Aasara Pensions: గుడ్‌న్యూస్.. తెలంగాణలో ఆసరా పింఛన్లపై బిగ్ అప్‌డేట్..

తెలంగాణ రాష్ట్రంలో సామాజిక భద్రతే లక్ష్యంగా ప్రభుత్వం అడుగులు వేస్తోంది. ముఖ్యంగా ఆర్థికంగా వెనుకబడిన వృద్ధులు, వితంతువులు, ఇతర అణగారిన వర్గాలకు అండగా నిలవడంలో ‘ఆసరా’ పింఛన్లు కీలక పాత్ర పోషిస్తున్నాయి. గత కొంతకాలంగా కొత్త పింఛన్ల కోసం ఎదురుచూస్తున్న లక్షలాది మంది దరఖాస్తుదారులకు ఊరటనిచ్చే విధంగా రాష్ట్ర రెవెన్యూ, గృహనిర్మాణ శాఖ మంత్రి పొంగులేటి శ్రీనివాస రెడ్డి తాజాగా కీలక ప్రకటన చేశారు. ఖమ్మం జిల్లాలో నిర్వహించిన ప్రజాదర్బార్ వేదికగా ఆయన ప్రజలకు భరోసానిస్తూ, త్వరలోనే అర్హులందరికీ కొత్త పింఛన్లు మంజూరు చేస్తామని స్పష్టం చేశారు.

రాష్ట్రవ్యాప్తంగా పెండింగ్‌లో ఉన్న పింఛన్ల దరఖాస్తులపై ప్రభుత్వం ప్రత్యేక దృష్టి సారించింది. మంత్రి పొంగులేటి శ్రీనివాస రెడ్డి ప్రకటన ప్రకారం.. రాబోయే కొద్ది రోజుల్లోనే ప్రభుత్వం నుంచి దీనిపై అధికారిక ఉత్తర్వులు వెలువడనున్నాయి. కేవలం కాగితాల మీద దరఖాస్తులు చూసి కాకుండా, క్షేత్రస్థాయిలో లబ్ధిదారుల పరిస్థితిని సమీక్షించి, నిజమైన పేదలకు ప్రాధాన్యత ఇవ్వనున్నారు. గతంలో జరిగిన లోపాలను సరిదిద్దుతూ, ఏ రాజకీయ పక్షంతో సంబంధం లేకుండా, కేవలం అర్హతే ప్రామాణికంగా పింఛన్లను మంజూరు చేస్తామని ప్రభుత్వం హామీ ఇచ్చింది. కొత్త జాబితాలో వయోవృద్ధులకు మరియు ఒంటరి మహిళలకు (వితంతువులకు) మొదటి విడతలో పెద్దపీట వేయనున్నారు. కొత్త రేషన్ కార్డుల ప్రక్రియతో పాటు, పింఛన్ల పంపిణీని కూడా వేగవంతం చేసేందుకు ప్రభుత్వం కసరత్తు చేస్తోంది. ఇదిలా ఉండగా.. కొన్ని గ్రామాల్లో ఇప్పటికే 50 ఏళ్లు నిండిన కల్లు గీత కార్మికుల పింఛన్ల కోసం అర్హులైన వారి నుంచి దరఖాస్తులను స్వీకరిస్తున్నారు. ఆసరా పింఛన్లలో భాగంగానే వీటిని కూడా అందించనున్నారు.

ప్రభుత్వం నిర్వహించే ‘ప్రజాదర్బార్’ కార్యక్రమాల ద్వారా ప్రజల నుంచి నేరుగా వినతులు స్వీకరిస్తున్నారు. ముఖ్యంగా గ్రామీణ ప్రాంతాల్లోని నిరుపేదలకు సంక్షేమ పథకాలు చేరవేయడమే ధ్యేయమని మంత్రి వెల్లడించారు. ఆసరా పింఛన్ల పెంపు, విస్తరణ ద్వారా రాష్ట్రంలోని ప్రతి పేదవాడి ముఖంలో చిరునవ్వు చూడటమే కాంగ్రెస్ ప్రభుత్వ లక్ష్యమని ఆయన పేర్కొన్నారు. మంత్రి పొంగులేటి చేసిన ఈ ప్రకటనతో రాష్ట్రంలోని కొత్త దరఖాస్తుదారుల్లో ఆశలు చిగురించాయి. త్వరలోనే బ్యాంక్ ఖాతాల్లోకి పెన్షన్ సొమ్ము జమ అవుతుందన్న ఆశాభావంతో వేలాది మంది లబ్ధిదారులు ఉన్నారు.