Karumuri Nageswara Rao : ఏపీ లిక్కర్ రవాణా స్కామ్‌లో మాజీ మంత్రి కారుమూరి అరెస్ట్
- హైదరాబాద్‌లో మాజీ మంత్రిని అదుపులోకి తీసుకున్న ఈడీ
- మద్యం రవాణా టెండర్లలో అక్రమాలపై దర్యాప్తు
- PMLA కింద మనీలాండరింగ్ కోణంలో విచారణ
- ఈడీ ప్రత్యేక కోర్టులో హాజరుపరిచే అవకాశం
- Follow Us :
-
-
Add as a preferred
source on google
ఆంధ్రప్రదేశ్‌లో గత ప్రభుత్వ హయాంలో చోటుచేసుకున్నట్లు ఆరోపణలు ఎదుర్కొంటున్న మద్యం రవాణా కుంభకోణం కేసు తీవ్ర ఉత్కంఠకు దారితీసింది. ఈ కేసులో మాజీ మంత్రి, వైఎస్సార్‌సీపీ సీనియర్ నేత కారుమూరి నాగేశ్వరరావును ఎన్‌ఫోర్స్‌మెంట్ డైరెక్టరేట్ (ఈడీ) అధికారులు అరెస్ట్ చేశారు. హైదరాబాద్ కొండాపూర్‌లోని ఆయన నివాసంలో అదుపులోకి తీసుకున్న అధికారులు, ఆపై విచారణ నిమిత్తం బషీర్‌బాగ్‌లోని ఈడీ ప్రాంతీయ కార్యాలయానికి తరలించారు. ఈ అరెస్ట్‌తో రెండు తెలుగు రాష్ట్రాల రాజకీయ వర్గాల్లో పెద్ద ఎత్తున ప్రకంపనలు రేగుతున్నాయి.
రూ.195 కోట్ల ప్రభుత్వ నష్టం.. రూ.28 కోట్ల ముడుపుల ఆరోపణలు
ఆంధ్రప్రదేశ్ స్టేట్ బెవరేజెస్ కార్పొరేషన్ లిమిటెడ్ (APSBCL) నిర్వహించిన మద్యం రవాణా కాంట్రాక్టుల కేటాయింపుల్లో భారీగా అక్రమాలు జరిగాయని ఈడీ దర్యాప్తు సంస్థ పేర్కొంది. టెండర్ నిబంధనలను తమకు అనుకూలంగా మార్చుకుని, ఎంపిక చేసిన సంస్థలకే కాంట్రాక్టులు దక్కేలా చేశారని ఆరోపించింది. ఈ అక్రమాల వల్ల ప్రభుత్వ ఖజానాకు సుమారు రూ.195.33 కోట్ల మేర నష్టం వాటిల్లినట్లు ఈడీ గురిపించింది.
ముఖ్యంగా సుదర్శన్ కన్‌స్ట్రక్షన్స్‌ అనే సంస్థకు మద్యం రవాణా కాంట్రాక్టులు కట్టబెట్టేందుకు గాను సుమారు రూ.28 కోట్ల వరకు ముడుపులు (కిక్‌బ్యాక్స్) చెల్లించినట్లు దర్యాప్తు సంస్థ ఆధారాలు సేకరించినట్లు తెలుస్తోంది. గతంలో ఒక్క మద్యం కార్టన్ రవాణాకు రూ.19.60 ఖర్చు కాగా, కొత్త విధానంలో ఆ రేటును ఏకంగా రూ.32 నుంచి రూ.35కు పెంచారని, ఆపై అదే పనిని స్థానిక రవాణాదారులకు రూ.19 నుంచి రూ.22కే సబ్‌కాంట్రాక్టు ఇచ్చి వ్యత్యాస నిధులను దారిమళ్లించారని అధికారులు తేల్చారు.
ముమ్మరంగా ఈడీ దర్యాప్తు.. రూ.37.7 కోట్ల ఆస్తులు అటాచ్
ఈ కేసులో ఇప్పటికే కారుమూరి నాగేశ్వరరావు కుమారుడు కారుమూరి సునీల్‌కుమార్‌ను ఈడీ అరెస్ట్ చేసిన సంగతి తెలిసిందే. కాంట్రాక్టుల కేటాయింపులు, నిధుల మళ్లింపు ప్రక్రియలో సునీల్ కీలక పాత్ర పోషించారని ఈడీ తెలిపింది. ఈ క్రమంలోనే దర్యాప్తును వేగవంతం చేసిన అధికారులు కారుమూరి కుటుంబ సభ్యులకు చెందిన రూ.37.7 కోట్ల విలువైన ఆస్తులను తాత్కాలికంగా అటాచ్ చేశారు. హైదరాబాద్‌లోని కోకాపేట, ఖాజాగూడ భూములు, అనకాపల్లిలోని గ్రానైట్ క్వారీ లీజ్ హక్కులు, ఢిల్లీ, గురుగ్రామ్‌లోని ఖరీదైన ప్లాట్లు, వాణిజ్య ఆస్తులతో పాటు పలు వాహనాలు, డిపాజిట్లు ఈ జాబితాలో ఉన్నాయి.
ఆంధ్రప్రదేశ్ సీఐడీ నమోదు చేసిన ఎఫ్‌ఐఆర్ ఆధారంగా ఈడీ పీఎంఎల్‌ఏ (PMLA) చట్టం కింద ఈ మనీ లాండరింగ్ దర్యాప్తును చేపట్టింది. కారుమూరి నాగేశ్వరరావును విచారించిన అనంతరం అధికారులు నాంపల్లిలోని ఈడీ ప్రత్యేక కోర్టులో హాజరుపరచనున్నారు. అయితే ఈ ఆరోపణలన్నీ ప్రస్తుతం దర్యాప్తు దశలోనే ఉన్నాయని, న్యాయస్థానంలో నేరం రుజువయ్యే వరకు ఇవి ఆరోపణలుగానే పరిగణించబడతాయని గమనించాలి.