Home Hacks : కడాయి హ్యాండిల్‌పై గట్టి జిడ్డా? ఈ చిట్కాలతో కొత్తదానిలా మెరిపించండి.!

Home Hacks :  వంటగదిలో రోజూ వాడే బాండీలు, కడాయిల హ్యాండిల్స్, అడుగు భాగంలో తరచూ నూనె జిడ్డు, నల్లటి మసి పేరుకుపోతుంటాయి. వంట చేసేటప్పుడు నూనె ఆవిరై పాత్ర అంచులు, పిడులకు అంటుకోవడం , కడిగేటప్పుడు ఆ మూలలను సరిగ్గా శుభ్రం చేయకపోవడం వల్ల ఈ జిడ్డు కాలక్రమేణా గట్టిగా, మందపాటి పొరలా తయారవుతుంది. దీనిని సాధారణ సబ్బుతో వదిలించడం చాలా కష్టం. అయితే, పెద్దగా శ్రమ పడకుండానే ఇంటి వద్ద ఉన్న వస్తువులతో ఈ గట్టి జిడ్డును వదిలించి, పాత్రలను కొత్తవాటిలా మెరిపించే కొన్ని ప్రభావవంతమైన మార్గాలు మీ కోసం.

బేకింగ్ సోడా , నిమ్మరసం పేస్ట్

కడాయి అంచులు, హ్యాండిల్స్‌పై ఉన్న గట్టి జిడ్డును వదిలించడానికి బేకింగ్ సోడా , నిమ్మరసం కాంబినేషన్ అద్భుతంగా పనిచేస్తుంది. ఒక గిన్నెలో రెండు నుండి మూడు టీస్పూన్ల బేకింగ్ సోడా తీసుకుని, అందులో సగం నిమ్మకాయ రసం పిండి చిక్కటి పేస్ట్‌లా తయారు చేయాలి. ఈ మిశ్రమాన్ని జిడ్డు గట్టిగా ఉన్న భాగాలకు పూసి 15 నుండి 20 నిమిషాల పాటు నానబెట్టాలి. అనంతరం స్టీల్ స్క్రబ్బర్‌తో రుద్దితే జిడ్డు సులభంగా వదిలిపోతుంది. బేకింగ్ సోడాలోని క్షార గుణాలు , నిమ్మకాయలోని నైసర్గిక ఆమ్లం గట్టిపడిన నూనె జిడ్డును తక్షణమే కరిగించి వేరు చేస్తాయని పరిశోధనలు కూడా వెల్లడిస్తున్నాయి.

వెనిగర్ , డిష్ వాషింగ్ లిక్విడ్ ప్రయోగం

పాత్రల నుంచి మురికి, మసి మరకలను తొలగించడానికి తెల్ల వెనిగర్ బాగా ఉపయోగపడుతుంది. ఒక పెద్ద పాత్రలో నీటిని తీసుకుని, అందులో 2 టేబుల్ స్పూన్ల తెల్ల వెనిగర్ , కొద్దిగా డిష్‌వాషింగ్ లిక్విడ్ కలిపి మరిగించాలి. ఈ వేడి ద్రవాన్ని జిడ్డుగా ఉన్న కడాయిలో పోసి కొద్దిసేపు చల్లారనివ్వాలి. ఆ తర్వాత గట్టి స్పాంజి లేదా బ్రష్‌తో రుద్దితే అంటుకున్న మురికి అంతా తేలిగ్గా వదిలిపోతుంది. వెనిగర్‌లోని ఎసిటిక్ ఆసిడ్ క్రిమిసంహారకగా పనిచేస్తూనే, సబ్బుతో కలిసి జిడ్డు బంధాలను వేగంగా తెంచేస్తుంది.

ఉప్పు , డిటర్జెంట్ ద్రావణంలో నానబెట్టడం

హ్యాండిల్స్ సందుల్లోకి స్క్రబ్బర్ వెళ్ళని పక్షంలో లేదా జిడ్డు మరీ మందంగా ఉంటే ఈ పద్ధతి పాటించవచ్చు. కడాయి పూర్తిగా మునిగేంత పెద్ద పాత్రలో గోరువెచ్చని నీటిని నింపి, అందులో 3 టేబుల్ స్పూన్ల ఉప్పు , అర కప్పు డిటర్జెంట్ పౌడర్ కలపాలి. జిడ్డుగా ఉన్న పాత్రను ఈ నీటిలో రాత్రంతా లేదా కనీసం 2 నుండి 3 గంటల పాటు నానబెట్టాలి. ఇలా నానడం వల్ల హ్యాండిల్స్ , అడుగు భాగాన ఉన్న గట్టి పొరలు మెత్తబడతాయి. మరుసటి రోజు ఉదయం స్క్రబ్బర్‌తో తేలికగా రుద్దితే జిడ్డు సగం శ్రమతోనే పూర్తిగా పోతుంది.

టూత్‌పేస్ట్ అండ్ అల్యూమినియం ఫాయిల్ మ్యాజిక్

బాండీ అడుగున ఏర్పడిన నల్లటి మచ్చలు, గట్టి జిడ్డును తొలగించడానికి తెల్లటి టూత్‌పేస్ట్ ఎంతగానో సహాయపడుతుంది. తెల్లటి టూత్‌పేస్ట్‌లో కొద్దిగా బేకింగ్ సోడా, నిమ్మరసం కలిపి పేస్ట్‌లా చేయాలి. దీనిని కడాయిపై ఉన్న నల్లటి మచ్చలు, పిడులపై పూసి 10 నిమిషాలు అలానే ఉంచాలి. ఆ తర్వాత నలిపిన అల్యూమినియం ఫాయిల్ పేపర్ లేదా స్టీల్ స్క్రబ్బర్‌తో కాసేపు రుద్దితే పాత్రపై ఉన్న గట్టి మసి, జిడ్డు కరిగిపోయి కడాయి కొత్తదానిలా నిగనిగలాడుతూ మెరుస్తుంది.