Ragi Puri: ఆరోగ్యానికి ఆరోగ్యం.. రుచికి రుచి.. రాగి పిండితో మెత్తటి పూరీలు.. ఇలా చేస్తే లొట్టలేయాల్సిందే!

Ragi Puri: సాధారణంగా పూరీ అంటేనే ఆయిలీ ఫుడ్ అని, అన్-హెల్తీ అని చాలా మంది దూరంగా ఉంటారు. కానీ అదే పూరీని ఆరోగ్యానికి ఎంతో మేలు చేసే చిరుధాన్యాలతో చేస్తే ఎలా ఉంటుందో ఆలోచించండి. అద్భుతమైన రుచితో పాటు బోలెడంత ఆరోగ్యాన్ని ఇచ్చే ‘రాగి పూరీ’ ఇప్పుడు ట్రెండింగ్‌లోకి వచ్చింది. రాగి పిండితో చేసినా కూడా పూరీ పూరీలాగే చక్కగా పొంగుతూ, దూదిలా మెత్తగా రావాలంటే కొన్ని చిన్న చిట్కాలు పాటిస్తే చాలు. దానికి తోడు నోరూరించే బొంబాయి చట్నీ ఉంటే ఆ మజానే వేరు. ఈ హెల్తీ రెసిపీని ఎలా చేయాలో ఈ స్టోరీలో తెలుసుకుందాం.

రాగి పూరీ తయారీ విధానం..
రాగి పూరీలు నల్లగా రాకుండా, సాఫ్ట్‌గా రావడానికి రాగి పిండితో పాటు కొద్దిగా గోధుమ పిండిని కూడా కలపాలి. ముందుగా ఒక గిన్నెలో ఒక కప్పు రాగి పిండి, ఒక కప్పు గోధుమ పిండి, తగినంత ఉప్పు, కొద్దిగా నూనె వేసి బాగా కలపాలి. రాగి పిండి జిగురు తక్కువగా ఉంటుంది కాబట్టి, పిండిని కలిపేటప్పుడు గోరువెచ్చని నీటిని వాడితే పూరీలు విరిగిపోకుండా మెత్తగా వస్తాయి. తర్వాత ఆ పిండిని అరగంట పాటు నానబెట్టిన తర్వాత, చిన్న చిన్న ఉండలుగా చేసుకుని పూరీల్లా ఒత్తుకోవాలి. నూనె బాగా కాగిన తర్వాత వేయిస్తే పూరీలు చక్కగా పొంగుతాయి.

కాంబినేషన్ ‘బొంబాయి చట్నీ’..
రాగి పూరీలకు బెస్ట్ కాంబినేషన్ బొంబాయి చట్నీ. ముందుగా ఒక బాణలిలో నూనె వేసి తాలింపు గింజలు, పచ్చిమిర్చి, అల్లం ముక్కలు, ఉల్లిపాయలు, కరివేపాకు వేసి వేయించాలి. తర్వాత ఒక గిన్నెలో రెండు స్పూన్ల శనగపిండిని నీళ్లలో ఉండలు లేకుండా కలిపి, వేగుతున్న ఉల్లిపాయ ముక్కల్లో వేయాలి. తగినంత ఉప్పు, పసుపు వేసి చిక్కబడే వరకు ఉడికించి పక్కన పెట్టుకోవాలి. అంతే మన బొంబాయి చట్నీ కంప్లీట్ అయిపోతుంది.

ప్రయోజనాలు ఇవే..
చిరుధాన్యాలన్నింటిలో రాగులలో క్యాల్షియం అత్యధికంగా ఉంటుంది. ఇది ఎముకలను బలంగా ఉంచడమే కాకుండా, చిన్న పిల్లల్లో ఎముకల పెరుగుదలకు, వృద్ధుల్లో వచ్చే ఆస్టియోపోరోసిస్ (ఎముకల బలహీనత) సమస్యను నివారించడానికి తోడ్పడుతుంది. రాగులలో ఐరన్ (ఇనుము) సమృద్ధిగా ఉంటుంది. రక్తహీనత సమస్యతో బాధపడేవారు రాగిని ఆహారంలో భాగంగా చేసుకోవడం వల్ల శరీరంలో హిమోగ్లోబిన్ శాతం పెరుగుతుంది. గోధుమ లేదా మైదా పిండితో పోలిస్తే రాగులలో గ్లైసీమిక్ ఇండెక్స్ తక్కువగా ఉంటుంది. దీనివల్ల రక్తంలో చక్కెర స్థాయిలు వేగంగా పెరగవు. చక్కెర వ్యాధి ఉన్నవారికి ఇది మంచి అల్పాహారంగా పని చేస్తుంది.

రాగులలో ఫైబర్ (పీచు పదార్థం) ఎక్కువగా ఉంటుంది. దీనివల్ల ఈ పూరీలు తిన్న తర్వాత కడుపు నిండుగా అనిపించి, ఎక్కువ సేపు ఆకలి వేయదు. ఇది అతిగా తినడాన్ని తగ్గించి, బరువు తగ్గడానికి సహాయపడుతుంది. అలాగే రాగులలో ఉండే అమైనో యాసిడ్స్ శరీరంలోని చెడు కొలెస్ట్రాల్‌ను తగ్గించి, మంచి కొలెస్ట్రాల్‌ను పెంచడంలో సహాయపడతాయి. దీంతో గుండె సంబంధిత సమస్యలు రాకుండా కాపాడుతాయి. దీంట్లో అధిక పీచు పదార్థం ఉండటం వల్ల మలబద్ధకం సమస్య తొలగిపోయి, జీర్ణవ్యవస్థ సాఫీగా సాగుతుంది. వెరైటీ, హెల్తీ వంటకాల కోసం ప్రయత్నించే వారు ఈ రాగి పూరీలను తప్పకుండా టేస్ట్ చేయాల్సిందే.