UnStoppable 2: ఇండస్ట్రీలోనే మొదటిసారి.. బాలయ్య షోకు పవన్.. ?

UnStoppable 2: నందమూరి బాలకృష్ణ సినిమాల్లోనే కాకుండా ఓటీటీలో కూడా తనదైన స్టైల్లో రచ్చ చేసిన షో అన్ స్టాపబుల్. ఆహా ఓటిటీ లో ప్రతివారం సందడి చేసే ఈ షో లో అతిరధ మహారధులు బాలయ్య తన మాటలతో చేతలతో భయపెట్టి, ఆడించి, పాడించి బోల్డంత వినోదాన్ని ప్రేక్షకులకు అందించాడు. 10 ఎపిసోడ్లతో ఈ సీజన్ ముగిసింది. బాలయ్య బాబు .. హోస్టింగ్ ఏం చేస్తాడు లే అనుకున్నవారి చేత.. బాలయ్య బాబు.. హోస్టింగ్ ఏం చేశాడు రా అని అనిపించుకున్నాడు. దీంతో ఈ షో సీజన్ 2 కోసం అభిమానులు ఎంత గానో ఎదురుచూస్తున్నారు. ఇక ఇప్పటికే అధికారిక ప్రకటన కూడా వచ్చేసింది. త్వరలోనే అన్ స్టాపబుల్ 2 తో బాలయ్య మరోసారి రచ్చ చేయడానికి రెడీ అయిపోయాడు. అయితే ఈసారి గెస్టుల లిస్ట్ చూస్తుంటే అభిమానుల కళ్ళలో వెయ్యి వోల్టుల లైట్ వెలుగుతోంది. ఈ సీజన్ లో ముఖ్యంగా ముగ్గురు స్టార్ హీరోలు సందడి చేయనున్నట్లు వార్తలు వినిపిస్తున్నాయి. అందులో మొదటి హీరో మెగాస్టార్ చిరంజీవి.

గత సీజన్ లోనే చిరు రానున్నట్లు వార్తలు వచ్చినా అది కుదరలేదు. ఇక ఈ సీజన్ మొదటి ఎపిసోడ్ ను చిరునే లాంచ్ చేయనున్నట్లు వార్తలు వినిపిస్తున్నాయి. ఇక రెండో హీరో నాగార్జున.. ఈయన కూడా ఈ సీజన్లో సందడి చేయనున్నట్లు వార్తలు వినిపిస్తున్నాయి. ఇక మూడో హీరో.. పవన్ కళ్యాణ్. ఈ వార్త తెలియడంతో ఇండస్ట్రీ మొత్తం ఒక్కసారిగా షేక్ అయ్యిందనే చెప్పాలి. ఎందుకంటే పవన్ ఇప్పటివరకు ఏ షో కు వెళ్ళింది లేదు. రాజకీయాల్లోకి వచ్చాక కనీసం సినిమా ఇంటర్వ్యూలు కూడా ఇచ్చింది లేదు. అలాంటి పవన్ తన స్నేహితుడు త్రివిక్రమ్ తో కలిసి ఈ షో కు హాజరవుతున్నట్లు పుకార్లు షికార్లు చేస్తున్నాయి. ఇదే కనుక నిజమైతే అభిమానుల తీరని కోరికగా మిగిలిపోయిన ఈ కోరిక నెరవేరినట్లే.. అల్లు అరవింద్ షో కాబట్టి.. చిరుతో కలిసి అరవింద్, పవన్ ఒప్పించి ఉంటారని అంటున్నారు. ఇక ఈ షోలో బాలయ్య.. పవన్ ను ఎలాంటి ప్రశ్నలు సంధిస్తాడో.. పవన్ ఎలాంటి సమాధానాలు ఇస్తాడో చూడాలి . మరి ఈ వార్తలో నిజం ఎంత అనేది తెలియాలంటే.. అధికారిక ప్రకటన వచ్చేవరకు వేచి ఉండాల్సిందే.