప్రదేశ్‌లో కొన్ని ప్రాంతాల్లో భారీ నుంచి అతి భారీ వర్షాలు పడే అవకాశం ఉందని తెలిపింది. తూర్పు ఉత్తరప్రదేశ్‌, పశ్చిమ మధ్యప్రదేశ్‌, ఉత్తరాఖండ్‌, హిమాచల్‌ప్రదేశ్‌, జమ్మూకశ్మీర్‌, లడఖ్‌తో పాటు ఈశాన్య భారతంలోని పలు ప్రాంతాల్లోనూ భారీ వర్షాలు కురిసే అవకాశం ఉందని వాతావరణ శాఖ వెల్లడించింది.

అల్పపీడనంతో ముమ్మరమైన వర్షాలు

ఉత్తర జార్ఖండ్‌, దానికి ఆనుకుని ఉన్న నైరుతి బిహార్‌, ఆగ్నేయ ఉత్తరప్రదేశ్‌ ప్రాంతాల్లో ఏర్పడిన అల్పపీడన ప్రాంతం ప్రస్తుతం వర్షాలకు ప్రధాన కారణంగా మారిందని చెప్పింది. ఆగస్టు 19న ఉదయం 11.30 గంటలకు డిప్రెషన్‌ స్థాయి నుంచి బలహీనపడి ఇది అల్పపీడనంగా మారింది. రానున్న 24 గంటల్లో ఈ వ్యవస్థ ఆగ్నేయ ఉత్తరప్రదేశ్‌, ఉత్తర ఛత్తీస్‌గఢ్‌, ఈశాన్య మధ్యప్రదేశ్‌ మీదుగా పశ్చిమ-వాయవ్య దిశగా కదిలే అవకాశం ఉందని IMD అంచనా వేసింది. మరోవైపు ఫిరోజ్‌పూర్‌, కర్నాల్‌, హర్దోయ్‌ మీదుగా అల్పపీడన ప్రాంతం వరకు, అక్కడి నుంచి దిఘా మీదుగా ఈశాన్య బంగాళాఖాతం వరకు మాన్‌సూన్‌ ట్రఫ్‌ విస్తరించి ఉంది. ఈ రెండు వాతావరణ వ్యవస్థల ప్రభావంతో ఉత్తర, మధ్య భారతంలో వర్షాలు మరింత పెరిగే అవకాశం ఉంది. ఉత్తరప్రదేశ్‌లో వర్షాల తీవ్రత ఎక్కువగా ఉండే అవకాశం ఉంది. పశ్చిమ ఉత్తరప్రదేశ్‌లో ఆగస్టు 20, 22 తేదీల్లో అక్కడక్కడా భారీ నుంచి అతి భారీ వర్షాలు కురిసే అవకాశం ఉంది. తూర్పు ఉత్తరప్రదేశ్‌లో ఆగస్టు 20న, అలాగే 21, 22 తేదీల్లో భారీ వర్షాలు పడొచ్చని వాతావరణ శాఖ తెలిపింది. ఆగస్టు 20న ఆగ్నేయ ఉత్తరప్రదేశ్‌లోని కొన్ని ప్రాంతాల్లో అత్యంత భారీ వర్షాలు కురిసే అవకాశం ఉంది. వర్షాలతో పాటు గంటకు 60 కిలోమీటర్ల వేగంతో ఈదురుగాలులు వీచే అవకాశం ఉంది.

మధ్యప్రదేశ్‌, ఛత్తీస్‌గఢ్‌లోనూ భారీ వానలు
తూర్పు మధ్యప్రదేశ్‌లో ఆగస్టు 25 వరకు వర్షాల ప్రభావం కొనసాగొచ్చు. పశ్చిమ మధ్యప్రదేశ్‌లో ఆగస్టు 20 నుంచి 23 వరకు వర్షాలు కురిసే అవకాశం ఉంది. ఛత్తీస్‌గఢ్‌లో ఆగస్టు 20న కొన్ని ప్రాంతాల్లో భారీ నుంచి అతి భారీ వర్షాలు పడే అవకాశం ఉందని IMD తెలిపింది. ఢిల్లీ-NCRలో ఇతర ప్రభావిత రాష్ట్రాలతో పోలిస్తే వర్షాల తీవ్రత తక్కువగా ఉండొచ్చు. అయితే ఆకాశం మేఘావృతమై ఉండటంతో పాటు కొన్ని ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశం ఉంది. ఢిల్లీ, హర్యానా, చండీగఢ్‌లో అక్కడక్కడా వర్షాలు పడొచ్చని వాతావరణ శాఖ అంచనా వేసింది. ఈ ప్రాంతాల్లో గంటకు 40-50 కిలోమీటర్ల వేగంతో గాలులు వీచే అవకాశం ఉంది. ఢిల్లీలో గరిష్ఠ ఉష్ణోగ్రత 34 డిగ్రీలు, కనిష్ఠ ఉష్ణోగ్రత 28 డిగ్రీల సెల్సియస్‌ చుట్టూ ఉండొచ్చని అంచనా. ఉత్తరాఖండ్‌లో ఆగస్టు 20న పలు జిల్లాల్లో భారీ వర్షాలు, ఉరుములతో కూడిన జల్లులు పడే అవకాశం ఉంది. నైనిటాల్‌, హరిద్వార్‌, రిషికేశ్‌, బాగేశ్వర్‌, అల్మోరా, పిథోరాగఢ్‌, రుద్రప్రయాగ్‌ తదితర ప్రాంతాల్లో గంటకు 55 కిలోమీటర్ల వేగంతో ఈదురుగాలులు వీచొచ్చు. హిమాచల్‌ప్రదేశ్‌లోనూ ఆగస్టు 20న వర్షాలు, ఉరుములు, మెరుపులతో కూడిన వాతావరణం ఉండొచ్చు. మండి, సిమ్లా, సోలన్‌, ఉనా, బిలాస్‌పూర్‌, చంబా, కిన్నౌర్‌, హమీర్‌పూర్‌, కాంగ్రా ప్రాంతాల్లో గంటకు 50-60 కిలోమీటర్ల వేగంతో గాలులు వీచే అవకాశం ఉంది.

జమ్మూకశ్మీర్‌, ఈశాన్య రాష్ట్రాల్లోనూ వర్షాలు
జమ్మూకశ్మీర్‌లోని బారాముల్లా, అనంత్‌నాగ్‌, రియాసి, గందర్‌బల్‌, కుప్వారా, కిష్త్‌వార్‌, షోపియాన్‌, పూంచ్‌, రాంబన్‌, బందిపొరా ప్రాంతాల్లో భారీ వర్షాలు, ఉరుములతో కూడిన జల్లులు పడే అవకాశం ఉంది. గంటకు 55 కిలోమీటర్ల వేగంతో గాలులు వీచొచ్చు. ఈశాన్య భారతంలో అరుణాచల్‌ప్రదేశ్‌, అసోం, మేఘాలయ, నాగాలాండ్‌, మణిపూర్‌, మిజోరం, త్రిపుర రాష్ట్రాల్లోనూ అక్కడక్కడా భారీ వర్షాలు కురిసే అవకాశం ఉంది. కొంకణ్‌, గోవా ప్రాంతాల్లో ఆగస్టు 25 వరకు విస్తారంగా వర్షాలు కురిసే అవకాశం ఉంది. కోస్తా కర్ణాటకలోనూ విస్తారమైన వర్షాలతో పాటు కొన్ని ప్రాంతాల్లో భారీ వర్షాలు పడే అవకాశం ఉందని వాతావరణ శాఖ తెలిపింది. మొత్తంగా ఉత్తర, మధ్య, ఈశాన్య భారతంతో పాటు పశ్చిమ తీర ప్రాంతాల్లోనూ రానున్న రోజుల్లో మాన్‌సూన్‌ ప్రభావం కొనసాగనుంది.