Full Body Checkup : 30 ఏళ్లు దాటాయా? ఈ టెస్టులు మిస్ అయితే రిస్క్.!

ప్రస్తుత ఆధునిక కాలంలో మారుతున్న జీవనశైలి కారణంగా ఆరోగ్యంపై శ్రద్ధ పెట్టడం ప్రతి ఒక్కరికీ అనివార్యంగా మారింది. దాంతో ఇటీవలి కాలంలో హెల్త్ కాన్షియస్నెస్ పెరిగి, పూర్తి శరీర ఆరోగ్య పరీక్షల (Full Body Health Checkup) ప్రాముఖ్యత కూడా ఎంతగానో పెరుగుతోంది. ఉరుకుల పరుగుల జీవితం, వేళకు సరైన ఆహారం తీసుకోకపోవడం, మానసిక ఒత్తిడి (Stress), , శారీరక శ్రమ లేదా వ్యాయామం లేకపోవడం వల్ల మన శరీరంలో అనేక రకాల వ్యాధులు నెమ్మదిగా, నిశ్శబ్దంగా చేరిపోతున్నాయి. ప్రారంభంలో వీటికి పెద్దగా లక్షణాలు కనిపించకపోవడం వల్ల చాలా మంది ఈ సమస్యలను నిర్లక్ష్యం చేస్తారు. కానీ, సరైన సమయంలో ఆరోగ్య పరీక్ష చేయించుకుంటే, శరీరంలో అంతర్గతంగా జరుగుతున్న మార్పులను ముందుగానే గుర్తించి చికిత్స ప్రారంభించవచ్చు. దీనివల్ల భవిష్యత్తులో వచ్చే తీవ్రమైన ఆరోగ్య సమస్యలను , ప్రాణాంతక వ్యాధులను సైతం నివారించవచ్చని ఆరోగ్య నిపుణులు గట్టిగా చెబుతున్నారు.

ఏ వయస్సు నుండి పూర్తి శరీర ఆరోగ్య పరీక్షలు ప్రారంభించాలి?
చాలామందికి అసలు ఏ వయసు నుండి ఈ హెల్త్ చెకప్‌లు అవసరమనే సందేహం ఉంటుంది. దీనిపై ఆర్ఎంఎల్ హాస్పిటల్ (RML Hospital), వైద్య విభాగం డైరెక్టర్ అయిన ప్రొఫెసర్ డాక్టర్ సుభాష్ గిరి కీలక వివరాలను పంచుకున్నారు. సాధారణంగా 25 నుండి 30 సంవత్సరాల వయస్సు తర్వాతే మానవ శరీరంలో కొన్ని ప్రతికూల మార్పులు కనిపించడం మొదలవుతాయి. ఈ వయస్సులో ఉండే యువత ఎక్కువగా జంక్ ఫుడ్స్ తినడం, శారీరక శ్రమ తగ్గడం , కెరీర్, వ్యక్తిగత జీవితం వల్ల మానసిక ఒత్తిడికి గురికావడం వంటివి చేస్తుంటారు. ఇవి నేరుగా శరీరంపై ప్రభావం చూపుతాయి.

అందువల్ల, 30 ఏళ్ల వయస్సు దాటినప్పటి నుండి ప్రతి ఒక్కరూ సంవత్సరానికి కనీసం ఒక్కసారైనా పూర్తి శరీర ఆరోగ్య పరీక్ష చేయించుకోవడం ఉత్తమం. ఇక 40 ఏళ్ల వయస్సు దాటిన తర్వాత మధుమేహం (షుగర్), అధిక రక్తపోటు (బీపీ), గుండె సంబంధిత సమస్యలు , థైరాయిడ్ వంటి దీర్ఘకాలిక వ్యాధుల ప్రమాదం రెట్టింపు అవుతుంది. కాబట్టి 40 ప్లస్ వారు క్రమం తప్పకుండా పీరియాడికల్ హెల్త్ చెకప్‌లు చేయించుకోవడం మరింత అవసరం.

ఎవరికి ఈ ఫుల్ బాడీ చెకప్ అత్యంత అవసరం?

కుటుంబ చరిత్ర (Family History): మీ కుటుంబంలో తల్లిదండ్రులు లేదా పూర్వీకులకు మధుమేహం, అధిక రక్తపోటు, గుండె జబ్బులు లేదా థైరాయిడ్ సమస్యల చరిత్ర ఉంటే, అవి జన్యుపరంగా మీకు వచ్చే అవకాశం ఎక్కువ. కాబట్టి మీరు క్రమం తప్పకుండా పరీక్షలు చేయించుకోవాలి.

వ్యసనాలు, జీవనశైలి: ధూమపానం (Smoking) చేసే అలవాటు ఉన్నవారు, క్రమం తప్పకుండా మద్యం సేవించేవారు , విపరీతమైన పని ఒత్తిడితో కూడిన జీవనశైలిని కలిగి ఉన్నవారికి అంతర్గత అవయవాలు దెబ్బతినే ప్రమాదం ఉంది.

శారీరక స్థితి: అధిక బరువు (Obesity) లేదా ఊబకాయం ఉన్నవారు, పోషకాహార లోపంతో కూడిన అసమతుల్య ఆహారం తీసుకునేవారు , రోజువారీ జీవితంలో అస్సలు వ్యాయామం చేయని సోమరి జీవనశైలి ఉన్నవారు కూడా వైద్యుల సలహా మేరకు పరీక్షలు చేయించుకోవాలి.

ఈ లక్షణాలు కనిపిస్తే అస్సలు ఆలస్యం చేయవద్దు.!

• ఎలాంటి శ్రమ చేయకపోయినా నిరంతరం నీరసం, బలహీనతగా అనిపించడం.
• డైటింగ్ లేదా వ్యాయామాలు చేయకుండానే ఆకస్మికంగా బరువు తగ్గిపోవడం లేదా విపరీతంగా పెరగడం.
• తరచుగా వేధించే తలనొప్పి, రాత్రిళ్లు నిద్రలేమి (Insomnia) సమస్య వేధించడం.
• కొద్ది దూరం నడిచినా శ్వాస తీసుకోవడంలో ఇబ్బందులు ఏర్పడటం.
• తరచుగా ఏదో ఒక ఇన్‌ఫెక్షన్ల బారిన పడటం, ఆకలి పూర్తిగా మందగించడం, లేదా శరీరంలో ఎప్పుడూ ఎనర్జీ లెవెల్స్ తక్కువగా ఉన్నట్లు అనిపించడం.

ఇలాంటి అసాధారణ మార్పులు మీ శరీరంలో కనిపిస్తే వెంటనే ఏమాత్రం ఆలస్యం చేయకుండా, నిర్లక్ష్యం పక్కన పెట్టి తక్షణమే నమ్మకమైన వైద్యుడిని సంప్రదించాలి. వారు సూచించిన విధంగా పూర్తి శరీర పరీక్ష చేయించుకోవడం ద్వారా మీ ఆరోగ్యాన్ని మీ చేతుల్లోనే సురక్షితంగా ఉంచుకోవచ్చు. ‘ప్రివెన్షన్ ఈజ్ బెటర్ దాన్ క్యూర్’ (నివారణే మేలు) అనే సూత్రాన్ని గుర్తుంచుకుని ఆరోగ్యకరమైన జీవితాన్ని సాగించండి.