ఉస్మానియాలో ఊడిపడిన ఫ్యాన్‌.. డ్యూటీ డాక్టర్ కు గాయాలు..

తెలంగాణ ప్రభుత్వ ఆసుపత్రుల్లోనే ఆగ్రస్థానంలో ఉస్మానియా ఆసుపత్రి ఉంది. పేదవారికి సంజీవినిలా ఉన్న ఈ ఆసుపత్రిలో సౌకర్యాలు మాత్రం అంతంతమాత్రంగానే ఉన్నాయనడానికి ఈ ఘటనే నిదర్శనం. ఉస్మానియా ఆసుపత్రిలో డెర్మటాలజీ విభాగంలో ఓ ప్రమాదం చోటు చేసుకుంది. డెర్మటాలజీ డిపార్ట్‌మెంట్‌లో డ్యూటీలో ఉన్న భువనశ్రీ అనే మహిళా డాక్టర్‌ పై సీలింగ్‌ ఫ్యాన్‌ ఊడిపడింది.

దీంతో ఆమె తలకు గాయాలయ్యాయి. పేద ప్రజలకు ఆపద్భాంధువులా ఉండే ఈ ఉన్నత శ్రేణి ఆసుపత్రిలో ఇలా జరగడంతో చికిత్సకు వచ్చిన రోగులు భయాందోళనలకు గురవుతున్నారు. ఆసుపత్రిలో పరిస్థితి ఇలా ఉంటే ఎలా అంటూ ప్రశ్నిస్తున్నారు. ఎప్పడూ రోగులతో రద్దీగా ఉండే ఉస్మానియా ఆసుపత్రిలో ఇలాంటి ఘటనలు పునరావృతం కాకుండా చూడాలని కోరుతున్నారు.