‘రాజధాని ఫైల్స్’ సినిమా విడుదలను ఆపండి..! హైకోర్టులో పిటిషన్
ఆంధ్రప్రదేశ్ రాజకీయాల చుట్టూ తిరుగుతోన్న సినిమాలపై రాజకీయ నేతలు కోర్టులకు ఎక్కుతున్నారు.. ఇప్పటికే వివాదాస్పద దర్శకుడిగా పేరుతెచ్చున్న రాంగోపాల్వర్మ తెరకెక్కించిన ‘వ్యూహం’ సినిమాపై హైకోర్టుకు వెళ్లారు టీడీపీ నేతలు.. ఇప్పుడు.. ‘రాజధాని ఫైల్స్’ సినిమా విడుదలను ఆపాలంటూ హైకోర్టు మెట్లు ఎక్కింది వైఎస్ఆర్ కాంగ్రెస్ పార్టీ.. అయితే, ఆ పిటిషన్పై మంగళవారం హైకోర్టులో విచారణ జరిగింది. ఇరువైపుల వాదనలు ముగియడంతో మధ్యంతర ఉత్తర్వుల జారీ వ్యవహారంపై నిర్ణయాన్ని ధర్మాసనం వాయిదా వేసింది. సినిమాకు సెన్సార్ సర్టిఫికెట్ రద్దు చేయాలని పిటిషన్లో పేర్కొన్నారు.. సినిమా విడుదల నిలిపివేస్తూ ఆదేశాలు ఇవ్వాలని కోరారు పిటిషనర్.. విచారణ జరిపిన ఏపీ హైకోర్టు.. తీర్పు రిజర్వ్ చేస్తూ ఆదేశాలు జారీ చేసింది.. అయితే, రాజధాని ఫైల్స్ సినిమా విడుదల నిలిపి వేయాలని పిటిషన్ వేశారు వైసీపీ ఎమ్మెల్సీ లెళ్ల అప్పిరెడ్డి.. ఈ సినిమాలో సీఎం వైఎస్ జగన్, మాజీ మంత్రి కొడాలి నానిని పోలిన పాత్రలను పెట్టారి.. దానిద్వారా వాళ్లను కించ పరిచేలా చిత్రీకరణ చేశారని పిటిషనర్ వాదనగా ఉంది.. ఎన్నికల ముందు ప్రభుత్వానికి చెడ్డ పేరు తెచ్చేలా.. ఈ సినిమా విడుదల చేస్తున్నారు అని కోర్టులో వాదనలు వినిపించారు.. సినిమా విడుదల నిలిపివేయాలంటూ దాఖలైన లంచ్ మోషన్ పిటిషన్ పై విచారణ సందర్భంగా.. డిసెంబర్ 18న సెన్సార్ బోర్డు సర్టిఫికెట్ ఇచ్చిందని కోర్టు దృష్టికి తీసుకెళ్లారు సినీ నిర్మాత అడ్వకేట్.. స్క్రీనింగ్ కమిటీ కొన్ని అభ్యంతరాలు చెబితే వాటిని తొలగించామని.. ఆ తర్వాతే సెన్సార్ సర్టిఫికెట్ ఇచ్చిందని తెలిపారు. అయితే, ఇప్పుడు అభ్యంతరం తెలపటం సరికాదన్నారు.. మేం ఎవరిని కించ పరిచే విధంగా సినిమా తీయలేదనీ కోర్టు దృష్టికి తీసుకెళ్లారు.. 13 సీన్స్ తొలగించాలని చెబితే తీసేసారనీ, అందుకే సెన్సార్ సర్టిఫికెట్ ఇచ్చామని తెలిపారు సెన్సార్ బోర్డు అడ్వకేట్.. అన్ని వార్గాల వాదనలు విన్న హైకోర్టు ధర్మాసనం నిర్ణయాన్ని వాయిదా వేయగా.. ఈ రోజు.. ఈ సినిమాపై ఆర్డర్స్ ఇచ్చే అవకాశాలు కనిపిస్తున్నాయి.
రేపు రెండు జిల్లాలో సీఎం జగన్ పర్యటన
ఆంధ్రప్రదేశ్ ముఖ్యమంత్రి వైఎస్ జగన్మోహన్రెడ్డి.. రేపు అనగా ఈ నెల 15వ తేదీన రెండు జిల్లాల్లో పర్యటించనున్నారు.. ఇప్పటికే వరుసగా ప్రభుత్వ కార్యక్రమాలు ఓవైపు.. పార్టీ కార్యక్రమాలు మరోవైపు.. ప్రైవేట్ కార్యక్రమాలు ఇంకో వైపు.. ఇలా నిత్యం బిజీగా గడుపుతోన్న వైసీపీ అధినేత, సీఎం వైఎస్ జగన్.. రేపు.. కర్నూలు, గుంటూరు జిల్లాల్లో పర్యటిస్తారు.. ఈ నెల 15వ తేదీన ఉదయం కర్నూలులో ఎమ్మిగనూరు ఎమ్మెల్యే చెన్నకేశవరెడ్డి మనవడి వివాహానికి హాజరుకానున్నారు సీఎం జగన్.. ఇక, మధ్యాహ్నం తర్వాత గుంటూరు జిల్లా ఫిరంగిపురంలో వలంటీర్ల అభినందన సభలో పాల్గొంటారు ఏపీ సీఎం.. ఇక, రేపు రెండు జిల్లాల పర్యటన కోసం.. ఉదయం 9.30 గంటలకు తాడేపల్లిలోని తన నివాసం నుంచి బయలుదేరి కర్నూలు చేరుకుంటారు సీఎం జగన్.. అక్కడ బళ్లారి రోడ్లోని ఫంక్షన్ హాల్లో ఎమ్మిగనూరు ఎమ్మెల్యే చెన్నకేశవరెడ్డి మనవడి వివాహానికి హాజరై.. నూతన దంపతులను ఆశీర్వదించనున్నారు.. ఆ తర్వాత మధ్యాహ్నం తిరిగి తాడేపల్లి చేరుకోనున్న సీఎం జగన్.. ఆ తర్వాత గుంటూరు పర్యటనకు వెళ్తారు.. దీనికోసం.. రేపు మధ్యాహ్నం 2.40 గంటలకు తాడేపల్లిలోని తన నివాసం నుంచి బయలుదేరి.. గుంటూరు జిల్లా ఫిరంగిపురం మండలం రేపూడి చేరుకుంటారు.. అక్కడ నిర్వహించనున్న వలంటీర్ల అభినందన సభలో పాల్గొననున్నారు ముఖ్యమంత్రి.. అనంతరం సాయంత్రం తిరిగి తాడేపల్లి చేరుకుంటారు సీఎం వైఎస్ జగన్మోహన్రెడ్డి.
ప్రేమించి పెళ్లి చేసుకుంది.. లవర్స్ డే రోజు ప్రాణాలు విడిచింది..!
ప్రేమికుల రోజు నాడే ఏపీలో ఓ విషాద ఘటన చోటు చేసుకుంది.. అంబేద్కర్ కోనసీమ జిల్లా ముమ్మిడివరం నియోజకవర్గంలో ఈ ఘటన జరిగింది.. కాట్రేనికోన మండలం కుండలేశ్వరం గ్రామానికి చెందిన జొన్నాడ సత్య దుర్గా ప్రసాద్.. ముమ్మిడివరం మండలం సోమిదేవరపాలెం గ్రామానికి చెందిన పెయ్యల దుర్గలు.. కొంత కాలం ప్రేమించుకున్నారు.. ఆ తర్వాత 2022లో పెద్దల సమక్షంలో పేళ్లి చేసుకొని ఒక్కటయ్యారు.. అయితే, గత కొన్ని రోజులుగా భార్యా భర్తల మధ్య తరచూ గొడవలు జరుగుతున్నాయని స్థానికులు చెబుతున్నారు.. ఇక, మీ కూతురు ఆరోగ్యం బాగోలేదంటూ.. దుర్గ తల్లిదండ్రులకు ఫోన్ చేశాడు దుర్గా ప్రసాద్.. హుటాహుటిన బయలుదేరి.. కూతురు ఇంటికి వెళ్లిన దుర్గ తల్లిదండ్రులు షాక్ తిన్నారు.. ఆమె మరణించి ఉండడంతో మృతదేహాన్ని చూసి కన్నీరు మున్నీరయ్యారు.. అల్లుడు దుర్గాప్రసాదే తమ కుమార్తెను కొట్టి చంపాడని వారు ఆరోపిస్తున్నారు.. దుర్గ సోదరుడు శ్రీను ఫిర్యాదు మేరకు కేసు నమోదు చేసిన పోలీసులు.. దర్యాప్తు చేపట్టారు.. మరోవైపు.. దుర్గ మృతదేహాన్ని పోస్టుమార్టం నిమిత్తం ఆస్పత్రికి తరలించారు. భార్యాభర్తల మధ్య గొడవ కారణంగా దుర్గ ప్రాణాలు తీసుకుందా? నిత్యం గొడవలు జరుగుతుండడంతో.. దుర్గాప్రసాదే.. దుర్గ ప్రాణాలు తీశాడా? ఇంకా ఏవైనా కారణాలు ఉన్నాయా? అనే కోణంలో పోలీసుల విచారణ కొనసాగుతోంది.. మొత్తంగా ప్రేమించి.. పెద్దలను ఒప్పించి.. పెళ్లి చేసుకున్న ఓ యువతి ప్రాణాలు.. ప్రేమికుల రోజు నాడే పోవడం విషాదంగా మారింది.
మేడారం జాతరకు బస్ ఛార్జీలు ఖరారు.. ఎంతో తెలుసా?
ఫిబ్రవరి 21 నుంచి ప్రారంభం కానున్న మేడారం మహాజాతరలో వనదేవతలను దర్శించుకునేందుకు దాదాపు లక్షన్నర మంది భక్తులు వచ్చే అవకాశం ఉందని అధికారులు అంచనా వేస్తున్నారు. ఈ మేరకు ప్రభుత్వం రూ.105 కోట్లతో జాతర ఏర్పాట్లు చేస్తోంది. ఈసారి మేడారం భక్తులను తీసుకొచ్చేందుకు రాష్ట్ర రోడ్డు రవాణా సంస్థ టీఎస్ఆర్టీసీ 51 కేంద్రాల నుంచి ఏకకాలంలో ఆరు వేలకు పైగా బస్సులను నడిపేందుకు కసరత్తు చేస్తోంది. మహాలక్ష్మి పథకంలో భాగంగా ఇప్పటికే మహిళలకు ఉచిత రవాణా సౌకర్యం కల్పించామని, గత జాతరలతో పోలిస్తే ఈ ఏడాది ఆర్టీసీ బస్సుల్లో వచ్చే భక్తుల సంఖ్య పెరిగే అవకాశం ఉందని అధికారులు అంచనా వేస్తున్నారు. మహాలక్ష్మి పథకం అమలు నేపథ్యంలో రాష్ట్రవ్యాప్తంగా నడిచే ఆరు వేలకు పైగా ఆర్టీసీ బస్సుల్లో సుమారు 40 లక్షల మంది ప్రయాణించే అవకాశం ఉందని అధికారులు అంచనా వేస్తున్నారు. ఈ మేరకు ప్రయాణించే భక్తులకు ఆర్టీసీ ఛార్జీలను కూడా టీఎస్ఆర్టీసీ నిర్ణయించింది. టీఎస్ఆర్టీసీ రాష్ట్రవ్యాప్తంగా 6వేలకు పైగా బస్సులను నడిపే అవకాశం ఉండగా, ఉమ్మడి వరంగల్ జిల్లా నుంచి దాదాపు 2,500 బస్సులు నడపడానికి అవకాశం ఉందని అధికారులు చెబుతున్నారు. 10 నుంచి 15 లక్షల మంది భక్తులు ఆర్టీసీ సేవలను వినియోగించుకునే అవకాశం ఉందని పేర్కొన్నారు. ఈ మేరకు ఉమ్మడి వరంగల్ జిల్లాలోని 22 ప్రాంతాల నుంచి బస్సులు నడిపేందుకు అధికారులు ఏర్పాట్లు చేస్తున్నారు. ఇప్పటికే అడ్వాన్స్ చెల్లించిన వారి కోసం ప్రత్యేక మేడారం బస్సులు నడుపుతున్నారు. ఈ నెల 21 నుంచి 24 వరకు మహాజాతర జరగనుండగా.. ప్రభుత్వం నిర్ణయించిన మేరకు ఈ నెల 18 నుంచి 25 వరకు 6 వేల బస్సులు నడపనున్నట్లు అధికారులు స్పష్టం చేశారు.
తెలుగు రాష్ట్రాల్లో మొదలైన పెళ్లి సందడి.. రానున్న మూడు నెలల్లో మంచి ముహూర్తాలు..
పుష్య మాసం ముగిసి మాఘమాసం వచ్చింది. మాఘమాసంలో వివాహ శుభ కార్యాలకు పెట్టింది పేరు. ముఖ్యంగా పెళ్లిళ్ల సీజన్. ఈ రెండు మూడు నెలల్లో ఫంక్షన్ హాళ్లు, కల్యాణ మండపాలు, ఆలయాలు పెళ్లిళ్లతో సందడిగా మారాయి. తెలుగు పంచాంగం ప్రకారం ఫిబ్రవరి 13 (మంగళవారం) నుంచి ఏప్రిల్ 26 వరకు దివ్య ముహూర్తాలు ఉన్నాయని.. ఈ 70 రోజుల్లో దాదాపు 30 శుభ ముహూర్తాలు ఉన్నాయని అర్చకులు తెలిపారు. ఇక పెళ్లిళ్లు, అక్షరాభ్యాసాలు, గృహప్రవేశాలు, ఇతర శుభకార్యాలతో బంధు మిత్రులతో సందడి వాతావరణం కనిపిచనుంది.. ఈ సీజన్లో తెలుగు రాష్ట్రాల్లో దాదాపు 2 లక్షల వివాహాలు జరుగుతాయని అంచనా. ఫిబ్రవరి, మార్చి, ఏప్రిల్లతో పాటు నవంబర్, డిసెంబర్లలో మంచి ముహూర్తాలు ఉంటాయని పండితులు తెలిపారు. దీంతో వివాహాలు, కొత్త గృహ ప్రవేశాలు, గృహ నిర్మాణాలకు శంకుస్థాపనలు జోరుగా సాగుతున్నాయి. నేటి నుంచి ప్రారంభం కానున్న పెళ్లిళ్ల హడావుడి మరో మూడు నెలల పాటు కొనసాగుతుందని పురోహితులు చెబుతున్నారు. ఆ తర్వాత గురు మౌఢ్యం, శుక్ర మౌఢ్యం, శూన్య మాసాలు కావడంతో మే, జూన్, ఆగస్టు, సెప్టెంబర్, అక్టోబర్ మాసాల్లో శుభకార్యాలకు ముహూర్తాలు ఉండవు. మాఘమాసంలో వసంత పంచమి రోజున ప్రతి సంవత్సరం వేల వివాహాలు జరుగుతాయి. సరస్వతీమాత జన్మదినం కావడంతో వసంత పంచమి నాడు శుభకార్యాలు, వివాహాలు నిర్ణయించబడతాయి. ఈ సంవత్సరం వసంత పంచమి ఫిబ్రవరి 14న అంటే ప్రేమికుల రోజున వస్తుంది. దీంతో పెళ్లికి సిద్ధమైన జంటలు ఈ రోజే కలిసేందుకు ముహూర్తం ఫిక్స్ చేసుకుంటున్నారు.
మరిచిపోలేని దుర్ధినం.. దేశం 40మంది వీరులను కోల్పోయిన క్షణం
సీఆర్పీఎఫ్ కాన్వాయ్ జమ్మూ నుండి బయటకు వచ్చింది. సైనికులు నవ్వుతూ, పాడుతూ ముందుకు సాగుతున్నారు. ఏమి జరుగుతుందో ఎవరికీ తెలియదు? గమ్యం కేవలం 30 కి.మీ దూరంలో ఉండగా.. కాన్వాయ్లోకి వేగంగా వచ్చిన ఈకో కారు బస్సును ఢీకొట్టింది. మరు క్షణంలోనే భారీ పేలుడు సంభవించింది. దీని ప్రతిధ్వని 10 కిలోమీటర్ల వరకు వినిపించింది. పొగతో ఆ ప్రాంతమంతా కారు చిమ్మట్లు కమ్ముకుంది. ఆ పొగలో కారు గానీ, కారు ఢీకొన్న బస్సు గానీ కనిపించలేదు. ఆఖరికి బస్సు శిథిలాలు, వీర కుమారుల మృతదేహాలు మాత్రమే మిగిలాయి. అయితే, పుల్వామాలో ఉగ్రదాడి జరిగి ఐదేళ్లు గడిచినా దాని గాయాలు ప్రతి భారతీయుడి గుండెల్లో ఇప్పటికీ తాజాగా ఉన్నాయి. ఇదే దాడి తర్వాత దేశప్రజల ఆగ్రహం ఆకాశాన్ని అంటింది. కన్నీళ్లకు ప్రతీకారం తీర్చుకుంటానని ప్రధాని మోడీ స్వయంగా దేశప్రజలకు హామీ ఇచ్చారు. శత్రువులపై ఎప్పుడు, ఎలా ప్రతీకారం తీర్చుకోవాలో నిర్ణయించుకునేందుకు సాయుధ బలగాలకు ప్రధాని మోడీ పూర్తి స్వేచ్ఛ ఇచ్చారు. సరిగ్గా 12 రోజుల తరువాత పుల్వామా దాడిలో వీరమరణం పొందిన 40 మంది వీర కుమారుల బలిదానానికి భారతదేశం ప్రతీకారం తీర్చుకుంది. భారత వైమానిక దళం విమానాలు సర్జికల్ స్ట్రైక్స్ నిర్వహించడం ద్వారా పాకిస్తాన్లోని బాలాకోట్ను వణికించాయి. ఫిబ్రవరి 14 ఉదయం జమ్మూ నుండి 78 బస్సులతో కూడిన CRPF కాన్వాయ్ శ్రీనగర్కు బయలుదేరింది. ఈ కాన్వాయ్లో 2500 మందికి పైగా సైనికులు ఉన్నారు. ఈ ఆర్మీ కాన్వాయ్ గురించి ఉగ్రవాదులకు పక్కా సమాచారం ఉంది. నెలరోజుల ముందే దాడికి కుట్ర పన్నారని, 3 గంటలకు పుల్వామా మీదుగా కాన్వాయ్ వెళ్లేసరికి ఉగ్రవాది ఆదిల్ అహ్మద్ దార్ కారుతో కాన్వాయ్లోకి ప్రవేశించాడు. ఈ కారులో 100 కిలోలకు పైగా పేలుడు పదార్థాలు ఉన్నాయి. పేలుడు ధాటికి కాన్వాయ్లోని చాలా బస్సుల అద్దాలు పగిలిపోయాయి. పలువురు సైనికులు గాయపడ్డారు. CRPF 76వ బెటాలియన్కు చెందిన 40 మంది వీరులు వీరమరణం పొందారు. గన్పౌడర్ వాసన కొన్ని కిలోమీటర్ల వరకు గాలిలో ఉంది. వీక్షకులు సైతం వణికిపోయేలా ఆ దృశ్యం భయానకంగా ఉంది.
నేడు యూఏఈలో హిందూ ఆలయాన్ని ప్రారంభించనున్న ప్రధాని మోడీ
ముస్లిం దేశంలో తొలి ఐకానిక్ బీఏపీఎస్ హిందూ ఆలయాన్ని భారత ప్రధాన మంత్రి నరేంద్ర మోడీ ప్రారంభించనున్నారు. అలాగే, అక్కడున్న హిందూ కమ్యూనిటీని ఉద్దేశించి మోడీ ప్రసంగించబోతున్నారు.సుమారు 700 కోట్ల రూపాయలతో నిర్మించిన ఈ అద్భుత ఆలయాన్ని బీఏపీఎస్ స్వామినారాయణ్ ఇనిస్టిట్యూట్ నిర్మించింది. ఈ ఆలయాన్ని నిర్మించడంలో ఆధ్యాత్మిక గురువు మహంత్ స్వామి మహరాజ్ సహకారం ఉంది. కాగా, యూఏఈలో ప్రారంభిస్తున్న తొలి హిందూ దేవాలయం.. అబుదాబిలోని అబు మురీఖా ప్రాంతంలో ఈ మందిరం 27 ఎకరాల్లో విస్తరించి ఉంది. ఆలయం ప్రారంభానికి దాదాపు 2 నుంచి 5 వేల మంది భక్తులు టెంపుల్ ను సందర్శఇంచే ఛాన్స్ ఉందని భారత విదేశాంగ కార్యదర్శి వినయ్ మోహన్ క్వాత్రా పేర్కొన్నారు. 2019 ఏప్రిల్ లో శంకుస్థాపన చేయగా.. అదే ఏడాది డిసెంబర్ లో ఆలయ నిర్మాణ పనులు స్టార్ట్ అయ్యాయి. క్రౌన్స్ ప్రిన్స్ ఆఫ్ అబుదాబి, యూఏఈ సాయుధ దళాల డిప్యూటీ సుప్రీం కమాండర్ మొహమ్మద్ బిన్ జాయెద్ అల్ నహ్యాన్ ఆలయ నిర్మాణం కోసం 2015లో 13.5 ఎకరాల భూమిని విరాళంగా అందించారు.. 2019 జనవరిలో యూఏఈ ప్రభుత్వం మరో 13.5 ఎకరాలను ఆలయ నిర్మాణం కోసం గిఫ్ట్ ఇచ్చింది. ఈ హిందూ ఆలయ నిర్మాణానికి సుమారు 400 మిలియన్ యునైటెడ్ అరబ్ ఎమిరేట్స్ దిర్హామ్ లు ( రూ. 700 కోట్లు ) అయ్యాయి.
ట్రయంఫ్ స్క్రాంబ్లర్ 400X లాంచ్.. ధర ఎంతో తెలుసా?
ఈ మధ్య మార్కెట్ లోకి కొత్త కొత్త బైకులు సరికొత్త ఫీచర్స్ తో వస్తున్నాయి.. ట్రయంఫ్ స్క్రాంబ్లర్ 400X అనే బైకును మార్కెట్ లోకి విడుదల చేసింది .. ఇక ఈ కంపెనీ తాజాగా స్క్రాంబ్లర్ 1200 మోటార్సైకిల్ను భారత మార్కెట్లో విడుదల చేసింది.. ఈ బైకు ఫీచర్స్, ధర గురించి ఇప్పుడు వివరంగా తెలుసుకుందాం.. ట్రయంఫ్ స్క్రాంబ్లర్ 1200లో మీరు 270-డిగ్రీ క్రాంక్తో 1,200 cc సమాంతర-ట్విన్ ఇంజన్ని పొందుతారు. ఈ ఇంజన్ 89 bhp పవర్ అవుట్పుట్, 110 Nm టార్క్ ఉత్పత్తి చేస్తుంది. దీనితో మీరు 6-స్పీడ్ గేర్బాక్స్ పొందుతారు.. హై స్పీడ్ ను కూడా అనుభూతి చెందుతారు.. ఈ బైకు సఫైర్ బ్లాక్, కార్నివాల్ రెడ్, యాష్ గ్రే అనే మూడు రంగులలో ఈ బైక్ విడుదల చేయబడింది. మీరు ఇందులో డిజిటల్ ఇన్స్ట్రుమెంట్ క్లస్టర్ను కూడా పొందబోతున్నారు. ఇది ట్రయంఫ్ 660 సీసి మోటార్సైకిళ్లలో కూడా చూపబడింది. ఈ డిజిటల్ ఇన్స్ట్రుమెంట్ క్లస్టర్లో ఐదు రైడింగ్ మోడ్లతో పాటు బ్లుటూత్ కనెక్ట్ ను కూడా కలిగి ఉంటుంది.. హార్లే-డేవిడ్సన్ ఈ ధరలో చాలా తక్కువ ఫీచర్లను అందిస్తోంది. హార్లే-డేవిడ్సన్ ఐరన్ ఇంజన్ సామర్థ్యం కూడా 883 cc మాత్రమే అయితే ట్రయంఫ్ స్క్రాంబ్లర్లో మీరు 1,200 సిసి సమాంతర-ట్విన్ ఇంజన్ని పొందుతారు.. ఇక ధర విషయానికొస్తే.. కంపెనీ రూ. 11.83 లక్షల ప్రారంభ ధర (ఎక్స్-షోరూమ్)తో పరిచయం చేసింది. ఇది నేరుగా హార్లే-డేవిడ్సన్ ఐరన్ 883తో పోటీ పడుతుందని చెబుతున్నారు.. ఫ్రీ బుకింగ్ ఆఫర్స్ కూడా ఉన్నట్లు తెలుస్తుంది..
రోజు రోజుకు పెరుగుతున్న పేటీఎం కష్టాలు.. 9రోజుల్లో రూ.24వేల కోట్లు ఖతం
ఆర్బిఐ గవర్నర్ శక్తికాంత దాస్ వైఖరితో Paytm స్టాక్ మంగళవారం మార్కెట్లో చాలా భయాందోళనలకు గురై 10 శాతం దిగువ సర్క్యూట్లో ట్రేడవుతోంది. దీని కారణంగా Paytm షేర్ రికార్డు స్థాయికి చేరుకుంది. ఆర్బిఐ నుండి ఆర్డర్ వచ్చినప్పటి నుండి కంపెనీ షేర్లలో 50 శాతానికి పైగా క్షీణత ఉంది. అలాగే ఈ కాలంలో కంపెనీ వాల్యుయేషన్ రూ.24,000 కోట్లకు పైగా పెరిగింది. స్టాక్ మార్కెట్లో Paytm ఎలాంటి గణాంకాలను చూపుతుందో తెలుసుకుందాం. Paytm బ్రాండ్ మాతృ సంస్థ అయిన One97 కమ్యూనికేషన్స్ లిమిటెడ్ షేర్లు మంగళవారం 10 శాతం పడిపోయి రికార్డు స్థాయికి చేరుకున్నాయి. Paytm పేమెంట్స్ బ్యాంక్పై ఎలాంటి సమీక్షను రిజర్వ్ బ్యాంక్ ఆఫ్ ఇండియా తోసిపుచ్చిన తర్వాత మొదటిసారిగా రెండు ప్రధాన మార్కెట్లలో One97 కమ్యూనికేషన్స్ షేర్లు రూ.400 దిగువకు పడిపోయాయి. ఎన్ఎస్ఈలో ఈ షేరు 10 శాతం పతనమై రూ.380, బీఎస్ఈలో రూ.380.35 దిగువ సర్క్యూట్ వద్ద ముగిసింది. ఇది గత 52 వారాల కనిష్ట స్థాయి. రోజు మొత్తంలో ఎన్ఎస్ఈలో కంపెనీకి చెందిన 1.14 కోట్ల షేర్లు, బీఎస్ఈలో 15.92 లక్షల షేర్లు ట్రేడయ్యాయి.
బీసీసీఐ వార్నింగ్.. వెనక్కితగ్గిన ఇషాన్ కిషన్!
టీమిండియా వికెట్ కీపర్ ఇషాన్ కిషన్ దూకుడు కాస్త తగ్గినట్టు ఉంది. సెంట్రల్ కాంట్రాక్ట్ ఉన్న ఆటగాళ్లు జాతీయ జట్టులోకి తిరిగి రావాలంటే దేశవాలీ టోర్నీల్లో తప్పక ఆడాలని బీసీసీఐ వార్నింగ్ ఇచ్చిన నేపథ్యంలో.. ఈ వారంలో రాజస్థాన్తో జరిగే జార్ఖండ్ చివరి రంజీ ట్రోఫీ లీగ్ గేమ్లో ఇషాన్ ఆడనున్నాడని తెలుస్తోంది. అంతేకాదు త్వరలో ప్రారంభంకానున్న డీవై పాటిల్ టోర్నీలో కూడా పాల్గొనాలని నిర్ణయించుకున్నాడట. ఐపీఎల్ 2024 ప్రాక్టీస్ను పక్కన పెట్టి దేశవాలీ మ్యాచ్లు ఆడేందుకు సిద్దమయ్యాడట. 2023 డిసెంబర్ నుంచి ఇషాన్ కిషన్ భారత జట్టుకు దూరంగా ఉంటున్నాడు. ఈ ఏడాది ఆరంభంలో దక్షిణాఫ్రికా పర్యటనకు వెళ్లిన ఇషాన్.. వ్యక్తిగత కారణాలతో సిరీస్ ఆరంభానికి ముందే స్వదేశానికి వచ్చాడు. అప్పటి నుంచి బీసీసీఐ, టీమ్ మేనెజ్మెంట్తో టచ్లో లేడు. స్వదేశంలో ఇంగ్లండ్తో ఐదు మ్యాచ్ల టెస్టు సిరీస్కు ఇషాన్ అందుబాటులో ఉంటాడనుకున్నా.. అది జరగలేదు. రిషబ్ పంత్ రోడ్డు ప్రమాదంకు గురికావడంతో రెగ్యులర్ కీపర్ సమస్య వేధిస్తున్న నేపథ్యంలో ఇషాన్ను జట్టులోకి తీసుకోవాలని చాలా మంది సూచించారు. అయితే 2 నెలలకు పైగా ఎలాంటి క్రికెట్ ఆడని అతడిని నేరుగా తుది జట్టులో ఎలా తీసుకుంటామని బీసీసీఐ వాదిస్తుంది. ఇంగ్లండ్ టెస్ట్ సిరీస్కు ఎంపిక కావాలంటే ఇషాన్ కిషన్ కచ్చితంగా రంజీ ట్రోఫీ 2024లో ఆడాల్సిందే అని భారత హెడ్ కోచ్ రాహుల్ ద్రవిడ్ స్పష్టం చేశాడు. అయితే కిషన్ మాత్రం రాహుల్ వ్యాఖ్యలను పరిగణలోకి తీసుకోకుండా.. బరోడాలో ముంబై ఇండియన్స్ ఆటగాళ్లతో కలిసి ఐపీఎల్ 2024 కోసం ప్రాక్టీస్ చేస్తున్నాడు. జార్ఖండ్ తరఫున రంజీ ట్రోఫీ 2024లో బరిలో దిగే అవకాశం ఉన్నా.. ఇషాన్ ఐపీఎల్ కోసం సన్నద్ధమవుతున్నాడు. ఇషాన్ ప్రవర్తనపై బీసీసీఐ సీరియస్ అయింది. సెంట్రల్ కాంట్రాక్ట్ కలిగిన ప్లేయర్స్.. జాతీయ జట్టులోకి తిరిగి రావాలంటే దేశవాలీ టోర్నీల్లో ఆడాలని తప్పనిసరి చేసింది. జాతీయ జట్టు సభ్యులకు, ఎన్సీఏలో ఉన్న ఆటగాళ్లకు ఇందుకు మినహాయింపు ఉందని పేర్కొంది.
‘ఈగల్’ కు OTT ఇబ్బందులా? నిజమేంటంటే?
ఒక సినిమా విడుదల అవ్వడం కోసం చాలా ఇబ్బంది పడాల్సి వస్తుంది.. అలాగే ఓటీటీ లో కూడా విడుదల అవ్వడం కూడా ఈ మధ్య కష్టంగా మారింది.. పెద్ద సినిమాలు సైతం ఓటిటి బిజినెస్ విషయంలో ఇబ్బందులు ఎదుర్కొంటున్నాయి. చిన్న సినిమాల సంగతి అయితే చెప్పక్కర్లేదు.. ఇప్పుడు రవితేజ సినిమాకు కూడా అలాంటి కష్ఠాలు ఎదురయ్యాయి.. అయితే సంక్రాంతికి ఎక్కువ సినిమాలు ఉండటంతో సోలో రిలీజ్ డేట్ కోసం ‘ఈగల్’ తప్పుకుంది. ఫిబ్రవరి 9 న ఈ సినిమా రిలీజ్ అయ్యింది. ఈ సినిమాకి ఓటీటీ బిజినెస్ అవ్వలేదు అనే టాక్ కొద్దిరోజుల క్రితం వినిపించింది.. ప్రస్తుతం ఓటీటీ లోకి రావడానికి రెడీ అవుతుంది.. శాటిలైట్ బిజినెస్ ఆల్రెడీ డౌన్ గా ఉంది. దాంతో అందరి దృష్టీ ఓటిటి డీల్స్ మీదే ఉంది. దాంతో నిర్మాతలు సైతం ఈ సినిమాకు ఓటిటి డీల్ పైనే ఆశలు పెట్టుకున్నట్లు తెలుస్తుంది.. ప్రస్తుతం ఈ సినిమాను పీపుల్ మీడియా ఫ్యాక్టరీ’ సంస్థ పై టి.జి.విశ్వప్రసాద్ నిర్మించిన ఈ సినిమాకు వివేక్ కూచిభొట్ల సహా నిర్మాతగా వ్యవహరించారు.. అయితే ఈ సినిమాకు మొత్తం 70 కోట్ల రూపాయలతో నిర్మించారు అని ట్రేడ్ వర్గాలు వెల్లడించాయి. ఈ సినిమా రిలీజ్కు ముందు మంచి బజ్ క్రియేట్ చేయడంతో ఈ సినిమాను ఏపీ, నైజాంలో కలిపి 700 స్క్రీన్లు, ప్రపంచవ్యాప్తంగా 1000 స్క్రీన్లకుపైగా రిలీజ్ చేశారు.. మరి ఓటీటీ లో ఎక్కడ విడుదల అవుతుందో.. ఎంత బిజినెస్ అవుతుందో చూడాలి..
