Jagadish Reddy : పవన్ వ్యాఖ్యలు ఐటెం సాంగ్స్‌లాంటివే.. జగదీష్ రెడ్డి సెటైర్లు.!

Jagadish Reddy : జనసేన పార్టీపై, కాంగ్రెస్ ప్రభుత్వంపై సూర్యాపేట ఎమ్మెల్యే, మాజీ మంత్రి జగదీష్ రెడ్డి తీవ్రస్థాయిలో విమర్శలు గుప్పించారు. తెలంగాణలో జనసేన అనేది అస్సలు లేని పార్టీ అని, ఆ పార్టీ అధినేత పవన్ కళ్యాణ్ మాట్లాడే మాటలు సినిమాలో వచ్చే ఐటెం సాంగ్స్ తరహాలో ఉంటాయని ఆయన ఎద్దేవా చేశారు. కాంగ్రెస్, జనసేన, ప్రధాని మోడీ కలిసి ఈ విధమైన సరికొత్త డ్రామాలు ఆడుతున్నారని ఆరోపించారు. ఇలాంటి ఐటెం సాంగ్స్ రాజకీయాల్లో అప్పుడప్పుడు వస్తుంటాయని, వాటిని ఎవరూ పెద్దగా పట్టించుకోవాల్సిన అవసరం లేదని ఆయన వ్యాఖ్యానించారు.

ఇదే సమయంలో తెలంగాణలోని రైతుల సమస్యలపై స్పందిస్తూ కాంగ్రెస్ ప్రభుత్వానికి జగదీష్ రెడ్డి గట్టి హెచ్చరికలు జారీ చేశారు. రైతులు కష్టపడి పండించిన ప్రతి పంట గింజను ప్రభుత్వం ఖచ్చితంగా కొనుగోలు చేయాల్సిందేనని ఆయన డిమాండ్ చేశారు. ఈ విషయంలో బీఆర్ఎస్ పార్టీ ఎల్లప్పుడూ రైతులకు అండగా నిలబడుతుందని స్పష్టం చేశారు. ఒకవేళ ప్రభుత్వం రైతుల నుండి పంటను సేకరించడంలో విఫలమైతే, ఈ ‘హైబ్రిడ్ కాంగ్రెస్’ ప్రభుత్వాన్ని తాము గట్టిగా నిలదీస్తామని, వారి భరతం పడతామని ఆయన హెచ్చరించారు.