CM Chandrababu: ఢిల్లీ అసెంబ్లీ ఎన్నికల ప్రచారానికి సీఎం చంద్రబాబు!

దేశ రాజధాని ఢిల్లీ అసెంబ్లీ ఎన్నికల్లో ఏపీ సీఎం, టీడీపీ జాతీయ అధ్యక్షుడు నారా చంద్రబాబు నాయుడు ప్రచారం చేయనున్నారు. బీజేపీ అభ్యర్థుల తరఫున చంద్రబాబు ప్రచారం చేయనున్నారు. ఫిబ్రవరి 1న న్యూఢిల్లీలో సీఎం ఎన్నికల ప్రచారం చేసే అవకాశం ఉంది. తెలుగు ప్రజలు అత్యధికంగా నివసించే ప్రాంతాల్లో బీజేపీ అభ్యర్థుల తరఫున ఏపీ సీఎం ఎన్నికల ప్రచారం చేయనున్నారు. ఢిల్లీలో సుమారు 10 లక్షల మంది తెలుగు ప్రజలు నివసిస్తున్నారు. డిప్యూటీ సీఎం పవన్ కళ్యాణ్ కూడా ఢిల్లీ ఎన్నికల్లో ప్రచారం చేసే అవకాశం ఉన్నట్లు తెలుస్తోంది.

ఫిబ్రవరి 5న ఢిల్లీ అసెంబ్లీ ఎన్నికల పోలింగ్ జరగనుంది. ఫిబ్రవరి 8న ఎన్నికల ఫలితాలు వెలువడనున్నాయి. సమయం ఆసన్నమవుతుండంతో ప్రచారం జోరందుకుంది. పార్టీ అభ్యర్థుల మద్దతు కోసం మిత్రపక్షాలను ఢిల్లీ ఎన్నికల ప్రచారంలోకి బీజేపీ అగ్రనాయకత్వం దింపుతోంది. ఈ క్రమంలో ఎన్నికల ప్రచారంలో పాల్గొనాలంటూ సీఎం చంద్రబాబును బీజేపీ ఆహ్వానించిన సంగతి తెలిసిందే. దాంతో ఢిల్లీ అసెంబ్లీ ఎన్నికల ప్రచారానికి సీఎం సిద్దమయ్యారు. ఎన్టీఏలో టీడీపీ కీలక భాగస్వామిగా ఉన్న విషయం తెలిసిందే. ఢిల్లీలో వివిధ రాష్ట్రాల నుంచి పెద్ద సంఖ్యలో ఓటర్లు ఉన్నారు. గతేడాది జరిగిన మహారాష్ట్ర అసెంబ్లీ ఎన్నికల ప్రచారంలో సైతం సీఎం చంద్రబాబు, డిప్యూటీ సీఎం పవన్ కల్యాణ్ వేర్వేరుగా ప్రచారం నిర్వహించారు.