Posani Krishna Murali: ‘లవ్ యూ రాజా’ డైలాగ్ వెనుక అసలు కథ ఇదే.. అసలు విషయం చెప్పిన పోసాని

Posani Krishna Murali: ప్రముఖ రచయిత, నటుడు, దర్శకుడు పోసాని కృష్ణ మురళి చెప్పిన ‘లవ్ యూ రాజా’ డైలాగ్ ఒకప్పుడు తెలుగు రాష్ట్రాల్లో ఎంతటి సంచలనం సృష్టించిందో ప్రత్యేకంగా చెప్పాల్సిన పనిలేదు. నేటికీ చాలామంది ఆయనను అదే పేరుతో గుర్తు చేసుకుంటుంటారు. తాజాగా ఎన్‌టీవీ పోడ్‌కాస్ట్‌లో పాల్గొన్న పోసాని.. ఈ డైలాగ్ ఎలా పుట్టింది? ఎలా అంత పెద్ద క్రేజ్ సంపాదించుకుంది? అనే ఆసక్తికర విషయాలను పంచుకున్నారు. ఈ సందర్భంగా ఆయన మాట్లాడుతూ.. గతంలో మా టీవీలో ఓంకార్ నిర్వహించిన చిన్నారుల డ్యాన్స్ షోకు తనను జడ్జిగా ఆహ్వానించారని తెలిపారు. షూటింగ్‌లతో బిజీగా ఉన్నప్పటికీ ఓంకార్ ప్రత్యేకంగా కోరడంతో ఆ కార్యక్రమంలో పాల్గొనడానికి అంగీకరించానని చెప్పారు.

“స్టేజ్‌పై డ్యాన్స్ చేసేది చిన్నపిల్లలు కాబట్టి.. వారు ఎంత బాగా చేసినా, ఏదైనా చిన్న తప్పు జరిగినా నా కామెంట్స్ వల్ల వారు బాధపడకూడదని అనుకున్నాను. అందుకే ప్రతి పిల్లవాడిని ప్రోత్సహించేలా మాట్లాడేవాడిని. ‘నువ్వు చాలా బాగా చేశావ్.. ఇంకాస్త బాగా చేస్తే నంబర్ వన్ అవుతావ్’ అంటూ ధైర్యం చెప్పేవాడిని” అని పోసాని గుర్తు చేసుకున్నారు. అలాంటి సమయంలో ఓ చిన్నారి ప్రదర్శన ముగిసిన తర్వాత అనుకోకుండా “లవ్ యూ రాజా” అని చెప్పానని, దానికి ఆ చిన్నారి కూడా నవ్వుతూ “థాంక్యూ రాజా” అని సమాధానం చెప్పిందని తెలిపారు. నెక్ట్స్ రెండు జడ్జిమెంట్స్‌లో లవ్ యూ రాజా అని నేను అన్న తర్వాత మూడో సారి పిల్లలందరూ స్టేజ్ మీదకి వచ్చి లవ్యూ రాజా అని అన్నారని.. ఆ క్షణం అక్కడ ఉన్నవారంతా నవ్వారని, తర్వాత ప్రతి ఎపిసోడ్‌లో అదే మాటను ఉపయోగించడం ప్రారంభించానని చెప్పారు. ఆ కార్యక్రమం ముగిసే నాటికి ఆ డైలాగ్ తెలుగు రాష్ట్రాలన్నింటిలోనూ విపరీతంగా పాపులర్ అయిందని పోసాని వెల్లడించారు. ఇప్పటికీ సినీ పరిశ్రమలోని వారైనా, అభిమానులైనా తనను “లవ్ యూ రాజా” అని పిలుస్తుంటారని, అంతకుముందు “మెంటల్ కృష్ణ” అని పిలిచేవారని చెప్పారు. ‘ఇంత పెద్ద ఇండస్ట్రీలో నాకు ఇంత గుర్తింపు ఇండస్ట్రీలో ఉంది, ప్రజల్లో ఉంది అది నాకు అదృష్టం’ అని అన్నారు.