Lawrence Bishnoi History: కాలేజ్ స్టూడెంట్ నుంచి గ్యాంగ్‌స్టర్ దాకా.. పోలీస్ కొడుకు లారెన్స్ బిష్ణోయ్ హిస్టరీ ఇదే..!

Lawrence Bishnoi History: ప్రముఖ బాలీవుడ్ నటుడు టైగర్ ష్రాఫ్‌పై జరిగిన హత్యాయత్నంలో కేసు దేశ వ్యాప్తంగా సంచలనం సృష్టిస్తోంది. ఆదివారం సాయంత్రం 36 ఏళ్ల టైగర్ ష్రాఫ్ ఫుట్‌బాల్ ఆడి కారులో తిరిగి వస్తుండగా కాల్పులు జరిగాయి. గుర్తుతెలియని ఇద్దరు వ్యక్తులు ఆయన ప్రయాణిస్తున్న వాహనంపైకి ఒక్కసారిగా కాల్పులు జరిపారు. ఈ హఠాత్ దాడిలో టైగర్ ష్రాఫ్ సంరక్షకుడు (కేర్‌టేకర్), డ్రైవర్ అయిన ఫిర్దోస్ ఇబ్రహీం బలోచ్ తీవ్రంగా గాయపడ్డారు. అదే సమయంలో నటుడు టైగర్ ష్రాఫ్‌కు కూడా భుజం, ఛాతీ, కుడిచేతి భాగాల్లో తీవ్ర గాయాలయ్యాయి. కాగా, ఈ దారుణమైన దాడికి తామే పూర్తి బాధ్యులమని ప్రమాదకరమైన లారెన్స్ బిష్ణోయ్ గ్యాంగ్ బహిరంగంగా ప్రకటించుకుంది. తాజాగా ఈ ఘటనలో ప్రమేయం ఉన్న ముగ్గురు షూటర్లను ముంబై పోలీసులు, రాజస్థాన్‌కు చెందిన యాంటీ గ్యాంగ్‌స్టర్ టాస్క్ ఫోర్స్ (AGTF) కలిసి ఉమ్మడిగా పట్టుకున్నారు. ఇది పక్కన పెడితే.. ప్రస్తుతం లారెన్స్ బిష్ణోయ్ గురించి సోషల్ మీడియాలో చర్చ జరుగుతోంది. అసలు లారెన్స్ బిష్ణోయ్ ఎవరు? కాలేజ్ స్టూడెంట్ నుంచి గ్యాంగ్‌స్టర్ దాకా.. బిష్ణోయ్ హిస్టరీ గురించి ఇప్పుడు తెలుసుకుందాం..

1993 ఫిబ్రవరి 12న పంజాబ్‌లోని ఫిరోజ్‌పూర్‌లో ఒక ధనిక కుటుంబంలో లారెన్స్ బిష్ణోయ్ జన్మించాడు. అతడి తండ్రి మాజీ పోలీస్ కానిస్టేబుల్, ఆయన 1997లో ఉద్యోగాన్ని విడిచిపెట్టి వ్యవసాయం చేయడం ప్రారంభించారు. చిన్నతనంలో బిష్ణోయ్ చాలా క్రమశిక్షణ కలిగిన పిల్లవాడిగా ఉండేవాడు, చదువు, బొమ్మలు, ఆటలను ఎంతో ఇష్టపడేవాడు. 2010లో అబోహర్‌లో 12వ తరగతి వరకు చదువు పూర్తి చేసిన తర్వాత, పైచదువుల కోసం చండీగఢ్‌లోని డీఏవీ (DAV) కాలేజీలో చేరాడు. ఆ కాలేజీలోనే బిష్ణోయ్ నేర ప్రపంచం వైపు అడుగులు పడ్డాయి. అక్కడ అతనికి “గోల్డీ బ్రార్” పరిచయమయ్యాడు. వీరిద్దరి ఆలోచనలు కలవడంతో త్వరగానే ప్రాణస్నేహితులుగా మారారు. కాలేజీలో స్టూడెంట్స్ యూనియన్ ఏర్పాటు చేసి చిన్న చిన్న నేరాలకు పాల్పడటం మొదలుపెట్టారు. కాలేజీలో తన ఆధిపత్యాన్ని నిరూపించుకోవడానికి 2010 ప్రాంతంలో బిష్ణోయ్ కాలేజీలోనే కాల్పులు జరిపాడని ఆరోపణలు ఉన్నాయి. 2011లో తన కాలేజీలోని ‘స్టూడెంట్స్ ఆర్గనైజేషన్ ఆఫ్ పంజాబ్ యూనివర్సిటీ’ (SOPU) అధ్యక్షుడిగా నామినేట్ అయ్యాడు. ఇది అతని రాజకీయ జీవితానికి నాంది పలికినప్పటికీ, ఆ రాజకీయం నేర కార్యకలాపాలతోనే ముడిపడి సాగింది. ఆ తర్వాత పంజాబ్ యూనివర్సిటీ స్టూడెంట్స్ యూనియన్ (SUPU) పోరులో అధ్యక్షుడుగా పోటీ చేశాడు. ఈ ఎన్నికల్లో గోల్డీ బ్రార్ అతనికి బాగా సపోర్ట్, ప్రచారం చేసినప్పటికీ బిష్ణోయ్ ఓడిపోయాడు. ఆ ఓటమిని తట్టుకోలేక, గెలిచిన అభ్యర్థిపై బిష్ణోయ్, అతని అనుచరులు దాడికి తెగబడ్డారు. ఈ ఘటనతో హత్యాయత్నం ఆరోపణలపై పోలీసులు బిష్ణోయ్‌ను అరెస్టు చేశారు. అయితే ఐదేళ్ల తర్వాత, ప్రాసిక్యూషన్ కేసును సరిగా విచారించలేదని స్థానిక కోర్టు తీవ్రంగా మందలిస్తూ బిష్ణోయ్, అతని స్నేహితులను నిర్దోషులుగా విడుదల చేసింది.

అయితే ఆ సమయానికే బిష్ణోయ్ నేర ప్రపంచంలో బాగా కూరుకుపోయాడు. 2011లో పంజాబ్‌లోని ఫిరోజ్‌పూర్‌లో ఒక ఫైనాన్షియర్‌ దోపిడీకి గురైనప్పుడు మళ్లీ లారెన్స్ బిష్ణోయ్ పేరు బయటకు వచ్చింది, కానీ అప్పట్లో కేసు నమోదు కాలేదు. ఆ తర్వాత 2012 ఆగస్టు 12న బిష్ణోయ్‌పై రంగస్థాపన, బెదిరింపులు, కోట్లాటలు రేకెత్తించడం వంటి ఆరోపణలతో మరొక ఎఫ్‌ఐఆర్ నమోదైంది. 2015 జనవరి 17న చండీగఢ్‌లోని పంజాబ్, హర్యానా హైకోర్టులో విచారణకు తీసుకెళ్తుండగా పోలీసుల కస్టడీ నుంచి బిష్ణోయ్ తప్పించుకున్నాడు. ఆ సమయంలో అతడు నేపాల్‌కు పారిపోయి పెద్ద ఎత్తున స్వయంచాలక ఆటోమేటిక్ ఆయుధాలు, బుల్లెట్‌ప్రూఫ్ జాకెట్లను సేకరించాడని చెబుతారు. చివరికి 2015 మార్చి 4న పోలీసులు అతడిని అరెస్ట్ చేసి జైలుకు పంపారు. అయితే జైలు గోడలు కూడా అతని నేరాలను ఆపలేకపోయాయి. జైలు నుంచే మొబైల్ ఫోన్లు ఉపయోగిస్తూ హత్యలు, వసూళ్లు, బెదిరింపులకు పాల్పడుతూ తన గ్యాంగ్‌ను నడిపించడం కొనసాగించాడు.

బిష్ణోయ్ నేర చరిత్రలో అత్యంత సంచలనం సృష్టించిన అంశం బాలీవుడ్ స్టార్ హీరో సల్మాన్ ఖాన్‌ను బహిరంగంగా బెదిరించడం. 2018 జనవరి 6న జోధ్‌పూర్ జైలుకు తీసుకెళ్తున్న సమయంలో సల్మాన్ ఖాన్‌ను చంపేస్తానని మీడియా ముందే బిష్ణోయ్ ప్రకటించాడు. ఆ తర్వాత 2023 మార్చి 17న ఏబీపీ (ABP) న్యూస్ ఛానెల్‌కు ఇచ్చిన ఇంటర్వ్యూలోనూ అదే బెదిరింపును పునరావృతం చేశాడు. “నా జీవిత ఏకైక లక్ష్యం సల్మాన్ ఖాన్‌ను చంపడమే” అని స్పష్టంగా చెప్పాడు. 1998లో ఓ సినిమా షూటింగ్ సందర్భంగా రాజస్థాన్‌లో రక్షిత జాతికి చెందిన రెండు కృష్ణ జింకలను (బ్లాక్‌బక్) సల్మాన్ ఖాన్ వేటాడారనే ఆరోపణలే దీనికి కారణం. బిష్ణోయ్ సమాజం జంతువులను పవిత్రంగా భావిస్తుంది, అడవుల్లో పర్యావరణానికి జింకలు ఎంతో అవసరమని నమ్ముతుంది. ఈ ఘటనపై బిష్ణోయ్ సమాజం కేసు పెట్టడంతో 2018లో సల్మాన్‌కు శిక్ష పడింది. నాలుగేళ్ల వయసు నుంచే సల్మాన్ ఖాన్‌పై తీవ్ర పగ పెంచుకున్నానని చెప్పిన బిష్ణోయ్, సల్మాన్ ఖాన్ తమ బిష్ణోయ్ సమాజ దేవాలయానికి వెళ్లి పవిత్ర కృష్ణ జింకను చంపినందుకు క్షమాపణలు చెబితేనే చంపకుండా వదిలేస్తానని షరతు కూడా పెట్టాడు. మరోవైపు పంజాబీ సంగీత పరిశ్రమను పట్టిపీడించిన దారుణం సిధూ మూసేవాలా హత్య. 2022 మే 29న పంజాబ్‌లోని మాన్సా జిల్లాలో అత్యంత ప్రజాదరణ పొందిన గాయకుడు సిధూ మూసేవాలాను ఆరుగురు షూటర్లు దారుణంగా కాల్చి చంపారు. పాత గ్యాంగ్ శత్రుత్వాల వల్లే ఈ హత్య జరిగిందని, ఈ హత్యకు ఢిల్లీలోని తీహార్ జైలులో ఉన్న లారెన్స్ బిష్ణోయ్ నుంచే ఆదేశాలు వచ్చాయని విచారణలో తేలింది. కెనడాలో ఉన్న బిష్ణోయ్ ముఖ్య అనుచరుడు గోల్డీ బ్రార్ (సతీందర్‌జిత్ సింగ్) ఈ హత్యను ప్లాన్ చేసి అమలు చేశాడు. హవాలా నెట్‌వర్క్ ద్వారా రూ. 50 లక్షలు బదిలీ చేసి ఈ హత్యను నిర్వహించారంటే బిష్ణోయ్ గ్యాంగ్ అంతర్జాతీయ స్థాయి పరిధి ఏంటో అర్థమవుతుంది.

ఈ హత్య వెనుక బిష్ణోయ్ ప్రతీకార కోణం ఉంది. 2021 ఆగస్టు 7న మొహాలీలో బిష్ణోయ్ ఆప్తమిత్రుడు విక్కీ మిడ్డుఖేరాను పగటిపూటే కాల్చి చంపారు. ఈ హత్య వెనుక ప్రత్యర్థి ‘బంబీహా’ గ్యాంగ్‌తో పాటు మూసేవాలా మేనేజర్ షాగన్‌ప్రీత్ ప్రమేయం ఉందని, షాగన్‌ప్రీత్‌ను మూసేవాలే కాపాడుతున్నాడని బిష్ణోయ్ వర్గం నమ్మింది. దీంతో మిడ్డుఖేరా హత్యకు సాయపడిన వారందరినీ చంపడానికి బిష్ణోయ్ ఒక హిట్ లిస్ట్ తయారు చేశాడు. 2021 సెప్టెంబర్, అక్టోబర్ నెలల్లో షారూఖ్, డాని, అమన్ అనే ముగ్గురు షూటర్లను మూసేవాలాను అనుసరించడానికి పంపాడు. చివరికి 2022 మే 29న మూసేవాలాను టార్గెట్ చేసి కాల్చి చంపిన వెంటనే, జైలులో ఉన్న బిష్ణోయ్‌కు ఫోన్ చేసి పని పూర్తయిందని నివేదించారు. జైలులోనే ఉన్నప్పటికీ బిష్ణోయ్ 2018 నుంచి 2022 మధ్యకాలంలో ఉత్తరప్రదేశ్ లోని తన అనుచరుల ద్వారా 9mm పిస్టల్స్, AK-47లు సహా 25 రకాల అత్యాధునిక ఆయుధాలను కొనుగోలు చేశాడు. వీటిని మూసేవాలా హత్యలోనే కాక దేశవ్యాప్తంగా అనేక నేరాల్లో ఉపయోగించారు.

మూసేవాలా హత్య తర్వాత బిష్ణోయ్ చూపు బాలీవుడ్ వైపు మళ్లింది. బాలీవుడ్ పరిశ్రమలో భయాన్ని రేకెత్తించి, తన ఆధిపత్యాన్ని చెలాయించాలని బిష్ణోయ్ ప్లాన్ చేస్తున్నట్లు అతడి షూటర్ సౌరభ్ అలియాస్ మహాకాల్ పోలీసుల విచారణలో బయటపెట్టాడు. ఈ క్రమంలోనే ప్రముఖ గాయకుడు యో యో హనీ సింగ్‌కు బిష్ణోయ్ గ్యాంగ్ నుంచి బెదిరింపులు రావడంతో ఆయన ఢిల్లీ పోలీసులను రక్షణ కోరారు. అలాగే పంజాబీ గాయకుడు సోనూ థుక్రాల్‌కు తుపాకులు, బుల్లెట్ల వీడియోలు పంపి ప్రాణబెదిరింపులకు పాల్పడ్డారు. ఢిల్లీ-ఎన్‌సిఆర్ ప్రాంతంలో బిష్ణోయ్ గ్యాంగ్ విచ్చలవిడిగా వసూళ్లు, కాల్పులకు తెగబడింది. నారాయణాలోని ఒక కార్ షోరూమ్‌పై 20 రౌండ్లకు పైగా, మహిపాల్‌పూర్‌లోని ఒక హోటల్‌పై 5 రౌండ్లు కాల్పులు జరిపి వ్యాపారులను భయాందోళనకు గురిచేసి డబ్బులు డిమాండ్ చేశారు. ఒక సందర్భంలో వ్యాపారికి బిష్ణోయ్ అనుచరుడు రోహిత్ గోదారా ఫోన్ చేసి డబ్బులు ఇవ్వకపోతే తీవ్ర పరిణామాలు ఉంటాయని బెదిరించాడు. చివరికి జైలు నుంచే అక్రమ కాల్ సెంటర్ మాఫియా కింగ్‌పిన్ కునాల్ ఛబ్రాను రూ. 5 కోట్లు ఇవ్వాలని బిష్ణోయ్ స్వయంగా బెదిరిస్తున్న వీడియో సోషల్ మీడియాలో వైరల్ అయి అతని తెగింపును చూపించింది.

బిష్ణోయ్ ‘హిట్ లిస్ట్’ చూస్తే అతని నేర ఆలోచనలు ఎంత ఘోరంగా ఉన్నాయో అర్థమవుతుంది. సల్మాన్ ఖాన్‌తో పాటు, బంబీహా గ్యాంగ్‌తో సంబంధం ఉన్న మూసేవాలా మేనేజర్ షాగన్‌ప్రీత్, మన్‌దీప్ ధాలివాల్, గ్యాంగ్‌స్టర్ కౌశల్ చౌదరి, అలాగే అతని ప్రధాన శత్రువులైన గ్యాంగ్‌స్టర్ లక్కీ పటియాల్, షార్ప్‌షూటర్ రమ్మీ మసానాలు ఈ హిట్ లిస్ట్‌లో ఉన్నారు. ప్రస్తుతం పంజాబ్ సంగీత పరిశ్రమ నుంచి ముంబై వీధుల వరకు, మహారాష్ట్ర మాజీ మంత్రి బాబా సిద్దిఖీ హత్య వరకు బిష్ణోయ్ గ్యాంగ్ పేరు వినబడుతోంది. పుణేకు చెందిన శుభమ్ లోంకర్ అనే వ్యక్తి బిష్ణోయ్ గ్యాంగ్ తరఫున సిద్దిఖీ హత్యకు బాధ్యత వహించాడు. జైలు గోడల మధ్యే బంధించబడి ఉన్నప్పటికీ సాంకేతికతను, అంతర్జాతీయ నెట్‌వర్క్‌ను వాడుకుంటూ బిష్ణోయ్ తన నేర సామ్రాజ్యాన్ని శాసిస్తూ దేశంలోనే అత్యంత ప్రమాదకరమైన డాన్‌గా మారాడు.