Egg Biryani Recipe: 10 నిమిషాల్లోనే కుక్కర్ లో ఎగ్ బిర్యానీ.. ఇలా చేస్తే టెస్ట్ అదుర్స్..!

Egg Biryani Recipe: సాధారణంగా బిర్యానీ వండటం అంటే గంటల కొద్దీ సమయం పడుతుందని చాలామంది భావిస్తుంటారు. కానీ ప్రెజర్ కుక్కర్‌ను ఉపయోగించి కేవలం 10 నిమిషాల్లోనే అత్యంత రుచికరమైన ఎగ్ బిర్యానీని సిద్ధం చేసుకోవచ్చు. ముఖ్యంగా బ్యాచిలర్స్ లేదా ఆఫీసుకు వెళ్లేవారు తక్కువ సమయంలోనే హోటల్ స్టైల్ రుచితో ఈ బిర్యానీని ఎలా తయారు చేసుకోవాలో ఇప్పుడు చూద్దాం.

కావలసిన పదార్థాలు
ఈ క్విక్ ఎగ్ బిర్యానీ కోసం ఐదు ఉడికించిన గుడ్లు, ఒక గ్లాసు బాస్మతి బియ్యం (బియ్యాన్ని కేవలం కడిగి పెట్టుకుంటే సరిపోతుంది, నానబెట్టాల్సిన అవసరం లేదు) , ఒకటిన్నర గ్లాసుల నీళ్లు సిద్ధం చేసుకోవాలి. కూరగాయల విషయానికి వస్తే నాలుగు ఉల్లిపాయలు (వీటిలో రెండు ఫ్రైడ్ ఆనియన్స్ కోసం, మిగిలిన రెండు బిర్యానీ తయారీకి వాడాలి), ఒక పెద్ద టమాటో, రెండు టేబుల్ స్పూన్ల పెరుగు, ఒక టేబుల్ స్పూన్ అల్లం వెల్లుల్లి పేస్ట్ , మూడు పచ్చిమిర్చి అవసరం.

మసాలా దినుసుల కోసం బిర్యానీ ఆకు, దాల్చిన చెక్క, లవంగాలు, యాలకులు, ఒక టీస్పూన్ షాజీరా, స్టోన్ ఫ్లవర్ , మరాఠీ మొగ్గ తీసుకోవాలి. వీటితో పాటు పసుపు, ఉప్పు, కారం (ఒకటిన్నర టీస్పూన్), గరం మసాలా (అర టీస్పూన్), బిర్యానీ మసాలా (ఒక టీస్పూన్) సిద్ధంగా ఉంచుకోవాలి. చివరగా రుచి కోసం నూనె, నెయ్యి, కొత్తిమీర , పుదీనా ఆకులు అవసరమవుతాయి.

తయారీ విధానం: స్టెప్ బై స్టెప్
గుడ్లు , ఫ్రైడ్ ఆనియన్స్ ప్రిపరేషన్:
ముందుగా ఉడికించిన గుడ్లకు మసాలా పట్టేలా చిన్న చిన్న గాట్లు పెట్టుకోవాలి. కుక్కర్‌లో నూనె పోసి వేడి అయ్యాక, ఉల్లిపాయ ముక్కలను వేసి అవి గోల్డెన్ బ్రౌన్ కలర్ వచ్చే వరకు వేయించి పక్కన పెట్టుకోవాలి. అదే నూనెలో కొంచెం ఉప్పు, పసుపు, కారం వేసి గాట్లు పెట్టుకున్న గుడ్లను దోరగా వేయించి ఒక ప్లేట్‌లోకి తీసుకోవాలి.

బిర్యానీ మసాలా తయారీ
అదే కుక్కర్‌లో బిర్యానీ దినుసులు , షాజీరా వేసి మంచి సువాసన వచ్చేవరకు వేయించాలి. ఆ తర్వాత ఉల్లిపాయ ముక్కలు, పచ్చిమిర్చి, అల్లం వెల్లుల్లి పేస్ట్ వేసి పచ్చి వాసన పోయేలా వేగనివ్వాలి. అనంతరం టమాటో ముక్కలు, ఉప్పు, పసుపు, కారం వేసి టమాటోలు మెత్తబడే వరకు మగ్గించాలి. ఇప్పుడు గరం మసాలా, బిర్యానీ మసాలా వేసి వేయించిన తర్వాత కాసేపు స్టవ్ ఆఫ్ చేసి పెరుగు కలపాలి. మళ్ళీ స్టవ్ ఆన్ చేసి మసాలా నుండి నూనె వేరు పడే వరకు ఉడికించి, చివరగా కొత్తిమీర, పుదీనా ఆకులు వేసి కలపాలి.

బిర్యానీ ఉడికించడం
తయారైన మసాలా మిశ్రమంలో ఒకటిన్నర గ్లాసుల నీళ్లు పోసి ఉప్పు సరి చూసుకోవాలి. నీళ్లు మరుగుతున్న సమయంలో కడిగి పెట్టుకున్న బాస్మతి బియ్యాన్ని కలపాలి. ఇప్పుడు పైన ఫ్రైడ్ ఆనియన్స్, కొత్తిమీర, పుదీనాను లేయర్‌లుగా వేసి, ముందుగా వేయించి పెట్టుకున్న గుడ్లను పెట్టాలి. చివరగా పైన ఒక స్పూన్ నెయ్యి వేసి కుక్కర్ మూత పెట్టాలి.

మంటను మీడియం ఫ్లేమ్‌లో ఉంచి కేవలం రెండు విజిల్స్ వచ్చే వరకు ఉడికించాలి. కుక్కర్ ప్రెజర్ పూర్తిగా పోయి చల్లబడిన తర్వాత మూత తీస్తే, పొడిపొడిగా ఎంతో రుచికరంగా ఉండే ఎగ్ బిర్యానీ సిద్ధమవుతుంది. దీనిని రైతాతో కలిపి తింటే రుచి అద్భుతంగా ఉంటుంది. తక్కువ సమయంలో బిర్యానీ తినాలనుకునే వారికి ఇది ఒక పర్ఫెక్ట్ రెసిపీ.