Telugu Theater Closure Threat: థియేటర్ల మూసివేత టెన్షన్.. ప్రొడ్యూసర్స్ కౌన్సిల్ సమావేశం?

తెలుగు రాష్ట్రాల్లోని సినిమా థియేటర్ ఎగ్జిబిటర్లు తీవ్ర నిర్ణయం వైపు అడుగులు వేస్తున్నారు. సినిమాలను అద్దె ప్రాతిపదికన ప్రదర్శించే విధానాన్ని నిలిపివేసి, కేవలం పర్సెంటేజ్ విధానంలోనే చెల్లింపులు చేయాలని ఎగ్జిబిటర్లు డిమాండ్ చేస్తున్నారు. నిర్మాతలు ఈ షరతును అంగీకరించకపోతే, జూన్ 1, 2025 నుంచి థియేటర్లను మూసివేయాలని నిర్ణయించారు. ఈ అంశం తెలుగు సినీ పరిశ్రమలో తీవ్ర చర్చనీయాంశంగా మారింది. తెలుగు ఫిల్మ్ ఛాంబర్‌లో జరిగిన ఎగ్జిబిటర్ల సమావేశంలో ఈ నిర్ణయం తీసుకున్నట్లు సమాచారం.

Also Read:Balakrishna : 10 నిమిషాల కోసం 22 కోట్లు?

ఈ సమావేశంలో దిల్ రాజు, సురేష్ బాబు వంటి ప్రముఖ నిర్మాతలతో పాటు 60 మంది ఎగ్జిబిటర్లు పాల్గొన్నారు. అద్దె విధానం వల్ల థియేటర్ల నిర్వహణలో నష్టాలు ఎదురవుతున్నాయని, పర్సెంటేజ్ విధానం ద్వారా మాత్రమే ఆర్థిక సమతుల్యత సాధ్యమవుతుందని ఎగ్జిబిటర్లు వాదిస్తున్నారు. ఈ నిర్ణయాన్ని ప్రొడ్యూసర్స్ కౌన్సిల్, ప్రొడ్యూసర్స్ గిల్డ్‌కు లేఖ ద్వారా తెలియజేసినట్లు తెలుస్తోంది.
ఈ వివాదాన్ని పరిష్కరించేందుకు ప్రొడ్యూసర్స్ కౌన్సిల్ రేపు (మే 21, 2025) సాయంత్రం 4 గంటలకు ఒక కీలక సమావేశాన్ని ఏర్పాటు చేసింది.

Also Read:Rana Naidu 2: నెట్‌ఫ్లిక్స్‌లో ‘రానా నాయుడు 2’ వచ్చేస్తోంది.. ఎప్పటి నుంచంటే?

ఈ సమావేశంలో ఎగ్జిబిటర్ల డిమాండ్‌ను చర్చించి, రెండు వర్గాలకు ఆమోదయోగ్యమైన పరిష్కారం కనుగొనేందుకు ప్రయత్నాలు జరగనున్నాయి. ఒకవేళ ఈ చర్చలు విఫలమైతే, జూన్ 1 నుంచి తెలుగు రాష్ట్రాల్లో థియేటర్లు మూతపడే ప్రమాదం ఉంది, ఇది సినీ పరిశ్రమపై తీవ్ర ప్రభావం చూపవచ్చు. ఈ సమస్య పరిష్కారం కాకపోతే, కొత్త సినిమాల నిర్మాతలకి ఇబ్బంది కర అంశమే. రేపటి ప్రొడ్యూసర్స్ కౌన్సిల్ సమావేశం ఫలితం సినీ పరిశ్రమలోని అందరి దృష్టిని ఆకర్షిస్తోంది. ఈ చర్చలు సఫలమైతే, థియేటర్ల మూసివేతను నివారించే అవకాశం ఉందని, రెండు వర్గాల మధ్య సమస్య పరిష్కారమై సినీ పరిశ్రమ సాధారణ స్థితికి చేరుకుంటుందని అందరూ ఆశిస్తున్నారు.