Supreme Court : 31 వారాల గర్భస్రావానికి గ్రీన్ సిగ్నల్.. సుప్రీంకోర్టు సంచలన తీర్పు!

Supreme Court :  భారత అత్యున్నత న్యాయస్థానం అత్యాచార బాధితుల హక్కుల విషయంలో మరోసారి తన మానవీయ కోణాన్ని చాటుకుంది. అత్యాచారానికి గురై, ప్రస్తుతం 31 వారాల గర్భంతో ఉన్న ఒక 15 ఏళ్ల బాలికకు గర్భస్రావం చేసుకునేందుకు సుప్రీంకోర్టు గ్రీన్ సిగ్నల్ ఇచ్చింది. సాధారణంగా చట్టప్రకారం అనుమతించబడిన గడువు దాటినప్పటికీ, బాధితురాలి ప్రాణం, గౌరవమే ముఖ్యం అని ధర్మాసనం స్పష్టం చేసింది.

ఈ కేసులో బాధితురాలు కేవలం 15 ఏళ్ల మైనర్ బాలిక. ఆమె అత్యాచారానికి గురవ్వడమే కాకుండా, ఆ విషయం ఆలస్యంగా వెలుగులోకి రావడంతో అప్పటికే ఆమె 31 వారాల గర్భవతిగా ఉంది. ఈ గర్భం కారణంగా ఆమె తీవ్రమైన మానసిక ఒత్తిడికి లోనైందని, ఇప్పటికే రెండుసార్లు ఆత్మహత్యాయత్నం కూడా చేసిందని కోర్టు గుర్తించింది. గర్భాన్ని కొనసాగించడం ఆమె శారీరక , మానసిక ఆరోగ్యానికి తీరని నష్టం కలిగిస్తుందని బాధితురాలి తరపు న్యాయవాదులు వాదించారు.

గర్భస్రావంపై అభిప్రాయం చెప్పాలని కోర్టు ఆదేశించిన నేపథ్యంలో AIIMS వైద్యులు తమ నివేదికను సమర్పించారు. గర్భం 30 వారాలు దాటినందున, ఇప్పుడు గర్భస్రావం చేయడం వల్ల బాధితురాలి ప్రాణాలకు ముప్పు ఉండవచ్చని, పుట్టబోయే బిడ్డ బతికే అవకాశం ఉందని వారు పేర్కొన్నారు. బిడ్డ పుట్టిన తర్వాత దత్తత ఇచ్చేలా చూడాలని ప్రభుత్వం తరపు న్యాయవాదులు ప్రతిపాదించారు.

అయితే, దీనిపై సుప్రీంకోర్టు ఘాటుగా స్పందించింది. “ఒక బిడ్డ కంటే ముందు ఆ తల్లి ప్రాణం, ఆమె మానసిక స్థితి మాకు ముఖ్యం” అని ధర్మాసనం వ్యాఖ్యానించింది. వైద్యులు కేవలం వైద్య సేవలు అందించడానికే పరిమితం కావాలని, నిర్ణయాలను పౌరులపై రుద్దకూడదని స్పష్టం చేసింది.

ఒక మహిళకు తన శరీరంపై పూర్తి హక్కు ఉంటుందని, ఆమె ఇష్టానికి వ్యతిరేకంగా గర్భాన్ని కొనసాగించమని బలవంతం చేయడం ప్రాథమిక హక్కుల ఉల్లంఘనే అవుతుందని కోర్టు పేర్కొంది. ప్రస్తుతం ఉన్న మెడికల్ టెర్మినేషన్ ఆఫ్ ప్రెగ్నెన్సీ (MTP) చట్టం ప్రకారం 24 వారాల వరకే గర్భస్రావానికి అనుమతి ఉంది. అయితే, అత్యాచార బాధితుల విషయంలో ఈ సమయ పరిమితిని సడలించేలా చట్టాలను సవరించాలని కేంద్ర ప్రభుత్వానికి కోర్టు సూచించింది. బాధితురాలు మైనర్ అయినందున, ఆమె , ఆమె తల్లిదండ్రుల నిర్ణయానికే అత్యున్నత ప్రాధాన్యతనిస్తూ గర్భస్రావానికి అనుమతించింది.

ఈ తీర్పు కేవలం ఒక వ్యక్తిగత కేసులో ఇచ్చినది మాత్రమే కాదు, దేశవ్యాప్తంగా మహిళల పునరుత్పత్తి హక్కులు , అత్యాచార బాధితుల పట్ల వ్యవస్థ ఉండాల్సిన తీరుపై ఒక బలమైన సందేశాన్ని ఇచ్చింది. బాధితురాలికి మెరుగైన వైద్య సేవలు అందించాలని సుప్రీంకోర్టు AIIMS వైద్యులను ఆదేశించింది.