Madatha Kaja Recipe : స్వీట్ షాప్ స్టైల్‌లో జ్యూసీ మడత కాజాలు ఇంట్లోనే సులభంగా ఇలా తయారు చేసుకోండిలా.!

Madatha Kaja Recipe : ఆంధ్ర స్వీట్స్ అనగానే అందరికీ ముందుగా గుర్తొచ్చేవి కాకినాడ గొట్టం కాజాలు , మడత కాజాలు. పొరలు పొరలుగా కనిపిస్తూ, లోపల జ్యూసీగా ఉండే మడత కాజాలంటే ఇష్టపడని వారుండరు. వీటిని అచ్చం స్వీట్ షాప్ రుచితో, ఇంట్లోనే చాలా తక్కువ ఖర్చుతో ఎలా తయారు చేసుకోవాలో ఈ కథనంలో వివరంగా తెలుసుకుందాం.

కావలసిన పదార్థాలు
మడత కాజాల తయారీకి ప్రధానంగా మైదా పిండి అవసరం. సుమారు 250 గ్రాముల మైదా పిండికి మూడు టేబుల్ స్పూన్ల వేడి చేసిన నెయ్యి లేదా నూనెను సిద్ధం చేసుకోవాలి. పాకం కోసం రెండు కప్పుల పంచదార, యాలకుల పొడి , పాకం గడ్డకట్టకుండా ఉండటానికి ఒక టీస్పూన్ నిమ్మరసం అవసరమవుతాయి. అలాగే పొరల మధ్య చల్లుకోవడానికి కొద్దిగా కార్న్‌ఫ్లోర్ లేదా మైదాను పక్కన పెట్టుకోవాలి.

పిండి , పాకం తయారీ
మొదట ఒక వెడల్పాటి పాత్రలో మైదా పిండి తీసుకుని, అందులో వేడి చేసిన నెయ్యి వేసి బాగా కలపాలి. పిండిని చేత్తో ముద్దలా పట్టుకుంటే ఆకారం వచ్చేలా ఉండాలి. అప్పుడే కాజాలు గుల్లగా వస్తాయి. తర్వాత తగినన్ని నీళ్లు పోసి, చపాతీ పిండి కంటే కొంచెం గట్టిగా కలుపుకుని 20 నిమిషాల పాటు నాననివ్వాలి. ఈలోగా పంచదారలో నీళ్లు పోసి తీగ పాకం కంటే కొంచెం తక్కువగా, అంటే చేత్తో పట్టుకుంటే జిగురుగా అతుక్కునేలా (Sticky consistency) పాకం పట్టుకోవాలి. ఇందులో యాలకుల పొడి, నిమ్మరసం కలిపి పక్కన పెట్టుకోవాలి.

పొరలు వచ్చేలా కాజాలను సిద్ధం చేయడం
నానిన పిండిని ఐదు సమాన భాగాలుగా చేసుకుని, ఒక్కో భాగాన్ని వీలైనంత పల్చటి చపాతీలా ఒత్తుకోవాలి. ఇప్పుడు ఒక చపాతీపై నూనె రాసి, దానిపై కార్న్‌ఫ్లోర్ చల్లాలి. దీనివల్ల పొరలు ఒకదానికొకటి అతుక్కోకుండా విడివిడిగా వస్తాయి. ఇలా ఐదు చపాతీలను ఒకదానిపై ఒకటి అమర్చి, గాలి చొరబడకుండా గట్టిగా రోల్ చేయాలి. చివర్లో కొంచెం నీళ్లు రాసి రోల్‌ను అంటించాలి. ఈ రోల్‌ను చిన్న చిన్న ముక్కలుగా కట్ చేసి, ఒక్కో ముక్కను చపాతీ కర్రతో లేదా వేలితో తేలికగా ఒత్తితే మడత ఆకారం వస్తుంది.

వేయించడం , పాకంలో ముంచడం
స్టవ్ మీద నూనె పెట్టి, అది తక్కువ వేడిలో ఉన్నప్పుడే కాజాలను వేయాలి. కాజాలు నెమ్మదిగా నూనెలో పైకి తేలే వరకు తక్కువ మంట మీదనే ఉంచాలి. ఆ తర్వాత మీడియం ఫ్లేమ్‌కు మార్చి బంగారు రంగు వచ్చేవరకు వేయించాలి. ఇలా వేయించిన వేడివేడి కాజాలను వెంటనే తీసి గోరువెచ్చని పంచదార పాకంలో వేయాలి. సుమారు 2-3 నిమిషాల పాటు పాకంలో ఉంచితే, కాజాలు పాకాన్ని పూర్తిగా పీల్చుకుని జ్యూసీగా తయారవుతాయి.

అంతే! ఎంతో రుచికరమైన, కరకరలాడే మడత కాజాలు సిద్ధం. పిండి కలిపేటప్పుడు నెయ్యి వేయడం, చపాతీలను పల్చగా ఒత్తుకోవడం , తక్కువ మంట మీద వేయించడం వంటి చిన్న చిన్న చిట్కాలు పాటిస్తే.. మీరు కూడా అచ్చం స్వీట్ షాప్ తరహాలోనే ఈ కాజాలను ఇంట్లోనే తయారు చేసి కుటుంబ సభ్యులను మెప్పించవచ్చు.