Iran Nuclear Talks: ఇరాన్‌పై మళ్లీ అమెరికా దాడులు?.. అణు చర్చలపై ట్రంప్ కీలక వ్యాఖ్యలు

Iran Nuclear Talks: అమెరికా అధ్యక్షుడు డొనాల్డ్ ట్రంప్ ఇరాన్‌పై అమెరికా మళ్లీ సైనిక చర్యలకు దిగే అవకాశం ప్రస్తుతం “అత్యంత అసంభవం” (Highly Unlikely) అని పేర్కొన్నారు. అయితే, టెహ్రాన్ అణు కార్యక్రమంపై జరుగుతున్న చర్చల్లో గణనీయమైన పురోగతి సాధించడంతో పాటు వ్యూహాత్మకంగా కీలకమైన హార్ముజ్ జలసంధిని తిరిగి తెరవడం వంటి అంశాల్లో ఒప్పందం కుదరడంపై తదుపరి పరిణామాలు ఆధారపడి ఉంటాయని స్పష్టం చేశారు. అదే సమయంలో, ఇరాన్‌లోని 38 వంతెనలు, ఇతర కీలక మౌలిక సదుపాయాలను అమెరికా పొటెన్షియల్ లక్ష్యాలుగా గుర్తించిందని ట్రంప్ వెల్లడించారు.

CNN ఇంటర్వ్యూలో ట్రంప్ వ్యాఖ్యలు

ఆదివారం CNNకు ఇచ్చిన సుమారు 20 నిమిషాల ఫోన్ ఇంటర్వ్యూలో ట్రంప్ ఈ విషయాన్ని పలుమార్లు ప్రస్తావించారు. ఇరాన్ విస్తృతమైన దౌత్యపరమైన ఒప్పందానికి అంగీకరిస్తే, మళ్లీ సైనిక ఉద్రిక్తతలకు దారితీసే పరిస్థితిని నివారించవచ్చని ఆయన సంకేతాలు ఇచ్చారు. “వారు చాలా బలమైన ఒప్పందంపై సంతకం చేస్తారా లేదా అన్నదానిపై ఇది ఆధారపడి ఉంటుంది” అని ట్రంప్ CNNతో అన్నారు. ఇరాన్‌ను “విఫలమవుతున్న దేశం”గా అభివర్ణించిన ట్రంప్, ఆ దేశంలో ద్రవ్యోల్బణం భారీగా పెరిగిందని పేర్కొన్నారు. “అవసరమైతే నేను చర్య తీసుకుంటాను. కానీ మేము వారిని చాలా తీవ్రంగా దెబ్బతీశాం,” అని వ్యాఖ్యానించారు.

ఆర్థికంగా, సైనికంగా ఇరాన్ బలహీనపడిందా?

అమెరికా విధించిన కఠినమైన ఆర్థిక ఆంక్షలు, గతంలో జరిగిన సైనిక దాడుల కారణంగా ఇరాన్ సామర్థ్యాలు తీవ్రంగా దెబ్బతిన్నాయని ట్రంప్ పేర్కొన్నారు. “వారు ఆర్థికంగా క్షీణిస్తున్నారు. మేము వారిని సైనికంగా దెబ్బతీశాం. అవసరమైతే వారిని పూర్తిగా అంతం చేయగలం,” అని ట్రంప్ అన్నారు. అయితే, ప్రస్తుతం మళ్లీ పెద్ద ఎత్తున సైనిక చర్యలకు దిగాల్సిన అవసరం వచ్చే అవకాశం చాలా తక్కువగా ఉందని ఆయన పునరుద్ఘాటించారు.

38 వంతెనలు లక్ష్యాలుగా గుర్తింపు

ఇరాన్‌లోని కీలక మౌలిక సదుపాయాలపై కూడా అమెరికా దృష్టి పెట్టినట్లు ట్రంప్ వెల్లడించారు. “మేము కూల్చివేయగల 38 వంతెనలను గుర్తించాం. వాటిని కేవలం ఒక గంటలో ధ్వంసం చేయవచ్చు,” అని పేర్కొన్నారు. “నాకు వంతెనలను కూల్చడం ఇష్టం లేదు. వంతెన నిర్మించడం చాలా కష్టమైన పని. వాటి నిర్మాణానికి సంవత్సరాలు పడతాయి,” అని ట్రంప్ వ్యాఖ్యానించారు.

‘అన్ని రంగాల్లో యుద్ధాన్ని ముగించండి.. లేకపోతే తీవ్ర పరిణామాలు’

మరోవైపు, ఇరాన్ విదేశాంగ మంత్రి సయ్యద్ అబ్బాస్ అరాఘ్చీ అమెరికాకు తీవ్ర హెచ్చరిక జారీ చేశారు. అన్ని రంగాల్లో శత్రుత్వాన్ని ముగించేందుకు టెహ్రాన్ ప్రతిపాదించిన షరతులను అంగీకరించాలని, లేకపోతే తీవ్రమైన సైనిక ప్రతీకారాన్ని ఎదుర్కోవాల్సి ఉంటుందని హెచ్చరించారు. సోషల్ మీడియా వేదిక Xలో ఆదివారం స్పందించిన అరాఘ్చీ, ఇప్పుడు నిర్ణయం తీసుకోవాల్సింది అమెరికా ప్రభుత్వమేనని పేర్కొన్నారు. “అమెరికా ఓటర్లు తమ నిర్ణయం తీసుకున్నారు. ఇప్పుడు వైట్ హౌస్ తన నిర్ణయం తీసుకునే సమయం వచ్చింది,” అని పోస్టు చేశారు.

ఇరాన్ ప్రతిపాదన ఇంకా అమల్లోనే ఉందని పేర్కొంటూ, అన్ని రంగాల్లో యుద్ధానికి ముగింపు పలకడం సహా నిర్దిష్ట షరతులను అంగీకరిస్తే ఫలితాలు కనిపిస్తాయని తెలిపారు. అలా కాకుండా యుద్ధ మార్గాన్ని ఎంచుకుంటే, ఇరాన్‌కు చెందిన అప్రమత్తమైన మరియు యుద్ధ అనుభవం కలిగిన దళాలు తీవ్ర ప్రతిస్పందన ఇస్తాయని హెచ్చరించారు.

ఇరాన్‌తో ‘మిషన్ ఇంకా పూర్తి కాలేదు’: ఇజ్రాయెల్

ఇదిలా ఉండగా, ఇజ్రాయెల్ రక్షణ మంత్రి ఇజ్రాయెల్ కాట్జ్ కూడా ఇరాన్‌పై కీలక వ్యాఖ్యలు చేశారు. ఇరాన్ విషయంలో ఇజ్రాయెల్ పని ఇంకా పూర్తికాలేదని, అవసరమైతే మరోసారి దాడులు ప్రారంభించే అవకాశం ఉందని సంకేతాలు ఇచ్చారు. ఇరాన్ అణ్వాయుధాలను అభివృద్ధి చేసేందుకు ప్రయత్నిస్తోందని మళ్లీ ఆరోపించారు. అయితే, ఈ ఆరోపణకు సంబంధించిన ఆధారాలను ఆయన వెల్లడించలేదు. “ఇరాన్ విషయంలో మిషన్ ఇంకా పూర్తి కాలేదు. ఇరాన్ అణ్వాయుధాలను పొందేందుకు తన ప్రయత్నాలను పునరుద్ధరించేందుకు ప్రయత్నిస్తోంది. ఇతర తీవ్రమైన చర్యలు కూడా ఇజ్రాయెల్ దేశానికి నిజమైన ప్రమాదాన్ని కలిగిస్తున్నాయి,” అని కాట్జ్ పేర్కొన్నారు.