IND vs SA: టెస్టు సిరీస్‌కు ముందు భారత్‌కు షాక్‌.. ఉన్నపలంగా స్వదేశానికి స్టార్ ప్లేయర్!

Ishan Kishan Withdraws From India’s Test Squad vs South Africa: దక్షిణాఫ్రికా పర్యటనలో ఉన్న టీమిండియాకు టెస్టు సిరీస్‌కు ఆరంభానికి ముందే షాకులు తగులున్నాయి. ఇప్పటికే సీనియర్ పేసర్‌ మహ్మద్‌ షమీ చీలమండ గాయం కారణంగా టెస్టు జట్టు నుంచి తప్పుకోగా.. తాజాగా వికెట్‌ కీపర్‌ ఇషాన్‌ కిషన్‌ తప్పుకున్నాడు. వ్యక్తిగత కారణాల వల్ల ఇషాన్‌ ఉన్నపలంగా భారత్ బయల్దేరాడని బీసీసీఐ ఓ ప్రకటనలో తెలిపింది. ఇషాన్‌ స్థానాన్ని ఆంధ్రా కుర్రాడు కేఎస్‌ భరత్‌ భర్తీ చేస్తాడని బీసీసీఐ ప్రకటించింది. ప్రస్తుతం దక్షిణాఫ్రికాలోనే ఉన్న భరత్‌.. త్వరలోనే భారత టెస్ట్‌ జట్టుతో కలుస్తాడని బీసీసీఐ తెలిపింది.

ఇషాన్‌ కిషన్‌ టెస్టు జట్టు నుంచి రిలీజ్‌ కావడానికి వ్యక్తిగత కారణాలు అని బీసీసీఐ తన ప్రకటనలో పేర్కొంది. టెస్ట్ సిరీస్‌ నుంచి విడుదల చేయాలని ఇషానే స్వయంగా కోరినట్టు బీసీసీఐ తెలిపింది. దక్షిణాఫ్రికా పర్యటనలో​ టీ20, టెస్ట్‌ సిరీస్‌ల కోసం ఇషాన్‌ ఎంపికయ్యాడు. టీ20ల్లో​ ఒక్క అవకాశం రాకపోవడంతో.. టెస్ట్‌ సిరీస్‌పై ఆశలు పెట్టుకున్నాడు. అయితే ఉన్నపళంగా ఇషాన్‌ ఇంటి వెళ్లిపోవడంతో.. ఇండియా–ఏ టీమ్‌తో దక్షిణాఫ్రికాలోనే ఉన్న కేఎస్‌ భరత్‌కు అనూహ్యంగా సెలెక్టర్ల నుంచి పిలుపు అందింది. కేఎల్‌ రాహుల్‌ తర్వాత రెండో వికెట్‌కీపర్‌ ఛాయిస్‌గా భరత్‌ ఉంటాడు. డిసెంబర్‌ 26 నుంచి టెస్ట్ సిరీస్ ఆరంభం కానుంది.

Also Read: Surat Diamond Bourse: ప్రపంచంలోనే అతిపెద్ద కార్యాలయం ప్రారంభం.. ఒకే గొడుగు కిందకు డైమండ్ ట్రేడింగ్!

టెస్టుల కోసం భారత జట్టు:
రోహిత్ శర్మ (కెప్టెన్‌), శుభ్‌మన్ గిల్, యశస్వి జైస్వాల్, విరాట్ కోహ్లీ, శ్రేయస్ అయ్యర్, రుతురాజ్ గైక్వాడ్, కేఎల్ రాహుల్ (కీపర్‌), రవిచంద్రన్ అశ్విన్, రవీంద్ర జడేజా, శార్దూల్ ఠాకూర్, మహ్మద్ సిరాజ్, ముఖేష్ కుమార్, జస్ప్రీత్ బుమ్రా (వైస్‌ కెప్టెన్‌), ప్రసిద్ధ్ కృష్ణ, కేఎస్‌ భరత్ (కీపర్‌).