తత్కాల్ రూపంలో రైల్వేకు భారీ ఆదాయం

కరోనా సమయంలో రైళ్ల కార్యకలాపాలు నిలిచిపోయిన సంగతి తెలిసిందే. అయితే ఆ సమయంలోనూ ఇండియన్ రైల్వేకు భారీ ఆదాయం సమకూరింది. 2020-21 ఆర్థిక సంవత్సరంలో తత్కాల్, ప్రీమియం టికెట్ల విక్రయాల ద్వారా రైల్వేకు రూ.500 కోట్లకు పైగా ఆదాయం సమకూరినట్లు అధికారులు వెల్లడించారు. ఏడాదిలో తత్కాల్ టికెట్ల ద్వారా రూ.403 కోట్లు, ప్రీమియం తత్కాల్ టికెట్ల ద్వారా రూ.119 కోట్ల ఆదాయాన్ని రైల్వేశాఖ ఆర్జించింది.

Read Also: వైరల్: బైకుపై హీరో లెవల్లో గన్‌తో… కట్ చేస్తే…!

రైల్వే ఆదాయంపై మధ్యప్రదేశ్‌కు చెందిన చంద్రశేఖర్ గౌర్ అనే వ్యక్తి దాఖలు చేసిన ఆర్టీఐ దరఖాస్తుకు స్పందిస్తూ రైల్వేశాఖ ఈ వివరాలను అందజేసింది. మరోవైపు 2020-21 ఏడాదిలో డైనమిక్ ఫెయిర్ రూపంలో రూ.511 కోట్లను రైల్వేశాఖ సమీకరించింది. కాగా 2019-20 ఆర్థిక సంవత్సరంలో రైళ్ల నిర్వహణపై ఎలాంటి పరిమితులు లేని సమయంలో డైనమిక్ ఫెయిర్ రూపంలో రూ.1,313 కోట్లను రైల్వేశాఖ వసూలు చేసింది. తత్కాల్ టిక్కెట్ల ద్వారా రూ.1,669 కోట్లు, ప్రీమియం తత్కాల్ టిక్కెట్ల ద్వారా రూ.603 కోట్లను రైల్వేశాఖ ఆర్జించింది.