Opposition unity: ప్రధాని పదవి ఖాళీ లేదు.. మమత- నితీష్ భేటీపై బీజేపీ ఎద్దేవా

బీజేపీకి వ్యతిరేకంగా బిహార్ సీఎం నితీష్ కుమార్ ప్రతిపక్షాల ఐక్యత కోసం ప్రయత్నిస్తున్నారు. ఈ క్రమంలో దేశంలోని పలు కీలక నేతలతో భేటీలు అవుతున్నారు. బెంగాల్ సీఎం మమతా బెనర్జీతోనూ ఆయన సమావేశం అయ్యారు. సోమవారం హౌరాలోని రాష్ట్ర సచివాలయం నబన్నాలో మమతా బెనర్జీని సీఎం నితీశ్ కుమార్, ఆయన డిప్యూటీ తేజస్వీ యాదవ్ కలిశారు. వచ్చే ఏడాది లోక్‌సభ ఎన్నికలకు ముందు కేంద్రంలోని బిజెపి నేతృత్వంలోని ఎన్‌డిఎ ప్రభుత్వానికి వ్యతిరేకంగా ప్రతిపక్ష శక్తులను కూడగట్టడానికి బీహార్ సిఎం చేస్తున్న ప్రయత్నాలలో భాగంగా ఈ సమావేశం ప్రాముఖ్యతను సంతరించుకుంది. దీంతో బీజేపీ తనదైన శైలిలో స్పందించింది.
Also Read: Ys Sunitha Political Entry Live: వైఎస్ సునీతారెడ్డి పొలిటికల్ ఎంట్రీ?

బీహార్ ముఖ్యమంత్రి నితీష్ కుమార్ పశ్చిమ బెంగాల్ సీఎం మమతా బెనర్జీతో సమావేశం కావడంపై బీజేపీ నేత సయ్యద్ షానవాజ్ హుస్సేన్ మాట్లాడుతూ వచ్చే ఏడాది జరగనున్న లోక్‌సభ ఎన్నికల్లో ప్రధానమంత్రి పదవికి ఖాళీ లేదని అన్నారు. ప్రధానమంత్రి నరేంద్రమోదీ నాయకత్వంలో బిజెపి నేతృత్వంలోని ఎన్‌డిఎ మూడవ సారి తిరిగి రావడంలోకి రావడం ఖాయమని ధీమా వ్యక్తం చేశారు.
మహాకూటమిలో ప్రతిపక్షాలకు బలం చేకూర్చేందుకు చేసిన ప్రయత్నాలపై నితీష్‌ను ఎగతాళి చేస్తూ, “నితీష్ కుమార్ మా మద్దతు తీసుకుని సీఎం అయ్యారు. అతని పార్టీ మూడవ స్థానంలో ఉంది [బీహార్‌లో ఎమ్మెల్యేల పరంగా]. అతను దేశానికి ప్రధాని కావాలని కలలు కంటున్నాడు. దేశంలో ప్రధాని పదవి ఖాళీ లేదని నితీష్ కుమార్ కు తెలుసు. అందుకే తాను అభ్యర్థిని కానని, ప్రతిపక్షాలను మాత్రమే ఏకం చేస్తున్నానని చెబుతున్నారు” అని ఎద్దేవా చేశారు.