Women’s Health: మాంసం తినే మహిళలు వందేళ్లు బతుకుతారా?

మాంసం తినేవాళ్లు ఎక్కువ కాలం బతుకుతారా? ముఖ్యంగా మహిళలు మాంసం తింటే వందేళ్లు జీవించే అవకాశాలు పెరుగుతాయా? చైనాలో జరిగిన ఓ పరిశోధనలో ఆసక్తికరమైన విషయం బయటపడింది.

చైనాలో 80 ఏళ్లు దాటిన 5వేల మందికి పైగా వృద్ధుల ఆరోగ్య వివరాలను పరిశోధకులు పరిశీలించారు. వీరిలో వందేళ్లు పూర్తి చేసుకున్నవాళ్లను, 80 నుంచి 90 ఏళ్ల మధ్య వయసున్నవాళ్లతో పోల్చి చూశారు.

ఈ పరిశోధన వివరాలు అమెరికన్ జర్నల్ ఆఫ్ క్లినికల్ న్యూట్రిషన్‌లో ప్రచురితమయ్యాయి. ఈ పరిశోధనలో ఓ ఆసక్తికరమైన విషయం కనిపించింది. తక్కువ బరువున్న మహిళల్లో మాంసం తినేవాళ్లు, పూర్తిగా శాకాహారం తీసుకునేవాళ్లతో పోలిస్తే వందేళ్లు జీవించే అవకాశం 44 శాతం ఎక్కువగా ఉన్నట్లు పరిశోధకులు గుర్తించారు. అయితే ఈ తేడా సాధారణ బరువు ఉన్న మహిళల్లో, అధిక బరువు ఉన్న మహిళల్లో కనిపించలేదు. పురుషుల విషయంలోనూ ఇలాంటి స్పష్టమైన సంబంధం బయటపడలేదు. మరి దీనికి కారణమేంటి?

వయసు పెరిగేకొద్దీ చాలామందిలో శరీర బరువు తగ్గుతుంది. కండరాల బలం కూడా తగ్గే అవకాశం ఉంటుంది. ఇలాంటి సమయంలో శరీరానికి కావాల్సిన శక్తి, ప్రొటీన్లు, ఇతర పోషకాలు అందడం చాలా ముఖ్యం. ఆహారం ద్వారా సరిపడా పోషకాలు అందకపోతే శరీరం బలహీనపడవచ్చు.

ముఖ్యంగా తక్కువ బరువున్న వృద్ధుల్లో ఈ సమస్య మరింత ప్రాధాన్యం సంతరించుకుంటుంది. అయితే మాంసం తినేవాళ్లకే ఎక్కువ ఆయుష్షు ఉంటుందని ఈ పరిశోధన చెప్పడం లేదు. మాంసం తినని వాళ్లలో చేపలు, గుడ్లు, పాలు వంటి ఆహార పదార్థాలు తీసుకునేవాళ్లకు కూడా వందేళ్లు జీవించే అవకాశం మాంసం తినేవాళ్లతో సమానంగా కనిపించింది. అంటే శరీరానికి అవసరమైన పోషకాలు ఏ రూపంలో అందుతున్నాయన్నది ఇక్కడ ముఖ్యమైన విషయం. ఈ పరిశోధనలో కొన్ని పరిమితులు కూడా ఉన్నాయి. వృద్ధులు తమ జీవితమంతా ఎలాంటి ఆహారం తీసుకున్నారు, వయసు పెరిగేకొద్దీ వారి ఆహారపు అలవాట్లు ఎలా మారాయనే విషయాలను పరిశోధకులు పూర్తిగా పరిశీలించలేదు. వారు వృద్ధాప్యంలో తీసుకుంటున్న ఆహారం ఆధారంగానే ఈ విశ్లేషణ చేశారు.

మరోవైపు కూరగాయలు, పండ్లు, పప్పుధాన్యాలు, తృణధాన్యాలు ఎక్కువగా ఉండే ఆహారం గుండె జబ్బులు, పక్షవాతం, టైప్-2 డయాబెటిస్‌ లాంటి సమస్యల ముప్పును తగ్గించడంలో సహాయపడుతుంది. అదే సమయంలో రెడ్ మీట్‌, ప్రాసెస్ చేసిన మాంసాన్ని ఎక్కువగా తినడం ఆరోగ్య సమస్యలతో సంబంధం కలిగి ఉంది.

మొత్తంగా చూస్తే, ఎక్కువ కాలం ఆరోగ్యంగా జీవించడానికి మాంసం తినాలా, శాకాహారం తీసుకోవాలా అన్నదానికంటే మన శరీరానికి సరిపడా పోషకాలు అందుతున్నాయా లేదా అన్నదే ముఖ్యం. ముఖ్యంగా వయసు పెరిగిన తర్వాత బరువు తగ్గకుండా చూసుకోవడం, కండరాల బలాన్ని కాపాడుకోవడం, సమతుల్యమైన ఆహారం తీసుకోవడం ఎంతో అవసరం.