Most Runs in IPL History: ఇండియన్ ప్రీమియర్ లీగ్ (ఐపీఎల్) క్రికెట్లో బ్యాటర్లకు స్వర్గధామంగా భావించబడుతుంది. సీనియర్, జూనియర్ అనే తేడా లేకుండా.. ప్రతి బ్యాటర్ విరుచుకుపడుతుంటాడు. ఈ క్రమంలో ప్రతి సీజన్లో భారీ స్కోర్లు, రికార్డుల వర్షం కురుస్తుంటాయి. మరికొన్ని రోజుల్లో ఐపీఎల్ 2026 ఆరంభం కానుంది. ఈ నేపథ్యంలో ఐపీఎల్ చరిత్రలో అత్యధిక పరుగులు సాధించిన ఆటగాళ్ల జాబితాను ఓసారి చూద్దాం. ఇప్పటి వరకు జరిగిన సీజన్లను పరిశీలిస్తే.. టాప్-10లో నిలిచిన ఆటగాళ్లు అందరూ దిగ్గజాలే ఉన్నారు.
ఐపీఎల్ చరిత్రలో అత్యధిక పరుగులు చేసిన ఆటగాడిగా టీమిండియా స్టార్ బ్యాటర్, రికార్డుల కింగ్ విరాట్ కోహ్లీ అగ్రస్థానంలో ఉన్నాడు. కింగ్ 267 మ్యాచ్ల్లో 8661 పరుగులు చేశాడు. రన్ మెషీన్గా పేరొందిన కోహ్లీ నిరంతర ప్రదర్శనతో ఈ రికార్డును నెలకొల్పాడు. రెండో స్థానంలో టీమిండియా మాజీ కెప్టెన్ రోహిత్ శర్మ ఉన్నాడు. హిట్మ్యాన్ 272 మ్యాచ్లలో 7046 పరుగులు చేశాడు. మూడో స్థానంలో భారత మాజీ ఓపెనర్ శిఖర్ ధావన్ నిలిచాడు. గబ్బర్ 222 మ్యాచ్ల్లో 6769 రన్స్ బాదాడు. ధావన్ తన స్థిరమైన ఆట శైలి ఐపీఎల్లో టాప్ బ్యాటర్లలో ఒకరిగా నిలబెట్టింది.
Also Read: Divyang Shakti Scheme: నేడు ‘దివ్యాంగ శక్తి’ పథకం ప్రారంభం.. ఉచిత ప్రయాణాన్ని ప్రారంభించనున్న సీఎం!
నాలుగో స్థానంలో ఆస్ట్రేలియా మాజీ ఓపెనర్ డేవిడ్ వార్నర్ ఉన్నాడు. 184 మ్యాచ్లలో 6565 పరుగులు చేశాడు. ఐదో స్థానంలో మిస్టర్ ఐపీఎల్ సురేష్ రైనా (205 మ్యాచ్ల్లో 5528) పరుగులతో నిలిచాడు. రైనా ఐపీఎల్లో అత్యంత స్థిరమైన బ్యాటర్లలో ఒకరిగా గుర్తింపు పొందాడు. ఆరవ స్థానంలో మోస్ట్ సక్సెస్ ఫుల్ కెప్టెన్ ఎంఎస్ ధోనీ ఉన్నాడు. మహీ 278 మ్యాచ్లలో 5383 పరుగులు చేశాడు. తన ఫినిషింగ్ స్టైల్తో మ్యాచ్లను మలుపుతిప్పే ధోనీ ప్రత్యేక గుర్తింపు సంపాదించాడు. ఏడో స్థానంలో దక్షిణాఫ్రికా దిగ్గజం ఏబీ డివిలియర్స్ (5162) ఉన్నాడు. అతని వినూత్న షాట్లు అభిమానులను ఎప్పటికీ అలరిస్తాయి. కేఎల్ రాహుల్ (5054), క్రిస్ గేల్ (4965), రాబిన్ ఉతప్ప (4952)లు టాప్-10 జాబితాలో ఉన్నారు.