Dharmendra Pradhan: ‘‘బంగ్లాదేశ్‌ నుంచి స్పూర్తి’’.. రాహుల్ గాంధీ, సీజేపీపై ధర్మేంద్ర ప్రధాన్ ఫైర్..!

Dharmendra Pradhan: కాక్రోచ్ జనతా పార్టీ(CJP), కాంగ్రెస్, రాహుల్ గాంధీలపై మాజీ కేంద్ర మంత్రి, బీజేపీ నేత ధర్మేంద్ర ప్రధాన్ తీవ్ర స్థాయిలో ఆరోపణలు చేశారు. విద్యార్థులు, జాతీయ ప్రయోజనాలతో ప్రారంభమైన నిరసనలు ఇప్పుడు దేశంలో అరాచకాన్ని సృష్టించి, రాజకీయ వ్యవస్థను అస్థిరపరిచే ప్రయత్నంగా మారాయని ఆయన ఆరోపించారు. ఎక్స్ వేదికగా ధర్మేంద్ర ప్రధాన్ ఈ వ్యాఖ్యలు చేశారు. ఎన్నికైన ప్రభుత్వాన్ని మార్చాలని, బంగ్లాదేశ్ ఉద్యమం మాకు స్పూర్తి బహిరంగంగా మాట్లాడటం వెనక వారి అసలు ఉద్దేశాన్ని బయటపెడుతున్నాయని అన్నారు. విద్యార్థుల ముసుగులో దేశంలో అరాచకాలను సృష్టించాలని ప్రయత్నిస్తున్నట్లు ఆరోపించారు. భారత్‌లో అధికార మార్పు ప్రజాస్వామ్య ప్రక్రియ ద్వారానే సాధ్యమవుతుందని వారు గుర్తించాలని హితవు పలికారు.

లోక్‌సభ ప్రతిపక్ష నేత, కాంగ్రెస్ నాయకుడు రాహుల్ గాంధీపై ధర్మేంద్ర ప్రధాన్ తీవ్ర విమర్శలు చేశారు. రాహుల్ గాంధీ ప్రజాతీర్పును పదే పదే అగౌరపరుస్తున్నారని ఆరోపించారు. ఎన్నికల్లో గెలవకపోతే ప్రజాస్వామ్య సంస్థలపై అపనమ్మకం కలిగించే ప్రయత్నాలను కాంగ్రెస్ చేస్తోందని విమర్శించారు. రాజకీయ ప్రయోజనాల కోసం ప్రజల్ని నిరంతరం ఇబ్బందులకు గురిచేయడమే కాంగ్రెస్ పని అని ఆరోపించారు. అధికార దాహాంతో రాజ్యాంగ సంస్థల్ని అవమానిస్తున్నారని అన్నారు. ప్రజాస్వామ్యం పట్ల రాహుల్ గాంధీ వైఖరి అత్యంత సిగ్గుచేటని ఆయన ఆగ్రహం వ్యక్తం చేశారు.