Ambati Rayudu: ‘విరాట్ కోహ్లీ ఊహించని తప్పు చేశాడు.. అందుకే ఫామ్ కోల్పోయాడు’..

ఇంగ్లాండ్‌తో జరిగిన మొదటి వన్డే మ్యాచ్‌లో భారత స్టార్ బ్యాటర్ విరాట్ కోహ్లీ ఆశించిన స్థాయిలో రాణించలేకపోయాడు. ఎడ్జ్‌బాస్టన్ వేదికగా జరిగిన ఈ మ్యాచ్‌లో కేవలం 6 బంతులు ఎదుర్కొన్న కోహ్లీ, 5 పరుగులు మాత్రమే చేసి జోఫ్రా ఆర్చర్ బౌలింగ్‌లో ఎల్బీడబ్ల్యూగా వెనుదిరిగాడు. అంతర్జాతీయ క్రికెట్‌లో కోహ్లీ ఆర్చర్ చేతికి చిక్కడం ఇదే తొలిసారి. టెస్టులు, టీ20ల నుంచి ఇప్పటికే రిటైర్ అయిన కోహ్లీ కేవలం వన్డేలు మాత్రమే ఆడుతుండటం వల్ల, అతనికి మ్యాచ్‌ల మధ్య ఎక్కువ గ్యాప్ వస్తోంది. గాయం కారణంగా ఆఫ్ఘనిస్తాన్ సిరీస్‌కు కూడా దూరమవడంతో ఈ విరామం దాదాపు 6 నెలలకు పెరిగింది. ఈ సుదీర్ఘ విరామం తర్వాత బరిలోకి దిగిన కోహ్లీ త్వరగానే అవుట్ కావడంపై మాజీ క్రికెటర్ అంబటి రాయుడు ఆసక్తికర వ్యాఖ్యలు చేశాడు.

సుదీర్ఘ విరామం తర్వాత బ్యాటర్ల దృష్టి ఎప్పుడూ లెంగ్త్ బంతుల పైనే ఉంటుందని, అందుకే ఒక్కోసారి ఫుల్లర్ బంతులను మిస్ చేస్తారని రాయుడు విశ్లేషించాడు. ఇదే తప్పు కోహ్లీ కూడా చేశాడన్నారు.  కోహ్లీ మరికొన్ని మ్యాచ్‌లు ఆడితే ఈ సమస్యను అధిగమించి, శుభ్‌మన్ గిల్ లాగే సులభంగా బౌండరీలు బాదగలడని ఆశాభావం వ్యక్తం చేశాడు. ఈ మ్యాచ్‌లో భారత్ 259 పరుగుల లక్ష్యాన్ని 6 వికెట్ల తేడాతో ఛేదించి విజయం సాధించింది. కెప్టెన్ శుభ్‌మన్ గిల్ 75 బంతుల్లో 80 పరుగులు చేసి రిటైర్డ్ హర్ట్‌గా వెనుదిరిగాడు.

మరోవైపు ఓపెనర్‌గా వచ్చిన రోహిత్ శర్మ కూడా 21 బంతుల్లో 11 పరుగులు మాత్రమే చేసి నిరాశపరిచాడు. దీనిపై ఆల్‌రౌండర్ శార్దూల్ ఠాకూర్ స్పందిస్తూ, రోహిత్ షాట్ ఎంపికలో పొరపాటు చేశాడని అన్నాడు. అవతలి ఎండ్ నుంచి గిల్ చక్కగా పరుగులు చేస్తున్నప్పుడు రోహిత్ క్రీజులో మరికొంత సమయం గడిపి ఉండాల్సిందని అభిప్రాయపడ్డాడు. అలాగే ఆర్చర్ అంతకుముందు వరుసగా షార్ట్-పిచ్, బౌన్సర్లతో ఇబ్బంది పెట్టడం వల్ల, కోహ్లీ అకస్మాత్తుగా వచ్చిన స్ట్రెయిట్ ఫుల్ డెలివరీని అంచనా వేయలేక వికెట్ చేజార్చుకున్నాడని శార్దూల్ పేర్కొన్నాడు.