Pawan Kalyan: కథ నచ్చకపోతే కాల్చేస్తారా?.. పవన్ కల్యాణ్‌ను అడిగిన డైరెక్టర్!

Pawan Kalyan Fires on Tholi Prema Director Karunakaran: పవర్‌స్టార్‌ పవన్‌ కల్యాణ్‌ కెరీర్‌లోని సూపర్‌ హిట్‌ చిత్రాల్లో ‘తొలిప్రేమ’ ఒకటి. కీర్తి రెడ్డి హీరోయిన్‌గా నటించిన ఈ సినిమాను ప్రేమకథా చిత్రాలకు అడ్రస్ అయిన కరుణాకరన్‌ దర్శకత్వం వహించారు. క్లాసిక్‌ యూత్‌ఫుల్‌ ఎంటర్‌టైనర్‌గా వచ్చిన ఈ సినిమా పవన్ కెరీర్‌లోనే బిగ్గెస్ట్ హిట్‌గా నిలిచింది. కరుణాకరన్‌ టేకింగ్‌, పవన్ నటన, కీర్తి అందం ప్రేక్షకులను కట్టిపడేసింది. ఈ సినిమా అపట్లో క్రియేట్ చేసిన రికార్డ్స్ అన్నిఇన్ని కావు. ఇక దేవ అందించిన పాటలు ఇప్పటికీ కూడా మార్మోగుతున్నాయి. ఈ సినిమా విడుదలై 25 ఏళ్లు పూర్తి కావొస్తుంది. ఈ సందర్భంగా చిత్ర బృందం 4కె వెర్షన్‌లో ‘తొలిప్రేమ’ను శుక్రవారం రీ రిలీజ్‌ చేసింది.

తొలిప్రేమ సినిమాకు రీ రిలీజ్‌లో కూడా రికార్డు స్థాయిలో కలెక్షన్స్ వచ్చాయని సినీ వర్గాలు పేర్కొన్నాయి. రీ రిలీజ్‌ నేపథ్యంలో దర్శకుడు కరుణాకరన్ అప్పటి జ్ఞాపకాలను నెమరువేసుకున్నాడు. సినిమా షూటింగ్‌కు సంబంధించిన విషయాలను ఓ ఇంటర్వ్యూలో తెలిపారు. ‘పవన్ కళ్యాణ్ గారిని కలవడానికి దాదాపు 7 నెలల సమయం పట్టింది. ఓ రోజు రాత్రి 7 గంటలకు ఆయన నాకు అపాయింట్ మెంట్ ఇచ్చారు. అయితే కారు టైర్ పంచర్ అవ్వడంతో నేను 8.30కు వెళ్లాల్సి వచ్చింది. దాంతో పవన్ చాలా కోపంగా ఉన్నారు. అప్పుడు చేతిలో గన్ పట్టుకొని ఉన్నారు. కథ నచ్చకపోతే కాల్చేస్తారా? ఏంటి అని అడిగా. వెంటనే ఓ నవ్వు నవ్వేసి కూల్ అయిపోయారు’ అని కరుణాకరన్ చెప్పారు.

‘తొలిప్రేమ సినిమాలోని ‘ఈ మనసే’ పాట ఎడిటింగ్ సమయంలో పవన్ కళ్యాణ్ రామానాయుడు స్టూడియోకి వచ్చారు. పాట చివరి దశలో ఉంది కాస్త వెయిట్ చేయండని చెప్పి నేను లోపలి వెళ్లాను. అయితే ఎడిటింగ్ అయ్యేసరికి చాలా సమయం పట్టింది. అయినా కూడా పవన్ కళ్యాణ్ గారు అక్కడే ఉన్నారు అది చూసి నేను షాక్ అయ్యాను. దాదాపు 6 గంటలు వెయిట్ చేశారు. అది ఆయన గొప్పతనం. ఆ తర్వాత పాట విని సంతోషించారు’ అని ఆ నాటి జ్ఞాపకాలను కరుణాకరన్ గుర్తుచేసుకున్నారు.

Also Read: Minister KTR: మరో రెండేళ్లలో ఎయిర్‌పోర్టుకు మెట్రో రైలు: కేటీఆర్

Also Read: Bro Teaser: పూజా లేకుండా సినిమాలు తీయరా?.. త్రివిక్రమ్‌ను ఆడుకుంటున్న నెటిజన్లు!