Hyderabad: భారీ సైబర్ ట్రేడింగ్ మోసం.. రూ.24.76 కోట్లు కొల్లగొట్టిన కేటుగాడు.. 3 చోట్ల ఈడీ మెరుపు దాడులు!

Hyderabad: నగరంలో సంచలనం సృష్టించిన రూ.24 కోట్ల భారీ సైబర్ ట్రేడింగ్ మోసం కేసులో ఎన్‌ఫోర్స్‌మెంట్ డైరెక్టరేట్ (ED) కొరడా ఝుళిపించింది. హైదరాబాద్‌లోని మూడు కీలక ప్రాంతాల్లో అధికారులు ఏకకాలంలో ఆకస్మిక తనిఖీలు చేపట్టారు. ప్రధాన నిందితుడు అలంరాజు సత్యనారాయణ మూర్తికి చెందిన నివాసాలు, వ్యాపార కార్యాలయాలే లక్ష్యంగా ఈ సోదాలు కొనసాగాయి. నకిలీ ట్రేడింగ్ వెబ్‌సైట్‌తో వల స్టాక్ మార్కెట్ ట్రేడింగ్‌లో పెట్టుబడులు పెడితే స్వల్ప కాలంలోనే భారీ లాభాలు వస్తాయంటూ నిందితుడు బాధితులకు ఆశ చూపించాడు. ఫోన్ కాల్స్, సోషల్ మీడియా మెసేజ్‌ల ద్వారా నిమేష్ అనే బాధితుడిని సంప్రదించి, ఓ నకిలీ వెబ్‌సైట్ ద్వారా ట్రేడింగ్ చేయాల్సిందిగా నమ్మించాడు. బాధితుడిని పూర్తిగా బురిడీ కొట్టించి విడతల వారీగా ఏకంగా రూ.24,76,21,042 వసూలు చేశాడు. తీరా అసలు పెట్టుబడితో పాటు రావాల్సిన లాభాలను సైతం తిరిగి ఇవ్వకుండా మొహం చాటేశాడు.

2023 మే 23 నుంచి 2024 మే 27 మధ్య కాలంలో నిందితుడు ఏకంగా రూ.26.02 కోట్ల మేర మోసపూరిత లావాదేవీలు సాగించినట్లు అధికారులు ప్రాథమికంగా గుర్తించారు. దర్యాప్తు సంస్థల నిఘా నుంచి తప్పించుకునేందుకు, డబ్బు మూలాలను దాచేందుకు పలు ‘మ్యూల్’ బ్యాంకు ఖాతాల ద్వారా నిధులను మళ్లించాడు. ఆ సొమ్ముతో తన కుటుంబ సభ్యులు, ఉద్యోగుల పేర్లతో పలు వ్యాపార సంస్థలను ప్రారంభించాడు. ‘ఆశ్రిత ఇన్‌ఫ్రా ప్రాజెక్ట్స్’ పేరిట హైదరాబాద్‌లో లగ్జరీ విల్లా ప్రాజెక్టును మొదలుపెట్టడంతో పాటు BTR ఇండస్ట్రీస్, వెలుగు ట్రేడింగ్ కంపెనీ, ఆశ్రిత మెగా సొల్యూషన్స్ పేర్లతో షెల్ కంపెనీలను నడిపినట్లు తేలింది.

సోదాల సందర్భంగా నిందితుడి నివాసం నుంచి రూ.6.40 లక్షల నగదును ఈడీ అధికారులు స్వాధీనం చేసుకున్నారు. నిందితుడికి చెందిన 11 బ్యాంకు ఖాతాల్లో ఉన్న సుమారు రూ.14 లక్షల బ్యాలెన్స్‌ను తక్షణమే ఫ్రీజ్ చేశారు. వీటితో పాటు మోసపు సొమ్ముతో సమకూర్చుకున్న సుమారు రూ.5 కోట్ల విలువైన ప్లాట్లు, విల్లాను అధికారులు గుర్తించారు. తనిఖీల్లో లభించిన కీలక డాక్యుమెంట్లు, డిజిటల్ ఆధారాలను అధికారులు స్వాధీనం చేసుకుని లోతుగా విచారణ కొనసాగిస్తున్నారు.