Supreme Court: CJI సూర్యకాంత్‌పై అనుచిత వ్యాఖ్యలు.. సంజయ్ రౌత్‌కు సుప్రీంకోర్టు నోటీసులు..

Supreme Court: భారత ప్రధాన న్యాయమూర్తి (CJI) జస్టిస్ సూర్యకాంత్‌ను ఉద్దేశించి అనుచిత వ్యాఖ్యలు చేసిన శివసేన(యూబీటీ) ఎంపీ సంజయ్ రౌత్‌పై సుప్రీంకోర్టు ఆగ్రహం వ్యక్తం చేసింది. సంజయ్‌ రౌత్‌తో పాటు జర్నలిస్ట్ నిఖిల్ వాగ్లేకు సుప్రీంకోర్టు షోకాజ్ నోటీసులు జారీ చేసింది. సుప్రీంకోర్టు బార్ అసోసియేషన్ (SCBA) సంజయ్ రౌత్, నిఖిల్ వాగ్లేపై క్రిమినల్ కోర్టు ధిక్కరణ పిటిషన్ దాఖలు చేసింది. ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్‌బాల్య బాగ్చితో కూడిన ధర్మాసనం ఈ కేసును విచారించింది.

విచారణ సందర్భంగా.. ‘‘రాజ్యాంగ సంస్థలపై దాడులు చేయడం దురదృష్టకరం. ప్రజలు తాము ఒక ఉచ్చులో చిక్కుకుంటున్నామనే విషయాన్ని అర్థం చేసుకోవడం లేదు. హక్కులను పరిరక్షించడంలో న్యాయస్థానాలు ఎప్పుడూ వెనకడుగు వేయలేదు. అయినప్పటికీ విమర్శలు కొనసాగిస్తే అది దురదృష్టకరం’’ అని ధర్మాసనం వ్యాఖ్యానించింది.

అక్టోబర్ 12న ప్రతిపక్షాల బృందాన్ని కలవడానికి సుప్రీంకోర్టు ప్రధాన న్యాయమూర్తి నిరాకరించిన తర్వాత సంజయ్ రౌత్ సీజేఐని ఉద్దేశించి అనుచిత వ్యాఖ్యలు చేశారు. బీజేపీకి చెందిన రాజకీయ కార్యక్రమాలకు న్యాయమూర్తులు హాజరవుతారని, ముఖ్యమంత్రులు ఇచ్చే విందుల్లో పాల్గొంటారని, కానీ ప్రతిపక్ష నేతలను మాత్రం కలవడం లేదని వ్యాఖ్యానించారు. జర్నలిస్ట్ నిఖిల్ వాగ్లే తన ఎక్స్ అకౌంట్‌లో సీజేఐని ఉద్దేశించి అభ్యంతరకర వ్యాఖ్యలు చేశారు. ఈ వ్యాఖ్యలు న్యాయవ్యవస్థపై నమ్మకాన్ని దెబ్బతీసే అవకాశం ఉందని, న్యాయవ్యవస్థ న్యాయమైన పరిమితి దాటిందని పిటిషన్ పేర్కొంది.

విషయం పెద్దది కావడంతో జర్నలిస్ట్ నిఖిల్ క్షమాపణలు చెప్పారు. అయితే, తనను టార్గెట్‌గా చేసుకుంటున్నారని సంజయ్ రౌత్ ఆరోపించారు. తాను మాట్లాడటం ఆపబోనని, అవసరమైతే జైలుకు వెళ్లేందుకు సిద్ధంగా ఉన్నానని చెప్పారు. సుప్రీంకోర్టుపై గతంలో పలువురు ప్రముఖులు, రిటైర్డ్ ప్రధాన న్యాయమూర్తులు, మాజీ న్యాయమూర్తులు, రాజకీయ నేతలు వ్యాఖ్యలు చేశారని రౌత్ అన్నారు. అయినప్పటికీ తననే ఎందుకు టార్గెట్ చేస్తున్నారని ప్రశ్నించారు.