Donald Trump: ఇరాన్ నన్నే మొదట చంపాలనుకుంటోంది.. టర్కీలో ట్రంప్ సంచలన వ్యాఖ్యలు

అమెరికా-ఇరాన్ మధ్య ఉద్రిక్తతలు ఇంకా కొనసాగుతూనే ఉన్నాయి. ఇరు దేశాలు పరస్పరం హెచ్చరికలు జారీ చేస్తూ, సైనిక చర్యలపై కఠిన వైఖరిని ప్రదర్శిస్తున్నాయి. ఈ నేపథ్యంలో టర్కీలో జరిగిన నాటో శిఖరాగ్ర సమావేశానికి హాజరైన అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలు ప్రపంచవ్యాప్తంగా చర్చనీయాంశంగా మారాయి. టర్కీలో మీడియాతో మాట్లాడిన ట్రంప్, “ఇరాన్ చంపాలనుకుంటున్న వారి జాబితాలో నేను నంబర్ వన్ స్థానంలో ఉన్నాను. కానీ దాని గురించి నాకు ఎలాంటి భయం లేదు. నేను నా పని చేస్తున్నాను. అమెరికా ప్రయోజనాల కోసం పని చేస్తున్నాను. టిక్‌టాక్‌లో నంబర్ వన్‌గా ఉండటం నాకు ఇష్టం, కానీ ప్రస్తుతం నేను ఇరాన్ హిట్‌లిస్ట్‌లో నంబర్ వన్‌గా ఉన్నాను” అని వ్యాఖ్యానించారు.

“దాడి చేస్తే 10 రెట్లు గట్టిగా ప్రతిస్పందిస్తాం”

ఇరాన్‌తో మళ్లీ యుద్ధం ప్రారంభమయ్యే అవకాశంపై ప్రశ్నించగా ట్రంప్ స్పందిస్తూ, “అది మళ్లీ మొదలవుతుందని నేను అనుకోవడం లేదు. వారు కొన్ని నౌకలపై దాడి చేశారు. దానికి మేము మరింత తీవ్రంగా ప్రతిస్పందించాం. ఇకపై వారు దాడి చేస్తే, మేము 10 రెట్లు ఎక్కువ బలంగా దాడి చేస్తాం. మా వద్ద అత్యాధునిక ఆయుధాలు ఉన్నాయి” అని హెచ్చరించారు.

“సంఘర్షణ త్వరలోనే ముగుస్తుంది”

ప్రస్తుత ఉద్రిక్త పరిస్థితి ఎక్కువ కాలం కొనసాగదని ట్రంప్ అభిప్రాయపడ్డారు. “వారు దాడి చేస్తే మేము కూడా అదే భాషలో సమాధానం ఇస్తాం. కానీ ఈ పరిస్థితి చాలా త్వరగా ముగుస్తుందని నేను భావిస్తున్నాను. ప్రపంచ చమురు సరఫరాపై కూడా ప్రభావం లేకుండా చూస్తాం” అని చెప్పారు.

హార్ముజ్ జలసంధిపై వ్యాఖ్యలు

హార్ముజ్ జలసంధి గురించి ప్రస్తావిస్తూ ట్రంప్, “ప్రపంచ చమురు రవాణాకు కీలకమైన ఈ మార్గం సురక్షితంగా ఉండాలి. ప్రస్తుతం చమురు నిల్వలు కూడా తగినంతగా ఉన్నాయి. దీర్ఘకాలిక యుద్ధం మా లక్ష్యం కాదు” అని స్పష్టం చేశారు.

ఇరాన్‌తో ఒప్పందంపై సందిగ్ధత

ఇరాన్‌తో భవిష్యత్తులో ఒప్పందం కుదుర్చుకునే అంశంపై ట్రంప్ స్పందిస్తూ, “నేను వారితో ఒప్పందం చేసుకోవాలనుకుంటున్నానో లేదో ఇప్పుడే చెప్పలేను. ముందుగా ప్రస్తుత పరిస్థితిని పూర్తిగా పరిష్కరించాలి. ఆ తర్వాత తదుపరి నిర్ణయం తీసుకుంటాం” అని పేర్కొన్నారు.

“నేను అధ్యక్షుడిని కాకపోతే ఇజ్రాయెల్ ఉండేది కాదు”

ఇరాన్ అణు కార్యక్రమంపై కూడా ట్రంప్ తీవ్ర వ్యాఖ్యలు చేశారు. “ఇరాన్ ఎట్టి పరిస్థితుల్లోనూ అణ్వాయుధాలు కలిగి ఉండకూడదు. అలాంటి ఆయుధాలు ప్రమాదకరమైన చేతుల్లోకి వెళ్లకూడదు. నేను అధ్యక్షుడిగా లేకపోయి ఉంటే ఇజ్రాయెల్ ఈరోజు ఉండేది కాదు. అమెరికా తీసుకున్న చర్యల వల్లే ఇజ్రాయెల్ భద్రంగా ఉంది” అని ట్రంప్ అన్నారు.

అమెరికా అధ్యక్షుడి తాజా వ్యాఖ్యలు ఇప్పటికే ఉద్రిక్తంగా ఉన్న అమెరికా-ఇరాన్ సంబంధాలపై మరింత చర్చకు దారితీశాయి. రానున్న రోజుల్లో ఈ పరిణామాలు అంతర్జాతీయ రాజకీయాలపై ఎలాంటి ప్రభావం చూపుతాయో ఆసక్తికరంగా మారింది.