Simbu – Nayan: పదేళ్ల తర్వాత శింబుతో నయన్ జోడి.. వైరల్ అవుతున్న క్రేజీ న్యూస్!

Simbu – Nayan: సౌత్ ఇండస్ట్రీలో ఒకప్పుడు వెండితెరపైనే కాకుండా బయట కూడా భారీ సెన్సేషన్ సృష్టించిన స్టార్ జోడీ శింబు – నయనతార. వీరిద్దరి కాంబినేషన్‌లో సినిమా అంటే అప్పట్లో ఒక రేంజ్ క్రేజ్ ఉండేది. ఇప్పుడు దాదాపు పదేళ్ల సుదీర్ఘ విరామం తర్వాత ఈ ఇద్దరూ మళ్లీ ఒకే స్క్రీన్‌ను షేర్ చేసుకోబోతున్నారనే వార్త కోలీవుడ్‌తో పాటు టాలీవుడ్‌లో కూడా విపరీతంగా ట్రెండ్ అవుతోంది.

‘డ్యూడ్’ సినిమాతో మంచి సక్సెస్ అందుకున్న యంగ్ డైరెక్టర్ కీర్తీశ్వరన్ ప్రస్తుతం శింబుతో ఒక ప్రాజెక్ట్‌ను తెరకెక్కించేందుకు సన్నాహాలు చేస్తున్నారట. ఈ చిత్రంలో హీరోయిన్ రోల్ కోసం నయనతారను సంప్రదించినట్లు కోలీవుడ్ సర్కిల్స్‌లో జోరుగా చర్చ సాగుతోంది. ఇప్పటికే డైరెక్టర్ ఆమెకు కథ వినిపించారని, ప్రస్తుతం చర్చలు చివరి దశలో ఉన్నాయని సమాచారం. నయన్ గ్రీన్ సిగ్నల్ ఇస్తే, పదేళ్ల తర్వాత వీరి కాంబినేషన్‌ను వెండితెరపై చూసే అవకాశం అభిమానులకు దక్కుతుంది.

గతంలో ‘వల్లభ’ సినిమాతో బాక్సాఫీస్ వద్ద ఈ జంట రచ్చ చేసిన సంగతి తెలిసిందే. ఆ తర్వాత 2016లో వచ్చిన ‘ఇదు నమ్మ ఆళు’ సినిమాలో చివరిసారిగా కలిసి నటించారు. ఆ సినిమా తర్వాత మళ్లీ ఇప్పటివరకు వీరిద్దరూ కలిసి ఏ ప్రాజెక్ట్‌ కూడా చేయలేదు. సరిగ్గా పదేళ్లకు మళ్లీ ఈ కాంబో రిపీట్ కానుందన్న న్యూస్ బయటకు రావడంతో శింబు – నయన్ అభిమానులు ఖుషీ అవుతున్నారు. ప్రస్తుతం లేడీ సూపర్ స్టార్ నయనతార వైవిధ్యమైన పాత్రలను ఎంచుకుంటూ వరుస సినిమాలతో బిజీగా ఉన్నారు. మరి శింబు ప్రాజెక్ట్‌కు ఆమె వైపు నుంచి అధికారికంగా ఎప్పుడు గ్రీన్ సిగ్నల్ వస్తుందో చూడాలి. ఒకవేళ ఈ ప్రాజెక్ట్ ఫిక్స్ అయితే బాక్సాఫీస్ వద్ద మరోసారి ఈ కాంబినేషన్ ఏ రేంజ్ సెన్సేషన్ క్రియేట్ చేస్తుందో చూడాలి.